ფინალში გასვლა არ კმარა!.. 'გაგრას' მხოლოდ სტატისტიკის შექმნაში მონაწილეობა არ სურს

"გაგრა" მეორედ გავიდა დავით ყიფიანის სახელობის საქართველოს თასის ფინალში და მეორედაც ქუთაისის "ტორპედოს" დაუპირისპირდება - პირველად ეს 2011 წელს მოხდა. მაშინ გაგრელებმა თასიც მოიგეს. ახლა გუნდს მეორე შანსი აქვს: თასის ნახევარფინალში "გაგრამ" თბილისის "დინამო" 1:0 დაამარცხა დამატებით დროში და ფინალში გავიდა.

"გაგრას" პრეზიდენტი, ფეხბურთის ფედერაციის აღმასკომის წვერი ბესო ჩიხრაძე წარმატებით გახარებულია, მაგრამ მიიჩნევს, რომ თასის ფინალში გასვლა ბევრს არაფერს ნიშნავს.

"დიახ, ჩვენ ფინალში ვართ, მაგრამ ამ ტურნირში მთავარი თასის მოპოვებაა და არა - ფინალში თამაში. სხვაგვარად, მხოლოდ სტატისტიკის ნაწილები გავხდებით. ქუთაისის "ტორპედო" მშვენიერი გუნდია და ეს ევროთასებზეც დაამტკიცა და შიდა სარბიელზეც. მის მიმართ მხოლოდ დიდი პატივისცემა უნდა დავაფიქსირო. მაგრამ ჩვენ მარტო სტატისტიკის შექმნაში მონაწილეობა არ გვსურს", - ამბობს ჩიხრაძე.

კლუბის პრეზიდენტის თქმით, ფინალში მთავარი ბრძოლისუნარიანობაა: "ჩვენი კლუბი საქართველოს ერთიანობის სიმბოლოდ ჩამოყალიბდა და ჩვენი სურვილი მხოლოდ გამარჯვებაა. გვჯერა, ეს შესაძლებელია და 2011 წლის წარმატებას გავიმეორებთ. ჩვენ 2011 წელსაც რანგით მეორე ლიგაში ვთამაშობდით, მაგრამ მონდომებამ და რწმენამ სასწაული შეგვაძლებინა. ეს სული "გაგრაში" ახლაც ცოცხლობს".

ერთი ხანობა, გავრცელდა ხმები, თითქოს ჩიხრაძემ ფეხბურთზე გული აიყარა, თუმცა ის ამას უარყოფს: "ქართულ ფეხბურთში ბევრი რამაა გამოსასწორებელი და აღმასკომზე ამაზე ღიად ვლაპარაკობ ჩემს კოლეგებთან... არა, გული ნამდვილად არ ამიცრუებია. ამას მხოლოდ იმიტომ არ ვლაპარაკობ, რომ თასის ფინალში გავედით. თუმცა, ეს რომ დიდი სტიმულია, რად უნდა მტკიცება".

ჩიხრაძეს ეროვნულ ლიგაში გადასვლის შანსებზეც ვკითხეთ: "ჩემპიონატის დასრულებამდე ხუთი ტურია დარჩენილი და მესამე ადგილზე ვართ. ხუთივე თამაში ომი იქნება და მიზნის მისაღწევად დიდი ბრძოლები გველის".

ჩიხრაძის თქმით, მართალია, დღემდე სტადიონისა და ბაზის აშენების საკითხი ვერ მოგვარდა, მაგრამ ამის იმედი მაინც აქვს: "კლუბის ზრდისა და განვითარების გეგმები ისევ ცოცხალია. სტადიონის ტერიტორიაზე მუშაობა ახლაც მიმდინარეობს, რაშიც ფეხბურთის ფედერაციის მხარდაჭერა გვაქვს. მაგრამ ამ საკითხზე ჯერ დაკონკრეტებას მოვერიდები".

ყოველდღიური სპორტული გაზეთი "ლელო"
384
მკითხველის კომენტარები / 0 /
რუბრიკის სხვა სიახლეები