ფარიკაობა. შარშანდელი ჩემპიონები მეექვსეზე

ერევანში დამთავრდება 23-წლამდელ მოფარიკავეთა ევროპის ჩემპიონატი, რომელშიც საქართველოს თერთმეტი წარმომადგენელიც მონაწილეობს.

გუშინ გუნდური შეჯიბრებები გაიმათა. შარშან მსგავს ტურნირში საქართველოს მოხმალავე ვაჟთა ნაკრებმა (მიხეილ მარდალეიშვილი, საბა სულამანიძე, ნიკა შენგელია, ვაჟა რეჭია) ჩემპიონობა მოიპოვა. იმ შემადგენლობიდან ამჟამად გუნდის სპორტულ ღირსებას სამნი იცავდნენ (სულამანიძე, შენგელია, რეჭია.

მათ დაემატა ნიკა ჭეიშვილი), მაგრამ 2017 წლის შედეგის გამეორება ვერ შეძლეს. პირველ შეხვედრაში ჩვენებმა პოლონეთი დაჯაბნეს - 45:27, თუმცა მეორე მატჩი ბელარუსთან 3 ჩხვლეტით დათმეს - 42:45 და ნახევარფინალს მიღმა აღმოჩნდნენ.

მეხუთე-მერვე ადგილებისთვის ბრძოლაში ქართველმა მოხმალავეებმა უნგრელებს სძლიეს - 45:18, მაგრამ გერმანელებთან 38:45 დამარცხდნენ და მე-6 ადგილს დასჯერდნენ. საპრიზო ადგილები კი ასე განაწილდა: 1. იტალია, 2. საფრანგეთი, 3. ბელარუსი.

- დასანანი მარცხი განვიცადეთ ბელარუსთან, თორემ მედალი გარანტირებული გვექნებოდა, - გვითხრა საქართველოს ნაკრების მთავარმა მწვრთნელმა მერაბ ბაზაძემ, რომელსაც გუშინ ერევანში შევეხმიანეთ. - ამ ჩემპიონატზე ქართველთაგან შესანიშნავად იასპარეზა მოხმალავე ნიკა შენგელიამ, რომელმაც, როგორც იცით, პირად პირველობაში მხოლოდ ფინალური პაექრობა დათმო იტალიელ მეტოქესთან და ვერცხლის მედალი მოიპოვა.

ჩემპიონატის აღმოჩენა გახლდათ მოხმალავე ლიკა ჯიჯეიშვილი. მან ჯგუფში ექვსივე შეხვედრა მოიგო და პლეი ოფში მეორე ნომრად გავიდა. საბოლოოდ მან მე-6 ადგილი დაიკავა. ერთის გარდა, პირველი ხუთეულის წევრები ლიკაზე 2-4 წლით უფროსები იყვნენ. თამამად შეგვიძლია ვთქვათ, რომ ქართულ ფარიკაობას შესანიშნავი ცვლა ეზრდება და ის მალე აალაპარაკებს მუშკეტერთა სამყაროს.

ჯიჯეიშვილი 10 მაისიდან თეოდორა კახიანსა და დარია ანტონოვასთან ერთად მოსკოვის გრან პრიზე ("მოსკოვის ხმალი") გამოვა პირადში, შემდეგ კი ანტალიაში მსოფლიოს თასის სატელიტი ტურნირის პირად-გუნდურში მოსინჯავს ძალებს.

დღეს ერევანში ასპარეზობის ბოლო რაუნდში ისევ გუნდური პაექრობები გაიმართება. მოხმალავე გოგონათა საქართველოს ნაკრები ლიკა ჯიჯეიშვილის, მარიამ აფციაურისა და ანა აფრასიძის შემადგენლობით დაუპირისპიდება მეტოქეებს, ხოლო რაპირით მოფარიკავე ვაჟთა ნაკრებში იქნებიან ლუკა ღაღანიძე, ლაშა გალუაშვილი და გიორგი ჭუმბურიძე.

ყოველდღიური სპორტული გაზეთი "ლელო"
923
მკითხველის კომენტარები / 0 /
მსგავსი ამბები
რუბრიკის სხვა სიახლეები
;