ფარიკაობა. შვიდეულით სერბულ ნოვი სადში, მოფარიკავეთა ევროპის ჩემპიონატზე

სერბულ ნოვი სადში ხვალ დაიწყება მოფარიკავეთა ევროპის ჩემპიონატი, რომელიც 22 ივნისამდე გაგრძელდება და მედლები სამივე დისციპლინაში გათამაშდება, როგორც პირადში, ისე - გუნდურში.

შარშან მსგავს შეჯიბრებაზე თბილისში წარმატებით იასპარეზა მოხმალავე თეოდორა კახიანმა, რომელმაც ოქროს ჯილდო მოიპოვა.

სამწუხაროდ, იგი წლეულს ტიტულის დაცვას ვერ ახერხებს, რადგან ამჟამად ამერიკაში ცხოვრობს და ვიზის პრობლემა ვერ მოაგვარა. თბილისში მესამე ადგილზე გავიდა რიოს ოლიმპიადის მონაწილე მოხმალავე სანდრო ბაზაძე, ხოლო მოხმალავეთა გუნდი რვა საუკეთესოში მოხვდა.

ნოვი სადში საქართველოს სპორტის ღირსებას შვიდი სპორტსმენი დაიცავს. 16 ივნისს საფარიკაო ბილიკებზე გავლენ რაპირაში 23-წლამდელთა ევროპის 2017 წლის პირველობის ბრინჯაოს პრიზიორი ლუკა ღაღანიძე და 18 წლის მოხმალავე ლიკა ჯიჯეიშვილი, რომელმაც წლეულს ჯერ თანატოლთა მსოფლიოს პირველობაზე იფარიკავა კარგად, შემდეგ კი 23-წლამდელთა ევროპის ჩემპიონატზე მეექვსე იყო.

18 ივნისს ძალებს მოსინჯავენ დაშნით მოფარიკავე მაია გუჩმაზოვა და მოხმალავე ვაჟები - სანდრო და ბექა ბაზაძეები, მიხეილ მარდალეიშვილი და 23-წლამდელებში ევროპის წლევანდელი ვიცე ჩემპიონი ნიკა შენგელია. ასპარეზობის ბოლო დღეს - 21 ივნისს საქართველოს მოხმალავე ვაჟთა ნაკრები გუნდური პირველობისთვის იბრძოლებს.

ევროპის ჩემპიონატისთვის ქართველი მუშკეტერები აქტიურად ემზადებოდნენ, განსაკუთრებით მოხმალავეები, რომლებმაც მოსკოვში 10-დღიანი საწვრთნელი შეკრება გაიარეს, შემდეგ იქვე გრან პრიზე გამოვიდნენ, ერთი კვირის შემდეგ კი ესპანეთში მსოფლიოს თასზე მოსინჯეს ძალები.

ყოველდღიური სპორტული გაზეთი "ლელო"
847
მკითხველის კომენტარები / 0 /
მსგავსი ამბები
რუბრიკის სხვა სიახლეები
;