ფიბა-ს ოფიციალური საიტის საგანგებო პუბლიკაცია საქართველო-გერმანიის მატჩს

ფიბა-ს ოფიციალურმა საიტმა საგანგებო პუბლიკაცია მიუძღვნა საქართველო-გერმანიის მატჩს, რომელშიც დარბაზი ბოლომდე გაივსო.

დარწმუნებული ბრძანდებოდეთ, ფიბა-ს ჩინოსნები გახარებულები არიან - ევროლიგელი ლეგიონერები ვერ ჩამოდიან, მაგრამ დარბაზები მაინც ივსებაო.

თუმცა იმაშიც დარწმუნებული უნდა ვიყოთ, რომ ფიბა-ს შეფებს ქართველთა განწყობა საერთოდ არ აინტერესებს. სწორედ მათი და ევროლიგის სიჯიუტის გამო წავაგეთ გერმანიასთან... სწორედ მათი ევროლიგასთან დაპირისპირების გამო ვერ ჩამოდიან თორნიკე შენგელია და გიორგი შერმადინი...

სწორედ მათი ჯიქური შერკინების გამო, შეიძლება, ვერ გავიდეთ მსოფლიოს ჩემპიონატზე... საქართველოში კალათბურთი უყვართ და დარბაზი ყოველთვის გაივსება, მაგრამ ეს იმას არ ნიშნავს, რომ ფიბა-ს გადაწყვეტილებით (კალენდრის შეცვლასთან დაკავშირებით) აღფრთოვანებულები ვართ.

ახლა, რაც შეეხება ფიბა-ს პუბლიკაციას.

მოგეხსენებათ, მუნდიალზე მოსახვედრად ყველა კონტინენტზე მიმდინარეობს საკვალიფიკაციო ტურნირები. ევროპის პარალელურად საკვალიფიკაციო მატჩები გაიმართა ამერიკაში, აზიაში, ავსტრალიასა და ოკეანეთში.

მსოფლიოს მასშტაბით თბილისური მატჩი სამეულში შევიდა. საქართველოსა და გერმანიის მატჩს ფიბა-ს ოფიციალური მონაცემებით 8 000 მაყურებელი დაესწრო, თუმცა ყველამ დაინახა, რომ სპორტის სასახლეში გაცილებით მეტი გულშემატკივარი იმყოფებოდა. ფიბას საიტზე გამოქვეყნებული სტატია, რომელსაც მთავარ ფოტოდ სავსე სპორტის სასახლე ერთვის, ასეა დასათაურებული:

"გულშემატკივრები საკუთარი ნაკრებების მხურვალე მხარდაჭერას მსოფლიო თასის საკვალიფიკაციო ეტაპის მეორე ფანჯრის მატჩებშიც აგრძელებენ."
კვირას, მანილას "აზია არენაზე", ფილიპინების იაპონიასთან გამარჯვების მოწმე გახდა 10 000-ზე მეტი ფანი.

8 000 ადამიანი შეიკრიბა თბილისის სპორტის სასახლეში G ჯგუფის საქართველო-გერმანიის მატჩზე, თუმცა გულშემატკივარმა მასპინძელი გუნდის გამარჯვება ვერ იზეიმა.

ქალაქ პერმის დარბაზმა კი 7 500 გულშემატკივარი შეკრიბა, რომელთა საქომაგო ობიექტმა ბოსნია-ჰერცეგოვინას სძლია.

მაყურებელთა აქტიურობამ ითამაშა ასევე მნიშვნელოვანი როლი ფინეთის ნაკრებისთვის, რომელმაც 5 300 მაყურებლის თვალწინ ბოლო პერიოდში გატეხა ბულგარეთის წინააღმდეგობა და გაიმარჯვა.

ამასობაში, ქალაქ ნანსის დარბაზში 5 700 მაყურებელი შეიკრიბა და საფრანგეთის ნაკრებმა მიყოლებით მეორე საშინაო გამარჯვება იზეიმა - ამჯერად ბელგიასთან.
ასევე სავსე იყო ქალაქ მონტერეის არენა, სადაც მექსიკამ პუერტო რიკოსთან 80:100 წააგო. შეივსო ბუენოს აირესის არენაც, რომელშიც ურუგვაიმ ისტორიული გამარჯვება მოიპოვა მასპინძელ არგენტინასთან.

კულმინაცია დაფიქსირდა ბრაზილიაში, სადაც ქალაქ ჟოანიუს არენაზე 10 500-ზე მეტი მაყურებელი მივიდა ჩილეს ნაკრებთან მატჩზე დასასწრებად, რომელიც ბრაზილიელებმა მოიგეს და დაუმარცხებლად ლიდერობენ თავის ქვეჯგუფში.

ყოველდღიური სპორტული გაზეთი "ლელო"
1473
მკითხველის კომენტარები / 0 /
მსგავსი ამბები
რუბრიკის სხვა სიახლეები
;