ფიგურული ციგურაობა. ყვითელაშვილი და მაისურაძე - კვალიფიკაცია დაძლეულია

გუშინ რუსეთის დედაქალაქ მოსკოვში დაიწყო ევროპის ჩემპიონატი ფიგურულ ციგურაობაში. რომელშიც ვაჟთა ერთეულთა თანრიგში ორი ქართველი მოციგურავე მორის ყვითელაშვილი და ირაკლი მაისურაძე ასპარეზობენ.

ჩემპიონატის განრიგის თანახმად, პირველ დღეს ასპარეზობაში ვაჟები ჩაერთნენ. მათ მოკლე პროგრამა წარმოადგინეს. მორის ყვითელაშვილი ბოლოსწინა ჯგუფში მოხვდა და მსაჯებისგან 76,74 ქულა დაიმსახურა, რაც დაახლოებით ისეთივე შედეგია, როგორიც მან შარშან, ჰელსინკიში გამართულ მსოფლიოს სალიცენზიო ჩემპიონატზე აჩვენა.

ამ შედეგით ყვითელაშვილი მოკლე პროგრამის შემდეგ მე-7 ადგილზეა. აღსანიშნავია, რომ ტექნიკური ელემენტების შესრულებაში მან 42,38 ქულა მიიღო, რაც მეოთხე მაჩვენებელია. კომპონენტებში კი, სამწუხაროდ, ბევრს ჩამორჩება.

ირაკლი მასურაძე ასეთი მასშტაბური ტურნირის დებიუტანტია. მან მოკლე პროგრამაში 63,69 ქულა მიიღო და მე-18 ადგილზეა. შედეგად, ორივე ჩვენმა მოციგურავემ კვალიფიკაცია გაიარა და ხვალ თავისუფალი პროგრამით იასპარეზებენ.

ლიდერი კი, როგორც მოსალოდნელი იყო ესპანელი ხავიერ ფერნანდესია 103,82 ქულით. სავარაუდოდ, მას ოქროს მედალს ვერავინ შეეცილება. ვერცხლისა და ბრინჯაოს მედლისთვის კი ცხარე ბრძოლა გაჩაღდება.

აქ პრეტენდენტები რუსები დიმიტრი ალიევი და მიხაილ კოლიადა, აგრეთვე ლატვიელი დენის ვასილევსი არიან. უშანსოდ არც მორის ყვითელაშვილია, თუმცა მას მინიმუმ ათქულიანი ჩამორჩენის აღმოფხვრა მოუწევს.

მოკლე პროგრამა
1. ხავიერ ფერნანდესი (ესპანეთი) - 103,82 ქულა 2. დიმიტრი ალიევი (რუსეთი) - 91,33 3. დენის ვასილიევსი (ლატვია) - 85,11 4. მიხაილ კოლიადა (რუსეთი) - 83,41 5.

ჟორიკ ჰენდრიქსი (ბელგია) - 78,56 6. მატეო რიზო (იტალია) - 78,26 7. მორის ყვითელაშვილი (საქართველო) - 76,74... 18. ირაკლი მაისურაძე (საქართველო) - 63,69

ყოველდღიური სპორტული გაზეთი "ლელო"
639
მკითხველის კომენტარები / 0 /
მსგავსი ამბები
რუბრიკის სხვა სიახლეები