ფეხბურთი ტრავმები და დიდი ფული: მესი 103, აგუერო 67, ნეიმარი 52, რონალდო 48 და სხვები

ფაქტია, თანამედროვე ფეხბურთში ძალიან ხშირია ტრავმები. ამისგან დაზღვეული არავინ არის. სანამ ჩვენს მსჯელობას გავაგრძელებდეთ, ვნახოთ, რამდენად ხშირად იღებენ ტრავმებს მსოფლიო ფეხბურთის გამორჩეული ვარსკვლავები...

* ლუის სუარესი, 32 წლის, 666 მატჩი კარიერაში, ტრავმების გამო გამოტოვა 16 მატჩი

* რობერტ ლევანდოვსკი, 30 წლის, 625 მატჩი კარიერაში. ტრავმების გამო გამოტოვა 16 მატჩი

* მოჰამედ სალაჰი, 26 წლის, 420 მატჩი კარიერაში, ტრავმების გამო გამოტოვა 12 მატჩი

* ედენ აზარი, 28 წლის, 630 მატჩი კარიერაში, ტრავმების გამო გამოტოვა 19 მატჩი

* რაჰიმ სტერლინგი, 24 წლის, 383 მატჩი კარიერაში, ტრავმების გამო გამოტოვა 13 მატჩი

* კრიშტიანო რონალდო, 34 წლის, 963 მატჩი კარიერაში, ტრავმების გამო გამოტოვა 48 მატჩი

* კილიან მბაპე, 20 წლის, 167 მატჩი კარიერაში, ტრავმების გამო გამოტოვა 13 მატჩი

* ჰარი კეინი, 25 წლის, 391 მატჩი კარიერაში, ტრავმების გამო გამოტოვა 38 მატჩი

* სერხიო აგუერო, 30 წლის, 687 მატჩი კარიერაში, ტრავმების გამო გამოტოვა 67 მატჩი

* ნეიმარი, 27 წლის, 491 მატჩი კარიერაში, ტრავმების გამო გამოტოვა 52 მატჩი

* ლიონელ მესი, 31 წლის, 809 მატჩი კარიერაში, ტრავმების გამო გამოტოვა 103 მატჩი

ვფიქრობთ, საქმე გვაქვს მეტად საინტერესო სტატისტიკასთან, რომელიც ჩვენს მკითხველს ბევრ რამეზე ჩააფიქრებს.

სიის სათავეში ლუის სუარესი დგას. თუ დავაკვირდებით, ვნახავთ, რომ სუარესის კარიერაში იყო არცთუ ისე ბევრი ტრავმა. 2013/14 წლების სეზონში ურუგვაელი ფეხბურთელი რეგულარულად იღებდა ტრავმებს. 2017 წლის აგვისტოდან კი გაცილებით ნაკლებად.

აღდგენის ტემპებით სუარესი ერთ-ერთი საუკეთესოა მსოფლიოში. 2014 წლის მაისში ის ჟურნალისტებმა ინდივიდუალურ სავარძელში დააფიქსირეს მენისკის ოპერაციის შემდეგ. 20 ივნისს კი სუარესის შესანიშნავი თამაშის შემდეგ ურუგვაიმ ბრაზილიური მუნდიალიდან ინგლისი გამოთიშა.

საყოველთაოდ ცნობილი ექიმი ადრიან უილსონი ამბობდა: „მე, როგორც ექიმს, შოკში მაგდებს ასე სწრაფად მორჩენილი ტრავმა. მე ეს შეუძლებლად მიმაჩნია. ვიცი, რომ მწვრთნელები ამას სხვა თვალით უყურებენ და ეს მათ ძალიან ახარებთ, მაგრამ მე, ჩემი პროფესიიდან გამომდინარე, სხვანაირად ვფიქრობ“, - აცხადებდა მაშინ ის.

„ლივერპულში“ ჩატარებული ბოლო, ფენომენალური სეზონის განმავლობაში სუარესს სისტემატურად აწუხებდა მუხლი, მაგრამ გუნდის ინტერესებიდან გამომდინარე, ურუგვაელი არა და არ დაწვა საოპერაციო მაგიდაზე. ვინ იცის, იქნებ ესეც იყო მიზეზი, რომ ბოლო სეზონებში სამხრეთამერიკელი ძალიან ხშირად ტრავმიანობდა?

