ფეხბურთიდან როკვარსკვლავობამდე: ხუან პაბლო ოსვალდო და მისი სიგიჟეები - ჩხუბი იკარდისთან და ალიყური მანჩინის

...2016 წლის დეკემბერში ალბათ ყველაზე როკენროლური დიალოგი შედგა მწვრთნელსა და ფეხბურთელს შორის. ხორხე სამპაოლიმ დაურეკა ხუან პაბლო ოსვალდოს, რადგან მისი “სევილიაში” მიწვევა სურდა:

“მე შენგან არაფერს ვითხოვ. აკეთე მინდორზე და მის გარეთ ის, რაც გინდა და როგორც გინდა, ოღონდ, მე თავდამსხმელი მჭირდება”, - უთხრა სამპაოლიმ ოსვალდოს.

“ბოს, მე არგენტინაში მივდივარ, სადაც აუცილებლად უნდა დავესწრო როკფესტივალს”, - იყო პასუხი.
“ბოდიში, რომ შეგაწუხე. ვიცი, ასეთ რამეს რომ არ დააკლდები”, - დაასრულა საუბარი სამპაოლიმ.

წარმატებული მოლაპარაკების შანსი თავიდანვე მინიმალური იყო. სამიოდე თვით ადრე ოსვალდო “ბოკა ხუნიორსიდან” გამოაგდეს სხვადასხვა დარღვევების გამო. სწორედ ამიტომ ამბობდა გულახდილად ფეხბურთელი: “ფეხბურთი განსაკუთრებული რამაა. თუ ის გიყვარს, ბოლომდე უნდა გიყვარდეს. მე კი უფრო ლუდი და ბარბექიუ მიყვარდა, ვიდრე ფეხბურთი და თუნდაც ფული”.

ზეიმობდა, როგორც ბატისტუტა,
უკრავდა კატალონიის  მთავარ მოედანზე...

ხუან პაბლო ოსვალდოს კარიერა 11 წელი გრძელდებოდა და ამ დროის განმავლობაში მან 12 კლუბი გამოიცვალა. საინტერესოა, რომ ის ერთ გუნდში 2 წელიწადზე მეტხანს არ ჩერდებოდა...

ოსვალდოს მუდამ “გიჟის” რეპუტაცია ჰქონდა, მაგრამ ისეთ კლუბებში კი ითამაშა, როგორებიც არიან “რომა”, “იუვენტუსი”, “ინტერი”... ამასთან, ის 14-ჯერ გამოიძახეს იტალიის ნაკრებში. მართალია, ოსვალდო არგენტინაში გაიზარდა, მაგრამ მას ორმაგი მოქალაქეობა აქვს.

ოსვალდო პირველად ევროპაში 2006 წელს გამოჩნდა და “ატალანტაში” ჩაირიცხა, რომელიც მაშინ სერია B-ში ასპარეზობდა.

“მაშინ მხოლოდ 20 წლის ვიყავი. იყო სიცივე, თოვლი, რაღაც საშინელი სასტუმრო. ავედი ნომერში და ვიტირე. ეგრევე აგენტს დავურეკე, სად გამიშვი-მეთქი და ვთხოვე, წავეყვანე იქიდან. უბედური ვიყავი. სახლი მენატრებოდა, თანაგუნდელები კი ჩემთვის უცხო რამეებზე ლაპარაკობდნენ”.

“ატალანტამ” ოსვალდო გაანათხოვრა “ლეჩეში”. იქ მას ელოდა უხეში, მაგრამ საფეხბურთო ინტელექტით სავსე ზდენეკ ზემანი - ლეგენდარული ჩეხი სპეციალისტი, რომელიც მიხვდა, რომ ამ პატარა ბიჭში ერთი ვაგონი ნიჭი და ტექნიკა იყო. მან 8 გოლი შეაგდო 30 შეხვედრაში და “ატალანტამ” ის “ფიორენტინას” მიჰყიდა.

