პაატა გურასპაული: ამიტომ გადავწყვიტეთ ჯენინგის დამატება... რაც შეეხება მაკფადენს...

ესპანურმა გამოცემებმა საინტერესო ინფორმაცია გაავრცელეს: საქართველოს ნაკრებში თამაშის მიზნით ქართულ პასპორტს ელოდება "ბასკონიას" უკანახაზელი მეტ ჯენინგი. სიტუაციაში უკეთ ფედერაციის ვებ-საიტზე გამოქვეყნებულმა განცხადებამ გაგვარკვია, თუმცა კიდევ უკეთ გასარკვევად კალათბურთის ფედერაციის პრეზიდენტ პაატა გურასპაულს ვესტუმრეთ.

კალათბურთის ფედერაციის განცხადება მეტ ჯენინგის ნატურალიზაციასთან დაკავშირებით

ვისაუბრეთ როგორც ნაკრების ნატურალიზებულის თემაზე, ასევე ეროვნული გუნდის მომავალ მატჩებსა და ახალგაზრდული ასაკის ნაკრებების წარუმატებელ ევროგამოსვლაზე.

ბატონ პაატასთან ვრცელ ინტერვიუს მომდევნო კვირის დასაწყისში შემოგთავაზებთ, დღეს მხოლოდ ნატურალიზებულის საკითხს შევეხებით. მაშ ასე, მოვუსმინოთ ფედერაციის პრეზიდენტს:

"მსოფლიოს თასის პირველი საკვალიფიკაციო ეტაპის შემდეგ ვეძებდით ნატურალიზებული კალათბურთელის ალტერნატიულ ვარიანტებს. არა იმიტომ, რომ თად მაკფადენი ცუდია, არამედ იმიტომ, რომ მთავარ მწვრთნელ ილიას ზუროსს ჰქონოდა არჩევანის საშუალება, ყოფილიყო საშუალება შეედარებინა და კონკრეტულად ამა თუ იმ მომენტისთვის რომელიც უკეთ იქნებოდა მომზადებული ის ეთამაშებინა.

გვინდოდა ჩამოგვეყვანა მაღალი დონის სნაიპერი. ილიას ზუროსის რეკომენდაციით მეტ ჯენინგი, რომელიც ევროპაში გამორჩეული მსროლელია. იგი სამქულიანებსაც მაღალ დონეზე სტყორცნის, საშუალო დისტანციიდანაც, დაცვაშიც კარგია... დაველაპარაკეთ მათ, ვინც ჯენინგს იცნობს და დაგვიხასიათეს, როგორც გაწონასწორებული და ყველასათვის პატივსაცემი პიროვნება.

გადავწყვიტეთ, რომ მეტი საქართველოს ნაკრებისთვის სასარგებლო იქნბოდა და დავიწყეთ მოლაპარაკებები. თავად კალათბურთელმაც გამოთქვა სურვილი და "ბასკონიამაც" არ შეაფერხა.

ჯერ ჯენინგს საქართველოს პასპორტი არ მიუღია და ამიტომ, გადაჭრით ლაპარაკი ნაადრევია, თუმცა საჭირო დოკუმენტები საქართველოს მთავრობის შესაბამის სტრუქტურებში უკვე შეტანილია და ველით პასუხს. იმედი გვაქვს, რომ უახლოეს დღეებში ეს საკითხი დადებითად გადაწყდება. 2 სექტემბერს ფიბა-ში განაცხადის შეტანის ბოლო ვადაა და მანამდე უნდა მოესწროს. თუ ასე მოხდა, ჯენინგი მზადაა სექტემბრის დასაწყისში საქართველოში ჩამოვიდეს, გუნდთან ერთად გაიაროს შეკრება და პირველ სანაკრებო ფანჯარაში დაეხმაროს საქართველოს ნაკრებს.

რატომ ვამბობ პირველ ფანჯარას, ალბათ ხვდებით - იმიტომ, რომ მეორე და მესამე ფანჯარაში არათუ ჯენინგი, არამედ ევროლიგის მოთამაშე თორნიკე შენგელიაც ვერ ითამაშებს ნაკრებში. ჩვენდა სამწუხაროდ, ფიბა და ევროლიგა შეთანხმებამდე ვერ მივიდნენ და ევროლიგის კალათბურთელებს არა აქვთ საშუალება დაეხმარნონ ნაკრებებს შუა სეზონში.

აქედან გამომდინარე, რადგან მაკფადენი ევროლიგის გუნდში არ თამაშობს, მეორე და მესამე ფანჯარაში, ნოემბერსა და თებერვალში იგი საქართველოს ნაკრებში იქნება. თავად თედიც გაგებით ეკიდება სიტუაციას, ესმის, რომ მწვრთნელი ილიას ზუროსი აშენებს მომავლის გუნდს, რომლის მიზანიც ევროპის 2021 წლის ჩემპიონატზე ღირსეულად გამოსვლა იქნება."

შეგახსენებთ, რომ 13 სექტემბერს საქართველოს ნაკრები მსოფლიოს ჩემპიონატის მეორე საკვალიფიკაციო ეტაპის მატჩს ისრაელში გამართავს, 16 სექტემბერს საბერძნეთს უმასპინძლებს, 30 ნოემბერსა და 3 დეკემბერს სტუმრად ესტონეთი და შინ ისრაელი ელის, 21 და 24 თებერვალს სტუმრად საბერძნეთი და შინ - ესტონეთი.

3874
მკითხველის კომენტარები / 0 /
მსგავსი ამბები
რუბრიკის სხვა სიახლეები
;