ტრავმების გარეშე მართლაც არ გამოდის. „ლივერპულის“ კაპიტანი ჯორდან ჰენდერსონი ძალიან საინტერესო ისტორიას ჰყვება: „ერთ-ერთი შეხვედრის წინ ლუის სუარესს ფეხი ისე გაუსივდა, თავისი ბუცი ვერაფრით მოირგო. მან მოითხოვა დიდი ზომის ბუცი, გავიდა მინდორზე და საჯარიმო დარტყმით მოწინააღმდეგის კარში ულამაზესი გოლი შეაგდო. ის მართლაც განსაკუთრებული ფეხბურთელია. მე ის ექიმებთან არასოდეს მინახავს“.

მეორე ადგილზეა რობერტ ლევანდოვსკი, რაც ასევე არ არის გასაკვირი. ის ძალიან იშვიათად იღებს ტრავმებს. პოლონელი მეგოლე დიეტისა და კარგი გამოძინების ფანატია. მაგალითად, ერთ-ერთი დაზიანება მან სარწეველადან გადმოსვლის შემდეგ მიიღო. ამის შემდეგ ის იმ სარწეველაში არასოდეს ჯდება...
მოჰამედ სალაჰი ადრე ძალიან ხშირად იღებდა ტრავმას, მაგრამ მისი ჯანმრთელობა მას შემდეგ გაკაჟდა, რაც სათამაშოდ ინგლისს მიაშურა. „ლივერპულში“ მისვლის შემდეგ ეგვიპტელ ვარსკვლავს არასოდეს მიუღია საფეხბურთო თვალსაზრისით კლასიკური ტრავმა. რომ არა სერხიო რამოსთან დაკავშირებული გახმაურებული ეპიზოდი, ჩვენ თავისუფლად შეგვეძლო დაგვეწერა, რომ „ლივერპულში“ სალაჰს ტრავმა საერთოდ არ მიუღია.

ანტუან გრიზმანი კი საფეხბურთო სამყაროში უნიკალური პიროვნებაა. მადრიდის „ატლეტიკოს“ ფრანგმა ვარსკვლავმა ტრავმის გამო მხოლოდ... ერთი მატჩი გამოტოვა კარიერაში. რა თქმა უნდა, ეს არის უნიკალური მაჩვენებელი. ალბათ, მხოლოდ ფრანგმა შემტევმა იცის, თუ რაშია მისი ჯანმრთელობის საიდუმლო.
შემთხვევითი არ არის, რომ საფეხბურთო საზოგადოება უფრო და უფრო ხშირად ლაპარაკობს იმის თაობაზე, რომ გადატვირთული გრაფიკი ფეხბურთელებს საშუალებას არ აძლევს, მთელი დატვირთვით ჩაატარონ სეზონი. ეს თანამედროვე ფეხბურთში ერთ-ერთი მთავარი პრობლემაა.

რა თქმა უნდა, ყველა ფეხბურთელს ურჩევნია, სეზონის განმავლობაში ოდნავ მაინც შეიმციროს დატვირთვა, მაგრამ თანამედროვე პირობები ამის საშუალებას ნაკლებად იძლევა. სატელევიზიო კონტრაქტები და დიდი ფული, რომელიც ფეხბურთშია დაბანდებული, რეალობას სულ სხვანაირს ხდის.

ფაქტია, ამ კუთხით ცვლილებებია საჭირო. როცა კვირაში ორი და ხანდახან სამი თამაში გიწევს, ასეთი დატვირთვის ატანა პრაქტიკულად შეუძლებელია. ამას ყველა ხვდება, მაგრამ თანამედროვე ფეხბურთში მთავარი ხომ ფულია. სამწუხაროდ, ფული წერს საფეხბურთო კანონებს.

ყოველდღიური სპორტული გაზეთი "ლელო"
2188
მკითხველის კომენტარები / 0 /
მსგავსი ამბები
რუბრიკის სხვა სიახლეები
;