ფეხბურთი შინ აღარ დაბრუნდება! - ინგლისელების გამოხმაურებები

ინგლისის ნაკრებმა მსოფლიოს ჩემპიონატზე ასპარეზობა დაასრულა. რა თქმა უნდა, ამ ამბავს ვრცლად გამოეხმაურა ბრიტანული მედია.

"ფეხბურთი შინ აღარ დაბრუნდება" - ასეთ სათაურებს ხშირად შეხვდებით ინგლისურ გაზეთებში, იმის საპასუხოდ, რაც ნახევარფინალის წინ იწერებოდა:

"ფეხბურთი შინ ბრუნდება" - წერდნენ ინგლისელები ხორვატიასთან მატჩამდე იმ იმედით, რომ მათი საყვარელი გუნდი არათუ ნახევარფინალურ ბარიერს დაძლევდა, თვით ფიფას თასსაც კი ჩააბრძანებდა ნისლიან ალბიონზე...

...გარდა ამისა, ყოვლისმცოდნე ინგლისელმა ჟურნალისტებმა რამდენიმე საინტერესო დეტალი მოჩხრიკეს, რომლის გაცნობაც საინტერესო უნდა იყოს ქართველი გულშემატკივრებისთვისაც. ინგლისში ფეხბურთი განსაკუთრებული რამაა და იქაურ მედიას არაფერი გამორჩება.

ძალიან საინტერესო კადრი გადაიღეს ინგლისელმა ფოტორეპორტიორებმა - ხორვატიასთან მატჩის დასრულების შემდეგ, როცა სტადიონის ტრიბუნები დაცარიელდა, გარეთ საუთგეიტი თავის მეუღლეს ჩაეხუტა. ჟურნალისტებმა ისიც გამოარკვიეს, რა უთხრა ქალმა დაღონებულ და იმედგაცრუებულ ქმარს. "ჩემო გმირო" - უთქვამს თანამეცხედრეს გარეთისთვის.

ცნობილი ინგლისელი საფეხბურთო მიმომხილველი მარტინ სემუელი საქებარ სიტყვებს არ იშურებს ინგლისის ნაკრების მიმართ. ლეგენდარული ფორვარდი ალან შირერიც კმაყოფილია ამ გუნდის ასპარეზობით და ამბობს, რომ "სამ ლომს" დიდი მომავალი აქვს.

"ინგლისს შეუძლია, იტიროს", - თქვა ჟოზე მოურინიომ, თუმცა პორტუგალიელს არც იმის აღნიშვნა დავიწყნია, რომ ხორვატიის ნაკრების წარმატებაც აბსოლუტურად კანონზომიერი იყო.

მოურინიოს შეგირდი მარკუს რაშფორდი ინგლისელ გულშემატკივარს ჰპირდება, რომ მომავალ მსოფლიოს ჩემპიონატზე ინგლისის ნაკრები უფრო ძლიერი გუნდი იქნება. "მადლობა, ბოს!" - ასე იწყებს ის ინტერვიუს და ამბობს, რომ საუთგეიტმა გუნდის წარმატებისთვის უდიდესი მოცულობის სამუშაო გასწია.

შედარებით "ყვითელი" გაზეთები ინგლისელ ფანებზე აკეთებენ აქცენტს. მაგალითად, თუ როგორ გრილდება ალკოჰოლით შეწუხებული ინგლისელი მოსკოვის ერთ-ერთ შადრევანში და როგორ აბობღებულა მავანი ბრიტანელი ერთ-ერთ... შუქნიშანზე.

ასევე ცნობილი ხდება, რომ მას შემდეგაც კი, რაც ინგლისმა მსოფლიოს ჩემპიონატზე ასპარეზობა დაასრულა, საუთგეიტმა არაერთი სამადლობელი წერილი მიიღო ინგლისელი ფანებისგან და ეს პროცესი კიდევ გრძელდება.

რუნი: ინგლისს აქვს დიდი მომავალი

ინგლისის ნაკრების სამუნდიალო გამოსვლა "სამი ლომის" ყოფილმა ფორვარდმა უეინ რუნიმაც შეაფასა. "სიმართლე გითხრათ, განადგურებული ვარ. ბიჭებმა ძალიან კარგად ითამაშეს, მაგრამ მარცხი ფეხბურთის ნაწილია. ინგლისს ჰყავს შესანიშნავი ფეხბურთელები და ამ გუნდს დიდი მომავალი აქვს", - აღნიშნა რუნიმ.

რაკიტიჩი: 39 გრადუსი მქონდა...

ხორვატიის ნაკრების ერთ-ერთმა ლიდერმა ივან რაკიტიჩმა განაცხადა, რომ ინგლისთან თამაშის წინა დღე მთლიანად საწოლში გაატარა, რადგან ტემპერატურამ 39 გრადუსამდე აუწია. "თამაშის წინა დღეს სულ ვიწექი. ბედნიერი ვარ იმის გამო, რომ ნახევარფინალურ მატჩში ყველაფერი კარგად გამოვიდა. რა იქნება ფინალში? სულერთია, როგორ ვიქნები - იქ ცალი ფეხითაც კი ვითამაშებ", - თქვა რაკიტიჩმა.

ყოველდღიური სპორტული გაზეთი "ლელო"
987
მკითხველის კომენტარები / 0 /
;