ფიგურული ციგურაობა: მედლები მინსკიდან და ბუქარესტიდან

ბელარუსის დედაქალაქ მინსკში გაიმართა საერთაშორისო ტურნირი ფიგურულ ციგურაობაში, სადაც სხვადასხვა ასაკის 20 ქვეყნის მოციგურავემ იასპარეზა.
საქართველოდან ტურნირში უფროსებს შორის მორის ყვითელაშვილი, იუნიორებს შორის კი, ირაკლი მაისურაძე გამოვიდა და ორივემ მეორე ადგილი დაიკავა.

მორის ყვითელაშვილმა მოკლე და თავისუფალი პროგრამების ჯამში 227,31 ქულა დააგროვა. პირველ ადგილზე გასულმა რუსმა სერგეი ვორონოვმა კი 250,10 ქულა დაიმსახურა. ისრაელის წარმომადგენელი დანიელ სამოხინი 219,75 ქულით მესამე იყო.

იუნიორთა შორის მაისურაძემ შესანიშნავად იასპარეზა როგორც მოკლე, ისე თავისუფალი პროგრამით და 199,12 ქულით ასევე მეორე ადგილი დაიკავა.

პარალელურად, რუმინეთის დედაქალაქ ბუქარესტში დასრულდა საერთაშორისო ტურნირი ფიგურულ ციგურაობაში "კრისტალ სკეიტი", რომელშიც სხვადასხვა ასაკის მოციგურავეები ასპარეზობდნენ.

საქართველოდან ტურნირში ბათუმის სპორტული ცენტრის აღსაზრდელებმა იასპარეზეს. თავის ასაკში - გოგონათა ერთეულთა თანრიგში ანადეა გულბიანი შმიდტმა პირველი ადგილი დაიკავა. ნატალია ლომინეიშვილი მესამე ადგილზე გავიდა. ინგა ფუტკარაძე მეოთხე ადგილს დასჯერდა. ვაჟთა შორის ერთეულებში ილია გოგიტიძემ ვერცხლის მედალი მოიგო.

ჩვენი სპორტსმენები რუმინეთიდან ბულგარეთის დედაქალაქ სოფიაში გადაინაცვლებენ, სადაც საერთაშორისო ტურნირზე "დენკოვა სტავისკი კაპზე" იასპარეზებენ.

ყოველდღიური სპორტული გაზეთი "ლელო"
2183
მკითხველის კომენტარები / 0 /
მსგავსი ამბები
რუბრიკის სხვა სიახლეები
;