[ფინალის წინათქმა] ჩემპიონთა ლიგა. ტოტენჰემი vs ლივერპული. კლოპის საფიქრალი ნახევარდაცვაა, პოჩეტინო კეინით გახარებულია...

შაბათი, 1 ივნისი. მადრიდი. ვანდა მეტროპოლიტანო
ტოტენჰემი-ლივერპული  23:00
სავარაუდო შემადგენლობები
ტოტენჰემი (4-3-1-2): ლორისი - ტრიპიერი, ალდერვეირელდი, ვერტონგენი, როუზი - მ. სისოკო, ვანიამა, ერიკსენი - ალი - კეინი, ლუკას მოურა.
ლივერპული (4-3-3): ალისონი - ალექსანდერ-არნოლდი, მატიპი, ვან დეიკი, რობერტსონი - ჰენდერსონი, ფაბინიო, ვეინალდუმი - სალაჰი, ფირმინო, მანე
არ ითამაშებენ: ბენ დევისი - ნაბი კეიტა
საეჭვოა: ვერტონგენი, კეინი, ვინკსი, დავინსონ სანჩესი, ვანიამა (ყველა ტოტენჰემი)
არბიტრი: დამირ სკომინა (სლოვენია)


ევროსეზონი მადრიდში მიაღწევს აპოგეას და იქვე დასრულდება - რიგით 27- ჩემპიონთა ლიგის ფინალში ინგლისური დერბია - "ლივერპული" "ტოტენჰემის" წინააღმდეგ. ევროპული ფეხბურთის ერთ-ერთი გრანდი მერსისაიდური კლუბი ფინალის დებიუტანტი "დეზების" წინააღმდეგ - დიდი ჯახი გარანტირებულია...

თუ "ტოტენჰემი" ფინალების დებიუტანტია ლიგაზე, "ლივერპულს", რომელსაც ამჟამად იურგენ კლოპი წვრთნის ეს ტიტული (ჩემპიონთა თასი) ხუთჯერ აქვს მოპოვებული და ზედიზედ მეორე სეზონია ფინალშია და მეექვსე ტრიუმფისთვის იბრძვის. მაურისიო პოჩეტინოს გუნდს ამ მხრივ, მერსისაიდელებთან ბევრი უკლია, თუმცა "დეზებს" ამ სეზონში ლიგაზე ენითაუწერლად უმართლებს ბოლო წამებზე - გავიხსენოთ ეპიზოდები ფერნანდო ლორენტესა და ლუკას მოურას მონაწილეობით, როცა ყველა კანონით, თითქმის გავარდნილი "დეზები" ცოცხლდებოდნენ და შემდეგ ეტაპზე გადიოდნენ.

საკადრო პრობლემები ფინალის წინ პოჩეტინოს გუნდს უფრო აქვს - მაურისიოს მთავარი თავსატეხი, რა თქმა უნდა, ჰარი კეინის ტრავმაა. არგენტინელი მწვრთნელის გასახარად, ინგლისელთა მთავარმა გოლეადორმა ვარჯიში განაახლა და, დიდი ალბათობით, მადრიდში თამაშსაც შეძლებს. "ტოტენჰემი" კეინის არყოფნაში ფინალში ლუკას მოურას მოულოდნელმა ჰეთ თრიკმა გაიყვანა. თუ კეინი ითამაშებს, ან ნახევარფინალის გმირი ბრაზილიელი უნდა გადაჯდეს სათადარიგოთა სკამზე და ან კორეელი ჰეუნ-მინ სონი.

დავინსონ სანჩესმაც განაახლა ვარჯიშები, თუმცა ის სასტარტო შემადგენლობაში არ მოიაზრება. "აიაქსთან" 3:2 მოგებულ თამაშში ვიქტორ ვანიამამ ტრავმა მიიღო, მაგრამ მისი თამაში ნაკლებად არის ეჭვქვეშ. ბენ დევისის თამაში გამორიცხულია, მარცხენა ფლანგზე ისევ დენი როუზს ვნახავთ. დაცვის ცენტრში კი იან ვერტონგენისა და ტობი ალდერვეირელდის წყვილი უკონკურენცოა, თუკი ვერტონგენს მცირე ტრავმა არ გაუმიზეზდება. მაშინ სანჩესს შანსი მიეცემა.

