ფიდეს გრანპრი ოთხ ეტაპად - ძაგნიძე მეორე რაუდნიდან ჩაებმება

მოჭადრაკე ქალთა 2019-2020 წლების ფიდეს გრანპრი ოთხ ეტაპად გაიმართება: 2019 წლის 10-23 სექტემბერსა (სკოლკოვო, რუსეთი) და 2-15 დეკემბერს (მონაკო), ხოლო 2020 წლის 1-14 მარტსა (ლოზანა, შვეიცარია) და 2-15 მაისს (სარდინია, იტალია).

მთავარი პრიზის მოსაპოვებლად 16 დიდოსტატი იბრძოლებს. მათგან ერთ-ერთი გახლავთ ევროპის ექსჩემპიონი ნანა ძაგნიძე. იგი მეტოქეობას გაუწევს ისეთ ტიტულოვან მოჭადრაკეებს, როგორებიც არიან მსოფლიოს მოქმედი ჩემპიონი ცზიუ ვენძიუნი (ჩინეთი), მსოფლიოს და ევროპის ექსჩემპიონები - ალექსანდრა კოსტენიუკი (რუსეთი) და ანტოანეტა სტეფანოვა (ბულგარეთი),

მსოფლიოს ექსჩემპიონი მარია მუზიჩუკი (უკრაინა), ევროპის სამგზის ჩემპიონი ვალენტინა გუნინა (რუსეთი), ევროპის ორგზის ჩემპიონები - კატერინა ლაგნო (რუსეთი) და პია კრამლინგი (შვედეთი), პრეტენდენტთა აღორძინებული ტურნირის გამარჯვებული ალექსანდრა გორიაჩკინა (რუსეთი), ასევე, ანა მუზიჩუკი (უკრაინა), ჰარიკა დრონავალი და ჰამპი კონერუ (ორივე - ინდოეთი), ელიზაბეტ პეტცი (გერმანია), ალინა კაშლინსკაია (რუსეთი), მარი სებაგი (საფრანგეთი) და ჩჟაო სიუე (ჩინეთი).

თითოეული მოჭადრაკე სამ-სამ ეტაპში იასპარეზებს და გამარჯვებულიც ამ ტურებში მოპოვებული ქულების ჯამით გამოვლინდება. პირველი რაუნდი დღეს სკოლკოვოში იწყება, სადაც ნანა ძაგნიძე, დები მუზიჩუკები და ჩჟაო სიუე არ ითამაშებენ. დანარჩენი 12 მონაწილე კი სტარტზე ასე დაწყვილდა:

პია კრამლინგი - ცზიუი ვენძიუნი, ანტოანეტა სტეფანოვა - ალექსანდრა გორიაჩკინა, ელიზაბეტ პეტცი - ალექსანდრა კოსტენიუკი, ვალენტინა გუნინა - ალინა კაშლინსკაია, კატერინა ლაგნო - მარი სებაგი, ჰამპი კონერუ - ჰარიკა დრონავალი. პაექრობები წრიული სისტემით 11 ტურად გაიმართება. 17 სექტემბერი დასვენების დღეა. 

ყოველდღიური სპორტული გაზეთი "ლელო"
110
მკითხველის კომენტარები / 0 /
მსგავსი ამბები
რუბრიკის სხვა სიახლეები
;