ფლორენციელებმა ოსვალდოში 5 მილიონი ევრო გადაიხადეს. “იებში” ფეხბურთელის კარიერა არ აეწყო. 40 შეხვედრაში მხოლოდ 6 გოლი შეაგდო, ითამაშა “ბოლონიაში” და გადაწყვიტა, რომ ყველაფრის შეცვლის დრო იყო - 2010 წელს ჩვენი გმირი გადავიდა “ესპანიოლში”, რომელსაც მაშინ მაურისიო პოჩეტინო წვრთნიდა.

პოჩეტინო არ შეაშინა იმან, რომ 4 წლის განმავლობაში ნიჭიერმა ოსვალდომ იტალიაში თითქმის ვერაფერი გააკეთა და მხოლოდ იმით დაამახსოვრდა საფეხბურთო თემს, რომ გოლებს... გაბრიელ ბატისტუტას სტილში აღნიშნავდა. “ესპანიოლში” ის ძალიან იღლებოდა ვარჯიშებზე.

“პოჩეტინოს ვარჯიშები საშინელებაა. ის გაიძულებს, ძაღლივით ირბინო და ამ მომენტში შენ ის ძალიან გძულს, მაგრამ გადიხარ მინდორზე და ამჩნევ, თუ როგორი სასარგებლო იყო ეს სირბილი”, - იხსენებდა მოგვიანებით ოსვალდო.

“ესპანიოლის” მაისურით მან 46 შეხვედრაში 21 გოლი შეაგდო. ის მიიჩნევს, რომ კარიერის საუკეთესო წლები სწორედ კატალონიურ კლუბში გაატარა:

“იტალიაში რთულია. 3 თამაშში 15 გოლი უნდა შეაგდო, თორემ ჟურნალისტები შენს კრიტიკას დაიწყებენ. ესპანეთში კი ასეთი წნეხი არ არის”, - ამბობს ოსვალდო.

ის ხშირად იყო კატალონიის მთავარ მოედანზე, სადაც გიტარაზე უკრავდა: “მე იქ ძალიან მომწონდა. მომწონდა პირველ რიგში უბრალოება. ვიჯექი ჩემთვის და ვუკრავდი. რაც მთავარია, არავინ მცნობდა. კარგი დრო იყო”...

ჰბაძავდა ტოტის და
ჩხუბობდა ლამელასთან

“რომამ” ოსვალდოს სანაცვლოდ 15 მილიონი ევრო გადაიხადა. ასეთმა მოულოდნელმა ტრანსფერმა სულიერად დასცა ესპანელი ქომაგები, ოსვალდომაც ცოტა მოიწყინა...

“ყველამ იცის, რომ მე არასოდეს არავინ მომიტყუებია. მინდოდა დარჩენა და ამ გულშემატკივრებისთვის თამაში, მაგრამ “რომაში” იმიტომ გადავედი, რომ ტიტულების მოპოვება მინდოდა. როცა გავიგე, რომ “ესპანიოლის” ქომაგები მატყუარას მეძახიან, მეწყინა. მე მიყვარს “ესპანიოლი” და იმედი მაქვს, ერთხელაც დავბრუნდები იქ”.

56 მატჩი და 29 გოლი - ასეთი იყო ოსვალდოს სტატისტიკა “რომაში” და ამით ყველას დაუმტკიცა, რომ იტალიაშიც შეუძლია ფეხბურთის თამაში. მეორე მხრივ, ეს პერიოდი ძალიან სტრესული იყო...

თავდაპირველად მან ლამელასთან იჩხუბა...

2011 წლის ნოემბერში “რომამ” “უდინეზესთან” 0:2 წააგო. ერიკ ლამელამ, ერთ-ერთი კონტრშეტევისას, ჩვენი წერილის გმირს პასი არ მისცა. ოსვალდო ძალიან გაბრაზდა. “მომისმინე! მე შენზე უფროსი ვარ, და მეორეც - ეს “რივერ პლეიტი” არ გეგონოს”.

ლამელამ მაშინვე “ხურდა” დაუბრუნა: “რომელი მარადონა შენ ხარ?!” და ატყდა მუშტი-კრივი. მოჩხუბრები ძლივს გააშველეს.

