ფიბა-ევროპის თასი: როცა სუფრას სამქულიანი მარილიც არ აკლია

თბილისის "დინამომ" ფიბა-ევროპის თასზე მე-6 ტურის შეხვედრა გამართა. მისი მეტოქე "ისტანბული" იყო, რომელმაც საბოლოოდ დამაჯერებელი ანგარიშით 97:70 გაიმარჯვა. ეს იყო ჩვენი გუნდის ბოლო მატჩი მიმდინარე ევროსეზონში. დინამოელებმა ჯგუფიდან გასვლა ვერ მოახერხეს.

დინამო
70
ისტანბული
79

23:30, 19:23, 20:25, 8:19
დინამო: შარაბიძე (2ქ), ბოიდი (9ქ), გრძელიძე (11ქ), ლონდარიძე (2ქ), ტურპინი (13ქ, 5მ), ფაცაცია (6ქ, 3პ), გაჩეშა (18ქ, 6მ), ბერიშვილი (7ქ), გოგოძე (2ქ, 5პ).
ისტანბული: აკდამარი (3ქ), აიჩა, ტულსონი (17ქ), ჩევიკი, ოლმაზი (5ქ), ბირჩევიჩი (15ქ, 5მ), კარლი 2ქ), ტომპსონი (15ქ, 5პ), ბაქნერი (11ქ, 6მ), კლობუჩარი (3ქ, 4პ), ბუვა (22ქ, 10მ, 5პ), დოკუიანი (4ქ, 7პ).

- როგორც ამ შეხვედრიდან, ისე საერთოდ, ფიბა-ევროპის თასზე გამოსვლიდან თუ სწორ დასკვნებს გამოვიტანთ, ჩვენი კალათბურთისთვის ძალიან სასარგებლო იქნება. თუ სათანადო დასკვნები ვერ გამოვიტანეთ, გამოდის, რომ ტყუილად გვითამაშია ევროსარბიელზე. მჯერა, რომ ამ მატჩებით ჩვენც, გულშემატკივრებიც და კალათბურთელებიც ბევრს ვისწავლით და სამომავლოდ ძალიან წაგვადგება, - ასეთი იყო "დინამოს" მთავარი მწვრთნელის ირაკლი ხოშტარიას საევროთასო ბოლოსიტყვაობა.

მაინც, რა დასკვნებზეა ლაპარაკი? აუცილებლად მოგახსენებთ, ოღონდ მანამდე თამაშის ზოგად სურათს გადავავლოთ თვალი.

***

პირველი მეოთხედი თანაბარ ბრძოლაში წარიმართა, კარგი დაცვის წყალობით დინამოელები მეორე ათწუთეულის დასაწყისშიც არაფერს უთმობდნენ მეტოქეს, თუმცა მას მერე, რაც ლევან ფაცაციამ სამქულიანი ჩააგდო და ანგარიში გაათანაბრა (32:32) "ისტანბულის" კალათბურთელებმა 13:2 გაქცევა მოაწყვეს, კომფორტული უპირატესობა დაიბევეს და საბოლოოდ რა ანგარიშითაც გაიმარჯვეს, უკვე მოგახსენეთ.

ქართველთა სნაიპერი 18 ქულით ნიკოლა გაჩეშა გახდა, რომელმაც 18 ქულა ჩააგდო, 13 ქულა ჰქონდა კაელ ტურპინს, 11 - ახალგაზრდა ლევან გრძელიძეს...

მატჩის ყველაზე სასარგებლო კალათბურთელი "ისტანბულის" ხორვატი წინახაზელი ივან ბუვა გახლდათ, რომელმაც ორმაგი დუბლი შეასრულა - 22 ქულა, 10 მოხსნა, 5 პასი.

***

ახლა, რაც შეეხება დასკვნებს. ფიბა-ევროპის თასზე გამოსვლამ დაგვანახა, რომ ევროპასთან მისასვლელად მხოლოდ კარგი ნაკრები და კლუბის სურვილი არ კმარა. საჭიროა არა კატასტროფულად დიდი, მაგრამ "დინამოზე" დიდი ბიუჯეტი...

