ფეხბურთი და კორონავირუსი. 4 მილიარდი ევროს ზარალი და კლუბების გაკოტრების საფრთხე!.

* ევროპის წამყვანი ლიგების ზარალი 4 მილიარდ ევრომდეა

* კორონავირუსმა ყველაზე მეტად ინგლისის პრემიერლიგას დაარტყა

* კორონავირუსის გამო ევროპის თითქმის ყველა ქვეყანაში ჩემპიონატი შეჩერებულია

* ჩემპიონატების ვერდასრულება კლუბებს კლოსალური ზარალს მოუტანს

* უეფას რეკომენდაციაა სეზონის 30 ივნისამდე დასრულება, ეს კი ნიშნავს, რომ ჩემპიონატები არაუგვიანეს მაისის შუა რიცხვებიდან უნდა გაგრძელდეს

იტალია- რამდენად სწრაფად დაიხევს უკან ეპიდემია?

დღეის მდგომარეობით COVID-19-ის ეპიდემიისგან ყველაზე მეტად იტალია დაზარლდა. წამყვანი საფეხბურთო ლიგებიდან ყველაზე ადრე (9 მარტს) სწორედ სერია A შეწყდა. მანამდე თამაშები მაყურებლის გარეშე ტარდებოდა. უმაყურებლოდ გაიმართა სეზონის ერთ-ერთი გადამწყვეტი შეხვედრა „იუვენტუსსა“ და „ინტერს“ შორის (2:0). ცარიელი ტრიბუნების წინაშე თამაში კლუბებისთვის დიდი ზარალის მომტანია. კლუბებს მოუწიათ აბონემენტების მფლობელთათვის თანხების დაბრუნება, ამას გარდა დაკარგეს ეგრეთ წოდებული Matchdays-ს შემოსავალი რომელიც უნდა შემოსულიყო ბილეთბისა და საკლუბო ატრიბუტიკის გაყიდვებიდან, ასევე კვების ობიექტებიდან.

როგორც ექსპერტებმა დათვალეს თუ იტალიაში სეზონი ვერ განახლდება, ან მატჩები უმაყურებლოდ ჩაივლის კლუბები სოლიდურ დანაკარგს ნახავენ. ასე მაგალითად „იუვენტუსი“ დაახლოებით 12.3 მილიონ ევროს იზარალებს, „მილანი“ 3.4 მილიონს, „ინტერი“ 2.7 მილიონს.

ამჟამად სერია A 3 აპრილამდე შეჩერებულია და ძალიან მცირეა იმის შანსი, რომ დათქმულ დროს მოხერხდეს მისი განახლება. იტალიაში კორონავირუსის პანდემია მთლი ძალით მძვინვარებს. 21 მარტის მონაცემებით ქვეყანაში 47,021 ინფიცირებული და 4,032 გარდაცვლილია. დაავადების ასეთი საშინელი დინამიკა ჩინეთშიც კი არ იყო, საიდანც გავრცელდა კორონავირუსი მთელ მსოფლიოში. COVID-19-ის ინფექცია იტალიელ ფეხბურთელებსაც დაუდასტურდათ. ამ მხრივ ყველაზე მეტად „სამპდორია“ დაზარალდა სადაც ფეხბურთელების გარდა, ვირუსი კლუბის თანამშრომლებსაც აღმოაჩნდათ. აქედან გამომდინარე, იტალიელი ექსპერტები ჩემპიონატის განახლების უფრო რეალურ თარიღად 3 მაისს ასახელებენ.

