ფაჩულიას +27, გოლდენ სტეიტის 127 - ქართული გვარის გამოცხადებას სან ანტონიოში ბუუ მოჰყვა [VIDEO]

ზაზა ფაჩულიას "გოლდენ სტეიტმა" სამმატჩიანი გასვლითი ტურნე წარმატებით დაასრულა. ჯერ "კლიპერსი" დაამარცხა (141:113), შემდეგ "სან ანტონიო" (112:92), გუშინ "დენვერი" (127:108). კლიპერსულ შეხვედრაზე ჩვენი გაზეთის წინა ნომერში მოგითხრეთ, აქ რამდენიმე სიტყვით "სან ანტონიოსა" და "დენვერთან" მატჩებზე შევჩერდებით.

* * *
ოკლენდელები სანანტონიოელებს პირველ პერიოდში 12:31 ჩამორჩნენ, მაგრამ მეორე თორმეტწუთეულიდან სიტუაცია გამოასწორეს და მესამე რაუნდში პირველად დაწინაურდნენ კიდეც.

ზაზა ფაჩულიას გვარის გამოცხადებას დარბაზში გამაყრუებელი ყვირილი მოჰყვა. ასე შეხვდნენ ქართველს "სპურსის" ქომაგები, რომლებსაც ჯერაც არ დავიწყებიათ, რომ სწორედ ქართველთან შეჯახების შემდეგ გადაუბრუნდა კოჭი კავაი ლეონარდს გასული სეზონის კონფერენციის ფინალში.

ფაჩულიამ მატჩი 13 წუთში 4 ქულით, 3 მოხსნითა და 2 პასით დაასრულა. კლეი ტომპსონმა 27 ქულა ჩააგდო, კევინ დურანტმა - 24, სტეფ კარიმ - 21.

* * *
სან ანტონიოდან "გოლდენ სტეიტი" დენვერში გადაფრინდა და "ნაგეტსის" წინააღმდეგ ითამაშა. მძიმე სტარტის მიუხედავად, ოკლენდელებმა პირველივე მეოთხედში მოახერხეს თამაშის გამოსწორება და, შეიძლება ითქვას, თამაშის ბედის გადაწყვეტაც - 36:23 დაწინაურდნენ. მომდევნო სამ პერიოდში უპირატესობა კიდევ უფრო განავრცეს და სეზონის მეათე მატჩიდან მეშვიდე მოიგეს.

ქართველმა ცენტრმა სულ 14 წუთი ითამაშა, თუმცა პლუს-მინუსებში +27 ჩაიწერა, რაც იმას ნიშნავს, რომ როდესაც იგი მოედანზე იყო, "გოლდენ სტეიტი" 27 ქულით დაწინაურდა.

ზაზას სრული მონაგარი ასეთი იყო: 5-დან 4 ორქულიანი, 8 ქულა, 5 მოხსნა, 2 პასი, 1 ჩაჭრა. კევინ დურანტი 25 ქულამდე ავიდა, სტეფ კარის 22 ქულა და 11 პასი ჰქონდა, დრეიმონდ გრინმა და კლეი ტომპსონმა 15-15 ქულა ჩააგდეს.

"უორიორსი" მომდევნო მატჩს 7 ნოემბერს (თბილისის დროით გამთენიისას, 7:30 საათზე) "მაიამი ჰიტთან" შინ გამართავს.

ყოველდღიური სპორტული გაზეთი "ლელო"
1798
მკითხველის კომენტარები / 0 /
მსგავსი ამბები
რუბრიკის სხვა სიახლეები
;