ექვსმა ევროპულმა მატჩმა კიდევ უამრავი გაკვეთილი მოგვცა, რაზეც ცაკლე, ვრცელი პუბლიკაციაა საჭირო. აქ კი კონკრეტულად "ისტანბულთან" მატჩის მაგალითზე შეიძლება მარტივად წარმოვიდგინოთ, როგორ იქმნება საშუალო ევროპული დონის გუნდი.

***

როცა გუნდს აშენებ, გამთამაშებელი გჭირდება. კარგი გამთამაშებელი საქმის ნახევარი რომ არის, მაიკლ დიქსონის მაგალითზეც დავინახეთ. სტამბოლელებს ჰყავთ ტომპსონი, ტანდაბალი, მაგრამ მრავალმხრივი პლეიმეიქერი, რომელსაც პერიმეტრიდან ტყორცნაც შეუძლია, ფარქვეშ ელვისებურად შეჭრაც და პასებით თანაგუნდელთა მომარაგებაც.

თუმცა ტომპსონი მაინც ამერიკელია და საჭიროა, გყავდეს კლასიკურ სტილში მოთამაშე მეორე გამთამაშებელი, რომელიც ნებისმიერ სათამაშო ეპიზოდში ისე მოიქცევა, როგორც მწვრთნელს სჭირდება. ასეთებს ბალკანეთში თუ იპოვი, ჰოდა, თურქებს სლოვენიელი კლობუჩარი ჰყავდათ. არც ერთია ექსტრა-კლასის გამთამაშებელი და არც მეორე, მაგრამ "ისტანბულს" ჯგუფიდან გასასვლელად კი ეყო.

სუფრაზე ხაშლამას რომ მოიტანენ და მარილი არსად ჩანს, სწორედ ასეთი უგემურია გუნდი კარგი პერიმეტრიდან მტყორცნელის გარეშე. ასეთი კალათბურთელი "დინამოს" ნამდვილად ჰყავს - მიხეილ ბერიშვილი, მაგრამ მიშას კიდევ უამრავი რამ ევალება.

რატომღაც მომეჩვენა, რომ "ისტანბულს" ტულსონი უპირველესად სწორედ სამქულიანებისთვის სჭირდებოდა. მან 7-დან 5 სამიანი გამოიყენა, რაც 15 ქულაა. როცა სხვა კომპონენტებშიც კარგი რესურსი გაქვს, 15-ქულიანი უკანახაზელი, შეიძლება თამაშის მოგების გარანტადაც იქცეს.

გუნდს რომ კრებ, ტაქტიკურად განსწავლული მეფარე კარგ გამთამაშებელზე არანაკლებ სასარგებლოა. "ისტანბულში" თან განსწავლული, თან მაღალი კლასის ცენტრები ენაცვლებოდნენ ერთმანეთს - ბუვა და ბირჩევიჩი, უფრო სწრაფი სტილის თამაშისთვის ამერიკელი ბაქნერიც ჰყავდათ...

ასე და ამგვარად, მივიღეთ მეტად თანაბრად დაბალანსებული კარგი გუნდი, რომელსაც არც მარილი აკლია და... არც ფული.

შეიძლება, სხვის სარდელს ჩვენი ყველი და პური გვერჩივნოს, მაგრამ რეალობას ვერსად გავექცევით: კარგი უცხოელი არ ჩამოვა, თუ ბარაქიანი სუფრა არ გაუშალე...

გუნდი თ მ წ ქ
1. კლუჟი 6 5 1 11
2. იატანბული 6 5 1 11
3. აკადემიკი 6 2 4 8
4. დინამო 6 0 6 6

ყოველდღიური სპორტული გაზეთი "ლელო"
846
მკითხველის კომენტარები / 0 /
მსგავსი ამბები
რუბრიკის სხვა სიახლეები