ფერნანდო ტორესი - ატლეტიკოს უკვდავი მებრძოლი სული

ის უკვე იმდენჯერ ჩამოწერეს სხვადასხვა კლუბში, რომ თვლაც აგვერია - მიუხედავად ამისა, ფერნანდო ტორესი ისევ ყურადღების ცენტრშია, ისევ იბრძვის...

კვირას "ელ ნინიომ" დიეგო სიმეონეს მეთაურობით "ატლეტიკოს" საიუბილეო, მე-600 გოლი გაიტანა. რადამელ ფალკაო (100), რაულ გარსია (200), მარიო მანჯუკიჩი (300), ანტუან გრიზმანი (400) და ანხელ კორეა (500), ასეთია საიუბილეო გოლების ავტორთა ჩამონათვალი.

ტორესმა ანხელ კორეას პასით შეძლო გატანა, რამდენიმე წუთში კი "ვანდა მეტროპოლიტანოს" მინდორი ფეხზე წამომდგარი პუბლიკის მხურვალე ოვაციების თანხლებით დატოვა.

თუმცა "ლას პალმასთან" მისი გოლი მხოლოდ სიმეონესთვის არ იყო მნიშვნელოვანი - ტორესმა ამ გოლით "ატლეტიკოს" "უკვდავთა" ხუთეულში დაიმკვიდრა ადგილი.

საქმე ისაა, რომ ეს გოლი მისთვის 124-ე იყო "ატლეტიკოს" მაისურით, იგი პეიროს გაუთანაბრდა, წინ კი მხოლოდ ოთხი ლეგენდარული ფორვარდია. "ელ ნინიოს", რა თქმა უნდა, აქვს მცირე შანსები, რომ გარატეს და კამპოსს დაეწიოს, მაგრამ ესკუდერო და ლუის არაგონესი მისთვის მიუღწევლები გვგონია.

სოციალურ მედიაში "ატლეტიკოს" ვეტერან შემტევს დაუღალავი მებრძოლის სახელი აქვს და ის ძალიან უყვართ.

"ჩვენი უდიდესი სისუსტე დანებებაა, როგორც კი დანებდები, ყველაფერი რჩება. ყველაზე სწორი გზა წარმატებისკენ ბრძოლაა, ბრძოლა ბოლომდე. უნდა სცადო, სანამ შეგიძლია". კიდევ ერთხელ ვამბობ, საკუთარ თავებს ლიმიტებს თავად ვუწესებთ", - დაწერა სოციალურ ქსელში 33 წლის ფორვარდმა.

ფერნანდო ისევ მედიის ყურადღების ცენტრშია. ის არ "ჩაიძირა", არც დიეგო კოშტას გამოჩენის შემდეგ, მიუხედავად იმისა, რომ გუნდში ისევ რჩება გრიზმანი და ისევ მადრიდშია კევინ გამეირო.

ფერნანდომ ეს პოსტი საკუთარი ფოტოთი გააფორმა, რომელზეც იგი მოკრივის ხელთათმანებითაა და რინგს ეყრდნობა. მას ისევ უკეთია მოკრივის ხელთათმანები და ისევ ბრძოლას აპირებს...

მებრძოლი ტორესი მშვიდად ელის შანსს, რომელიც ყოველთვის არც არის მისთვის - ახლანდელ "ატლეტიკოში" შემტევთაგან მასზე წინ განიხილებიან - დიეგო კოშტა, ანტუან გრიზმანი, კევინ გამეირო, ანხელ კორეა. მოკლედ, ყველა!

როცა მას "ატლეტიკოში" აბრუნებდნენ, ყველამ იცოდა, რომ ფერნანდოს ძირითადად მეორადი როლი უნდა შეესრულებინა, თუმცა, როცა შანსი ეძლევა, იგი ყოველთვის იბრძვის, თამაშობს და სასარგებლოა კლუბისთვის.

როცა დაბრუნდა, დიეგო სიმეონემ ძალიან გასაგებად ახსნა, რომ ლეგენდის სტატუსი ტორესს არანაირ შეღავათს არ მისცემდა "ატლეტიკოში", რომ მას უნდა ებრძოლა სასტარტოში მოხვედრისთვის და "ელ ნინიოც" იბრძვის, იბრძვის თითქმის წაგებულ სიტუაციებშიც, როგორიც ახლაა მისთვის კლუბში შექმნილი.

ისეთი ფეხბურთელები, როგორიც მარიო მანჯუკიჩი, რაულ ხიმენესი, ჯექსონ მარტინესი, ლუსიანო ვიეტო და ანხელ კორეა არიან, ყოველთვის მის წინ განიხილებოდნენ "ატლეტიკოში". ის კი ელოდა თავის შანსს. ჩამოთვლილთაგან კლუბში მხოლოდ კორეა რჩება, "ელ ნინიო" კი ისევ აქ არის, ისევ ლეგენდაა.

მისი ქცევა გასახდელში, მოედანზე თუ მის გარეთ, ყოველთვის იყო მისაბაძი მაგალითი გუნდელებისთვის, ახალგაზრდა ფანებისთვის, "ელ ნინიო" "როხიბლანკოს" მთავარი პრინციპის - ბოლომდე ბრძოლის ნათელი გამოხატულებაა...

ატლეტიკოს საუკეთესო ბომბარდირები

ფეხბურთელი გოლი/მატჩი
1. არაგონესი 172/368
2. ესკუდერო 169/330
3. კამპოსი 135/235
4. გარატე 134/325
5. პეირო 124/219
5. ტორესი 124/384

ყოველდღიური სპორტული გაზეთი "ლელო"
1246
მკითხველის კომენტარები / 0 /
მსგავსი ამბები
რუბრიკის სხვა სიახლეები
;