ფიასკო მოჭადრაკე ქალთა მსოფლიოს ჩემპიონატზე

მოჭადრაკე ქალთა მსოფლიოს ჩემპიონატზე, რომელიც რუსულ ხანტი-მანსიისკში მიმდინარეობს ნოკაუტსისტემით, ჯერ მხოლოდ ორი ეტაპის პაექრობები მიილია, მაგრამ შეჯიბრებას ხუთი ქართველიდან ვერცერთი ვერ შემორჩა.

ნანა ძაგნიძის, ლელა ჯავახიშვილის, ნინო ბაციაშვილისა და სოფიკო ხუხაშვილის მარცხზე უკვე ვწერდით. ბელა ხოტენაშვილისა და მსოფლიოს ბრინჯაოს პრიზიორ ჰარიკა დრონავალის (ინდოეთი) ორთაბრძოლის ორი კლასიკური პარტია ყაიმით დასრულდა. მათ შორის უძლიერესი გუშინ ტაიბრეიკს უნდა გამოევლინა. პირველი 25-წუთიანი შეხვედრაც, თითოეულ სვლაზე 10-10 წამის დამატებით, უშედეგო გამოდგა, განმეორებით პაექრობაში ინდოელმა გაიმარჯვა და მესამე წრეში გავიდა. ფაქტობრივად, მან შარშანდელი ჩემპიონატის შედეგი გაიმეორა - 2017-შიც ორი ქართველი დაამარცხა - სოფიკო გურამიშვილი და ნანა ძაგნიძე.

გუშინ ტაიბრეიკებით მერვედფინალის კიდევ შვიდი მონაწილის ვინაობა გახდა ცნობილი: 19 წლის გულრუხბეგიმ ტოხირჟონოვამ (უზბეკეთი) 25-წუთიან პარტიებში 2017 წლის მსოფლიოს ჩემპიონატის გამარჯვებულ თან ჩჟუნის (ჩინეთი) 1.5:0.5 აჯობა და მერვედფინალში თამაშის უფლება მოიპოვა. 16 წლის ჩინელმა ჩჟუ ძინერმა, რომელმაც პირველ წრეში ლელა ჯავახიშვილს სძლია, გუშინ გამოცდილ რუს დიდოსტატ ნატალია პოგონინასთან დაძაბულ ბრძოლაში 1:3 წააგო. დანარჩენი შეხვედრები ასე დასრულდა: ანტოანეტა სტეფანოვა (ბულგარეთი) - დინარა სადუაკასოვა (ყაზახეთი) 2.5:1.5, ალექსანდრა კოსტენიუკი (რუსეთი) - ნი შიძიუნი (ჩინეთი) 3:1, ჟანსაია აბდუმალიკი (ყაზახეთი) - ჩჟაო სიუე (ჩინეთი) 3:1, მარია მუზიჩუკი (უკრაინა) - ეკატერინა ატალიკი (თურქეთი) 2.5:1.5, კატერინა ლაგნო (რუსეთი) - ჰოან თან ჩანგი (უნგრეთი) 3:1. ამდენად, გუშინ ჩემპიონატი ერთბაშად ოთხმა ჩინელმა დატოვა, სამი კი მედლებისთვის ბრძოლას განაგრძობს. მესამე წრეში ჩემპიონატს ათიდან ხუთი რუსი დიდოსტატი შემორჩა. უკრაინის სპორტის ღირსებას დები - ანა და მარია მუჟიჩუკები დაიცავენ.
III ტური

ცზიუი ვენძიუნი (ჩინეთი)- მო ცჟაი (ჩინეთი), გულრუხბეგიმ ტოხირჟონოვა (უზბეკეთი) - ვალენტინა გუნინა (რუსეთი), ანა მუზიჩუკი (უკრაინა) - ანტოანეტა სტეფანოვა (ბულგარეთი), ალექსანდრა კოსტენიუკი (რუსეთი) - ჰარიკა დრონავალი (ინდოეთი), იოლანტა ზავადსკა (პოლონეთი) - ჟანსაია აბდუმალიკი (ყაზახეთი), მარია მუზიჩუკი (უკრაინა) - მობინა ალინასაბი (ირანი), კატერინა ლაგნო (რუსეთი) - ნატალია პოგონინა (რუსეთი), ალისა გალიამოვა (რუსეთი) - ტინძი ლეი (ჩინეთი).

ყოველდღიური სპორტული გაზეთი "ლელო"
216
მკითხველის კომენტარები / 0 /