კლოპის ერთადერთი სერიოზული დანაკლისი შუახაზელ ნაბი კეიტას არყოფნაა. საზარდულმა ნაბი მისი კარიერის მთავარ მატჩს გამოაკლო. ის სამატჩო განაცხადშიც არ არის.

ამის გარდა კლოპისგან სერიოზულ ცვლილებებს არ უნდა ველოდოთ, შუახაზში მას საფიქრალი აქვს, როგორ დააკომპლექტოს სასტარტო შემადგენლობა. საქმე იქითკენ მიდის, რომ "ლივერპულში" (სასტარტოში) ჯეიმს მილნერის ადგილი არ რჩება. ვინაიდან, ძნელია იმის გაფიქრებაც კი, რომ კლუბი ნახევარფინალის გმირ, ჟორჟინიო ვეინალდუმს შემადგენლობიდან ამოაგდებს. ვეინალდუმი - ფაბინიო - ჰენდერსონი - ასე გვესახება "ლივერპულის" ტრიო შუაში.

ენდრიუ რობერტსონმა ტრავმა სრულად მოიშუშა და დაცვის მარცხენა ფლანგზე დადგება. მან ტრავმა "ბარსელონასთან" 4:0 მოგებულ შეხვედრაში მიიღო და თამაშის გაგრძელება ვერ შეძლო. კლოპი, ალბათ, ჟოელ მატიპს არჩევს ვირხილ ვან დეიკის მეწყვილედ და არა დეიან ლოვრენს. რობერტო ფირმინო უკვე საეჭვოთა სიაშიც აღარაა - ბრაზილიელი აუცილებლად შეძლებს თამაშს.

ფაქტები

* "ლივერპულმა" ჩემპიონთა თასი ხუთჯერ მოიგო, "ტოტენჰემი" ფინალშიც კი არასდროს გასულა.

* ეს ფინალი ჩემპიონთა ლიგის ისტორიაში მეორეა, როცა ერთმანეთს ინგლისური კლუბები უპირისპირდებიან.

* "ტოტენჰემს" ლიგის ამ სეზონში საშუალოდ 3.08 გოლი გააქვს.

* ამ სეზონში "ლივერპულმა" ორივე მატჩი 2:1 მოუგო "ტოტენჰემს" და ორივეში ტაიმები "წითლების" სასარგებლოდ 1:0 დასრულდა.

* "ტოტენჰემის" მონაწილეობით ლიგაზე ბოლო 4 მატჩიდან 3-ში პირველი გოლი პირველ 15 წუთში გადიოდა.

* "ლივერპულმა" "ტოტენჰემთან" ბოლო 14 ოფიციალური მატჩიდან 13 მოიგო. აქედან 11-ში "ლივერპულმა" აუცილებლად გაიტანა პირველ ტაიმში.

* ამ გუნდების ბოლო 8 ურთიერთდაპირისპირებიდან 7-ში გოლის გატანა ორივე მოწინააღმდეგემ მოახერხა.

* "ლივერპული" ევროთასებზე 21- ფინალს თამაშობს.

* "ტოტენჰემისა" და "ლივერპულის" ბოლო 4 დაპირისპირებაში 2.5 გოლზე მეტი გავიდა.

* ჩემპიონთა ლიგაზე "ლივერპულის" მონაწილეობით ბოლო სამ შეხვედრაში 2.5 გოლზე მეტი გავიდა.

* "ლივერპულმა" "ტოტენჰემს" ბოლო 6 მატჩიდან 5-ში სულ მცირე, 2-2 გოლი გაუტანა.

493
მკითხველის კომენტარები / 0 /
მსგავსი ამბები
რუბრიკის სხვა სიახლეები
;