ფიგურული ციგურაობა: მედლები, ამჯერად სოფიიდან

ბულგარეთის დედაქალაქ სოფიაში გაიმართა საერთაშორისო ტურნირი ფიგურულ ციგურაობაში "სტავისკი კაპ 2017", რომელშიც ბათუმის სპორტული ცენტრის მოციგურავეთა გუნდმა იასპარეზა.

ბულგარული ვოიაჟი წარმატებული გამოდგა ჩვენი სპორტსმენებისთვის. შეჯიბრება სხვხადასხვა ასაკის მოციგურავეებს შორის გაიმართა. ქართველმა მოციგურავეებმა მხოლოდ ვაჟთა და გოგონათა ერთეულთა თანრიგში იასპარეზეს.

ვაჟებს შორის ილია გოგიტიძემ მოკლე პროგრამა შეასრულა, 31,87 ქულა დაიმსახურა და მეორე ადგილი დაიკავა. პირველობა კი აქ არავის დაუთმო ფრანგმა ფრანსუა პიტომ - 35,47 ქულა.

უმცროსი ასაკის გოგონათა შორის შეჯიბრებაში წარმატებას მიაღწია ეკატერინე იაზადჟიმ, რომელიც თავისუფალი პროგრამით გამოვიდა და 41,52 ქულით მესამე ადგილი დაიკავა. 28 მონაწილეს შორის ის მხოლოდ რუს და თურქ მეტოქეებს ჩამორჩა. სესილი ბერძენიშვილის შეგირდი საკმაოდ პერსპექტიული გოგონაა და მისგან სამომავლოდ სერიოზულ შედეგებს უნდა ველოდოთ.

ახალგაზრდული ასაკის გოგონათა შორის წარმატებას მიაღწია ანა დეა გულბიანი შმიდტმა, რომელიც, როგორც მოკლე, ისე თავისუფალი პროგრამით, მესამე იყო. ჯამში, მან 96,77 ქულა დააგროვა და ტურნირის ბრინჯაოს მედალს დაეუფლა. მას მხოლოდ შვეიცარიისა და ბულგარეთის მოციგურავეებმა გაუსწრეს.

აღსანიშნავია, რომ სოფიის ტურნირი პრესტიჟული შეჯიბრებაა. მომავალ წელს, ამ ასაკის მოციგურავეთა შორის ევროპის ჩემპიონატს, სწორედ სოფია უმასპინძლებს.

ყოველდღიური სპორტული გაზეთი "ლელო"
2905
მკითხველის კომენტარები / 0 /
რუბრიკის სხვა სიახლეები
;