ბილეთების გაყიდვიდან და კომერციული ობიექტებიდან მიღებული ზარალი, ზღვაში წვეთია იმასთან შედარებით, რასაც კლუბები სატელევიზიო და სასპონსორო ხელშეკრულებების შეუსრულებლობის გამო ნახავენ. თუ იტალიაში სეზონი ვერ განახლდა, რაც დღეის მდგომარეობით სავსებით შესაძლებელია, „იუვენტუსი“ საერთო ჯამში დაახლოებიტ 110 მილიონ ევროს დაკარგავს - ამის შესახებ გამოცემა Ilbianconero-ს ექსპერტები ვარაუდობენ. ასეთი დანაკარგი თავის მხრივ დიდ გავლენას მოახდენს ტურინელთა ზაფხულის სატრანსფერო გეგმებზე. რა თქმა უნდა, სხვა იტალიური კლუბებიც არანაკლებ მძიმე დღში ჩავარდებიან. იტალიის ჩემპიონატის ვერგანახლების შემთხვევაში საერთო ჯამში ზარალმა შესაძლოა  700 მილიონ ევროს გადააჭარბოს, რაც იტალიური ფეხბურთისთვის კოლოსალური დარტყმა იქნება. სერია A-ს ხელმძღვანელობამ ჩემპიონატის განახლების ბოლო ვადა 9 მაისი დაასახელა, თუ ამ დრომდე მისი განახლება ვერ მოხერხდა, შემდეგ უკვე სეზონის გადარჩენა, ფაქტობრივად, შეუძლებელი გახდება.

ესპანეთი - როგორ უნდა მოესწროს 11 ტურის გამართვა?

იტალისს შემდეგ კორონავირუსით დაინფიცირებულთა და გარდაცვლილთა რიცხვით მეორე აგილზე ესპანეთი მოდის (21 მარტის მონაცემებით 21,571 დაინფიცირებული და  1,093 გარდაცვლილი).

ესპანურმა გამოცემა Mundo Deportivo-მ ლა ლიგის ვერგანახლების შემთხვევაში ზარალი დაახლოებით გამოთვალა - 678,4 მილიონი ევრო! აქედან - 549 მილიონი ტელევიზიებთან და სპონსორებთან ვერ შესრულებული კონტრაქტების გამო დაკარგული ფულია, 88 მილიონი აბონემენტების მქონე გულშემატკივრებისთვის დასაბრუნებელი თანხებია, 41,4 მილიონი კი ბილეთისა და სხვა საკლუბო ატრიბუტიკის გაყიდვიებიდან დაკარგული მოგება.

თუ ესპანეთის ჩემპიონატი მაინც განახლდება, ოღონდ თამაშები უმაყურებლოდ გაიმართება, ასეთ შემთხვევაში ზარალი გაცილებით ნაკლები იქნება - დაახლოებით 117 მილიონი ლა ლიგის კლუბებისთვის და 12,5 სეგუნდა დივიზიონის კლუბებისთვის.

ჯერჯერობით, ესპანეთის ჩემპიონატში მხოლოდ ორი ტურია გადადებული, მაგრამ ნათელია, რომ მისი განახლება აპრილის დასაწყისში შეუძლებელია. ამის თქმა თუნდაც „ვალენსიას“ მაგალითზე შეიძლება - კლუბის თანამშრომელთა დაახლოებიტ 35% დაინფიცირებულია, მათ შორის ფეხბურთელები გარაი, გაია, მანგალა...

მოგეხენებათ 17 მარტს უეფამ გადაწყვეტილება მიიღო ევროპის 2020 წლის ჩემპიონატის ერთი წლით გადატანის შესახებ, ხოლო საფეხბურთო ლიგების ხელმძღვანელებს რეკომენდაცია მისცა, სეზონი 30 ივნისამდე დაასრულონ. ესპანეთის ჩემპიონატში სათამაშო დარჩა 11 ტური, ეს კი იმ შემთხვევაში მოესწრება, თუკი ლა ლიგის განახლება მაქსიმუმ მაისის შუა რიხვებამდე მოხერხდება. თუ ამ ვადაში  ესპანეთის ჩემპიონატის მაინც ვერ განახლდება, კლუბები კოლოსალურ ფინანსურ ზარალს ვერ გაექცევიან.

პრემიერლიგა - სავარაუდო ზარალი მილიარდ ევროს გადააჭარბებს

უმსხვილესმა აუდიტორულმა კომპანიამ KPMG- მა ჩემპიონატების ვერ განახლების შემთვევაში, საკმაოდ სკეპტიკური პროგნოზი გააკეთა. საერთო ჯამში, ევროპის ხუთი წამყვანი ლიგა 4 მილიარდ ევროს დაკარგავს (აქ იგულისმება სატელევიზიო კონტრაქტები, სპონსორული ხელშეკრულებები, ბილეთბიდან და სხვადასხვა კომერციული საქმიანობიდან შემოსული თანხები...).

