ფეხბურთში ასეც ხდება, ეს ჩვეულებრივი ამბავია... სლუცკიმ ახსნა, თუ რატომ აღარ არის დავითაშვილი ძირითად შემადგენლობაში. რუბინის დირექტორი: კვარაცხელია წარმოუდგენლად ნიჭიერია!..

ყაზანის "რუბინმა" სეზონის განახლების შემდეგ ორი მატჩი ჩაატარა და ორივე შემთხვევაში, სამწუხაროდ, საქართველოს ნაკრების შემტევი ნახევარმცველი ზურიკო დავითაშვილი მოედანზე შეცვლელად შევიდა...

რუსეთის პრემიერლიგის XXIII ტურის შეხვედრაში 19 წლის ქართველმა, კონკურენტ ეკატერინბურგის "ურალთან" მოგებულ (2:1) შეხვედრაში, 67-ე წუთზე მეორე გოლის ავტორი სოლტმურად ბაკაევი შეცვალა. მატჩის შემდეგ "რუბინის" მთავარ მწვრთნელ ლეონიდ სლუცკი ძირითად შემადგენლობაში ზურიკო დავითაშვილის არდაყენების შესახებაც ჰკითხეს:

"უკავშირდება თუ არა ბაკაევის ძირითადში მოხვედრა დავითაშვილთან შედარებით მის უკეთეს ფიზიკურ მდგომარეობას? ბაკაევმა მთელი მოსამზადებელი ეტაპი ძალიან კარგად წარმართა და ძირითად შემადგენლობაში ადგილი დაიმსახურა", - ასეთი იყო სლუცკის პასუხი.

შემდეგ ტურშიც იგივე მოხდა. ყაზანელებმა მოსკოვის "ლოკომოტივთან" 0:2 წააგეს და ქართველი ლეგიონერი "რუბინის" ძირითად შემადგენლობაში ვერც ამჯერადაც მოხვდა, მოედანზე კი 62-ე წუთზე გამოჩნდა.

ჟურნალისტები კვლავ დაინტერესდნენ, რა ხდება დავითაშვილის თავს და რამ გამოიწვია ზედიზედ მეორედ შემადგენლობაში მისი არყოფნა, რაზეც "რუბინის" თავკაცმა ამჯერად ასე უპასუხა:

"მე იმ ფეხბურთელებს ვათამაშებ, რომლებიც უკეთ არიან მომზადებულები და ვარჯიშებზე უკეთ გამოიყურებიან. დავითაშვილზეც იმავეს ვიტყვი. ის ბოლო ორ თამაშს სათადარიგოთა სკამზე იმიტომ იწყებს, რომ გუნდში კონკურენციაა. ფლანგებზე ოთხი მოთამაშე გვყავს. ბოლო მატჩში კვარაცხელიამ და ბაკაევმა გაიტანეს და კარგი ფეხბურთი აჩვენეს. ფეხბურთში ასეც ხდება - შესაძლოა, შეცვლაზე ითამაშო. ეს ჩვეულებრივი ამბავია".

ჩვენთვის დავითაშვილის უთამაშებლობა სანაკრებო კუთხით მნიშნელოვანი, რადგან ხელის გაწვდენაზეა სანაკრებო თამაშები და გიორგი ჩაკვეტაძესთან ერთად, სწორედ ის და ხვიჩა კვარაცხელია უნდა გახდნენ ის "ქინდერ სიურპრიზები", რომელთაც ბელარუსის ნაკრებთან მნიშვნელოვანი როლი უნდა ითამაშონ.

* * *

ამასობაში, ყაზანელთა სპორტულმა დირექტორმა ოლეგ იაროვინსკიმ ხვიჩა კვარაცხელიას რუსეთის ჩემპიონატის "გამორჩეული ტალანტი" უწოდა. როგორც ცნობილია, საქართველოს ნაკრების თავდამსხმელი რუსეთის პრემიერლიგის XXIII ტურში მატჩის გმირი გახდა და საუკეთესოდაც აღიარეს.

მართალია, შემდეგ შეხვედრაში მისთვის პრინციპულ მეტოქე (სადაც დაიწყო მისი რუსული კარიერა და ამ სეზონის დასაწყისში გოლიც გაუტანა) მოსკოვის "ლოკომოტივთან" თავი ვერ გამოიჩინა, მაგრამ იაროვინსკი ქართველის პოტენციალში დარწმუნებულია.

"იმ ფეხბურთელებს, რომლებიც უკვე დიდ ევროპულ გუნდებში თამაშობენ, ჩვენ ხვიჩას ვადარებთ, რომელიც ჯერ კიდევ "რუბინშია". ხუთი წლის შემდეგ ამ თემას ხელახლა სიამოვნებით განვიხილავ. მაგრამ ახლა ეს კორექტული არ იქნება. ის წარმოუდგენლად ნიჭიერია. სანამ, მადლობა ღმერთს, "რუბინში" თამაშობს, ასეთივე ტემპით უნდა განვითარდეს", - განაცხადა იაროვინსკიმ "ბიზნეს ონლაინთან" ინტერვიუში.

შეგახსენებთ, მოსკოვის "ლოკომოტივის" ყოფილმა მწვრთნელმა იური სიომინმა თავის დროზე არაერთხელ თქვა, რომ "რკინიგზელთა" ხელმძღვანელობა ძალიან შეცდა, როცა კვარაცხელია ვერ შეინარჩუნა...

1449
მკითხველის კომენტარები / 0 /
მსგავსი ამბები
რუბრიკის სხვა სიახლეები
;