“რომას” შემადგენლობაში, ალბათ, ერთ-ერთი ყველაზე მნიშვნელოვანი იყო გოლი, რომელიც მან “ლაციოს” გაუტანა და ისე აღნიშნა, როგორც ამას ფრანჩესკო ტოტი აკეთებდა.

2012 წლის თებერვალში “რომამ” გასვლითი მატჩი წააგო “სამპდორიასთან”. ოსვალდომ თავად დაარტყა 11-მეტრიანი, რომელიც ტოტის უნდა დაერტყა და ხელებში მისცა ბურთი მეკარეს. შინ დაბრუნებისას, რომის აეროპორტში, მას საშინლად დასცინეს - ქომაგებმაც და მასმედიამაც.

“მე ახლო ურთიერთობა მაქვს მასთან. ის კარგი ბიჭია და მე მას მხარს ვუჭერ”, - აღნიშნა მაშინ ტოტიმ.

მერე იტალიის თასის ფინალში “რომამ” წააგო “ლაციოსთან”. ოსვალდომ 15 წუთი ითამაშა და გუნდის დროებითი მთავარი მწვრთნელი აურელიო ანდრეაცოლი გააკრიტიკა - არ ვიცი, მთელი თამაში რას აკეთებდაო. ამ შეხვედრის დასრულების შემდეგ კი იტალიურ მედიას მისცა ინტერვიუ, სადაც განაცხადა, რომ რომი კარგი ქალაქია, მაგრამ ცუდი ისაა, რომ მას არ აფასებენ. ამან “რომას” ფანები ძალიან გააღიზიანა.

დაამტვრია ჟოზ ეფონტე და დაარტყა
მანჩინის...

ამასობაში პოჩეტინომ “საუთჰემპტონი” ჩაიბარა და ერთხელაც გადაწყვიტა ოსვალდოს მორჯულება. “მე მასთან ვარ. ის მე მაფასებს და ჩემთვის ის სამაგალითო მწვრთნელია”, - თქვა მაშინ ოსვალდომ.

მორჯულება მაინც არ შედგა. ჯერ იყო და, არგენტინელი ფეხბურთელი “ნიუკასლის” მეკარეების მწვრთნელს ეჩხუბა და დისკვალიფიკაციას გამოჰკრა ხელი. მერე ჟოზე ფონტე დაამტვრია. ეს მოხდა “საუთჰემპტონის” ვარჯიშზე. პორტუგალიელ მცველს მოტყდა ცხვირი და თვალი ჩაულურჯდა.

“ჩემს შესაჩერებლად უფრო მაგარი ვინმეა საჭირო, ვიდრე ოსვალდოა”, - ვითომ იხუმრა ფონტემ, მაგრამ კლუბში ვითარება ძალიან დაიძაბა. ოსვალდოს მიანიშნეს, რომ წასვლის დრო იყო და ისიც წავიდა.

მერე ისევ დაბრუნდა იტალიაში. “ინტერში” 12 მატჩში 5 გოლი შეაგდო, მაგრამ “იუვენტუსთან” შეხვედრაში მოხდა განსაკუთრებული რამ - მაურო იკარდიმ მას პასი არ მისცა. ოსვალდო თანამემამულეს ეგრევე მინდორზე შეება...

თამაში რომ მორჩა, “ინტერის” დამრიგებელმა რობერტო მანჩინიმ ოსვალდოს ჰკითხა, რა მოხდაო. პაბლო გაგიჟდა. “შენ ჩხუბი გინდა და თუ გინდა, მიიღებ კიდეც”, - უთხრა მან მანჩინის და ალიყური სთხლიშა.

მერე მან ტირილი დაიწყო, მაგრამ ამან ვეღარ უშველა. ორი ვარჯიში გამოტოვა და საბოლოო ჯამში გუნდის დატოვება მოუხდა...

ყოველდღიური სპორტული გაზეთი "ლელო"
886
მკითხველის კომენტარები / 0 /
მსგავსი ამბები
რუბრიკის სხვა სიახლეები
;