ყველაზე მეტად ამ მხრივ ინგლისური პრემიერლიგა დაზარალდება და მისი სავარაუდო დანაკარგი 1.25 მილიარდი ევროს შეადგენს, საიდანაც 800 მილიონი ტელეტრანსლაციებიდან ვერმიღებული თანხაა.

აქვე შეგახსენებთ წამყვან ჩემპიონატებში დარჩენილი ტურების რაოდენობას: ინგლისის პრემიერლიგა - 9 ტური, გერმანიის ბუნდესლიგა - 9, საფრანგეთის ლიგა 1 – 10, ესპანეთის ლა ლიგა - 11, იტალიის სერია A – 12.

აღსანიშნავია, რომ ექსპერტთა გამოთვლებით, დიდი ხუთეულის ქვეყნებიდან, სეზონის ჩავარდნის შემთხვევაში, პოტენციურად ყველაზე ნაკლები დანაკარგი გერმანიას (400 მილიონი) და საფრანგეთს (200 მლნ) ექნებათ.

როგორ იქნება ხელფასების საკითხი

აღნიშნულ რთულ სიტუაციაში კლუბები გაურკვევლ სიტუაციაში არიან - გადაუხადონ თუ არა სრულად ხელფასი ფეხბურთელებსა და თანამშრომლებს. ფეხბურთელები ამჟამად არ ვარჯიშობენ, თუმცა ხელფასის აღება კი სურთ, კლუბების ხელმძღვანელობას კი ასე გაგრძელება ხელს არ აძლევს. სერია A-სა და B-ს კლუბების პრეზიდენტებს განზრახული აქვთ, სანამ სპორტული ღონისძიებები ქვეყანაში შეჩერებულია, ხელფასებიც გაყინონ, რასაც, რა თქმა უნდა, იტალიის ფეხბურთელთა ასოციაცია კატეგორიულად არ ეთანხმება.

ანალოგიური სიტუაციაა სხვა ქვეყნებშიც. ფრანგული კლუბი „ამიენი“ პირველია ლიგა 1-ში, ვინც ოფიციალურად 16%-ით შეამცირა ფეხბურთელებისა და კლუბის მომსახურე პერსონალი ხელფასები. ესპანელი ეკონომისტი ხოსე მარია გაი დე ლივანა მიიჩნევს, რომ შექმნილ სიტუაციაში ფეხბურთელებმა ანგარიში უნდა გაუწიონ კლუბების ხელმძღვანელებს, რომლებსაც ისედაც სოლიდური ფინანსური ზარალი ელოდებათ: „შექმნილი მდგომარეობიდან გამომდინარე, ფეხბურთელები ნებაყოფლობით უნდა წავიდნენ ხელფასების შემცირებაზე. ასეთ სიტუაციაში, ყველა ვალდებულია, ერთმანეთს დახმარების ხელი გაუწოდოს. კლუბები ფინანსურად ისედაც საკმაოდ მაგრად დაზარალდნენ. ჯერჯერობით, სიტუაცია კვლავ ძალიან რთულია, თუმცა არა კრიტიკული. ორ კვირაში მდგომარეობა თუ არ  გაუმჯობესდება, მაშინ ყველას მოგვიწევს გარკვეული მსხვერპლის გაღება“ - განაცხადა ესპანელმა ეკონომისტმა გამოცემა AS-თან საუბარში.

მოკლედ უახლოესი კვირები ევროპისთვის შეიძლება გადამწყვეტი აღმოჩნდეს. თუ სიტუაცია უკეთესობისკენ შეიცვალა, საფეხბურთო სეზონის გადარჩენა ჯერ კიდევ შესაძლებელია, სხვა შემთხვევაში, ევროპული ფეხბურთისთვის შედეგები შეიძლება კატასტროფულიც კი იყოს - სულაც არ არის ფანტასტიკის სფერო, რომ ბევრი კლუბი შეიძლება საერთოდ გაკოტრდეს!

827
მკითხველის კომენტარები / 0 /
მსგავსი ამბები
რუბრიკის სხვა სიახლეები
;