ფოთის 'კოლხეთიდან' თითქმის ყველა გაუშვეს...

მცირეხნიანი პაუზის შემდეგ, ფოთის "კოლხეთმა" ვარჯიში განაახლა. გუნდში სერიოზული საკადრო ცვლილებებია. ამის შესახებ "ლელოსთან" ფოთის "კოლხეთის" დირექტორმა დავით ბუკიამ ილაპარაკა.

"ამჟამად, "კოლხეთში" ოცამდე ფეხბურთელი ისინჯება, რომელთა მომავალი უახლოეს პერიოდში გაირკვევა. გუნდში ასევე რამდენიმე უცხოელი ფეხბურთელის მოწვევა იგეგმება. მაგრამ ამ ყველაფრის შესახებ უფრო ზუსტად უახლოეს დღეებში გეტყვით", - ამბობს ბუკია.

მისი თქმით, ფოთელებმა ლამის მთელი შემადგენლობის შეცვლა გადაწყვიტეს: "პირველმა წრემ გვაჩვენა, რომ გუნდს ლიგაში ადგილის შესანარჩუნებლად სერიოზული საკადრო ცვლილებები სჭირდებოდა.

რეალურად, ახლა გუნდში პირველი ნახევრიდან მხოლოდ რამდენიმე მოთამაშე დარჩა - ლუკა იმნაძე, რომელიც ასე თუ გააგრძელებს, მეეჭვება, ჩვენთან დატოვონ - ძალიან მშრომელი, მონდომებული და წესიერი ახალგაზრდაა და მასზე კარგის მეტი არაფერი გვეთქმის..

გვსურს ილია მიხალიოვისა და პატერსონ კაბორეს დატოვებაც. დანარჩენი 15 მოთამაშე კი გავუშვით, ხოლო დისკვალიფიცირებულ ხუთეულს კონტრაქტი ცალმხრივად გავუწყვიტეთ. საკუთარი სურვილით გიორგი კახელიშვილი წავიდა, რომელმაც კარიერის ლიგა 2-ის "ნორჩ დინამოში" გაგრძელება გადაწყვიტა. ასევე წავიდნენ თავდამსხმელები - იაროსლავ კვასოვი და ოთარ კვერნაძე".

ბუკიას თქმით, დაკომპლექტება მალე უნდა დასრულდეს: "უახლოეს დღეებში ორ საკონტროლო შეხვედრას ჩავატარებთ - ბათუმის "დინამოსა" და ლანჩხუთის "გურიასთან".

თუმცა, მეეჭვება, "გურიასთან" პირველი მატჩის შემადგენლობით გავიდეთ, რადგან მოთამაშეების უმრავლესობას სწორედ ლანჩხუთთან შეხვედრამდე ველოდებით. საბოლოოდ, ახალწვეულთა ვინაობა 4 დღეში გვეცოდინება და აუცილებელიცაა, საჩემპიონატო განაცხადის შედგენა რომ მოვასწროთ".

კოლხების დირექტორი არ მალავს, რომ მთავარი მწვრთნელის შეცვლაზეც ფიქრობდნენ: "იყო ამ თემაზე ლაპარაკი, მაგრამ მისი დარჩენა გადაწყდა, ოღონდ, ამ ეტაპზე, მერე კი ვნახოთ. ფეხბურთელების გაშვება "კოლხეთის" ხელმძღვანელობის გადაწყვეტილება იყო".

ბუკიამ არ დამალა, რომ "კოლხეთში" ფოთელი ფეხბურთელების დამატება სურთ: "ჩვენ ყველა ფოთელის დამატება გვსურს, მაგრამ ეს წარმოუდგენელია.

ირაკლი ძარია ალბანეთის "კუკესიშია", ჩემპიონთა ლიგაზე გადამწყვეტი გოლი გაიტანა და გუნდი შემდგომ ეტაპზე გაიყვანა. მას არავინ გამოუშვებს. ასევე მათე ცინცაძეს, რომელიც ქუთაისის "ტორპედოშია". თბილისის "ლოკომოტივიც" დათო სამურკასოვს ვერ შეელევა. მაგრამ იმედი გვაქვს, რომ იმავე "ლოკომოტივიდან" საყრდენ ნახევარმცველ ლაშა გვალიას დავიმატებთ. ვფიქრობთ, რეალურია თუ არა საჩხერმს "ჩიხურას" მარჯვენა მცველის, რევაზ ჩიტეიშვილის დამატება. ახლა კიდევ ერთი მეკარისა და 2 მცველის ტრანსფერზე ვმუშაობთ".

ცნობილია, რომ ფოთის ცენტრალურ სტადიონზე ბალახის საფარი დააგეს, ტრიბუნებიც აშენდა, მაგრამ უცნობია, "კოლხეთი" ფოთის სტადიონს როდის დაუბრუნდება: "ძალიან კარგი მოედანი დააგეს, ტრიბუნებზე საიზოლაციო ზედაპირი გადასხმულია და მალე ტრიბუნების გადახურვა დაიწყება.

ამის შემდეგ კი დამხმარე ოთახები მოწესრიგდება. მაგრამ ჯერ ზუსტად არ ვიცით, ფოთში როდის დავბრუნდებით, რადგან მთავარია, საფარი ნიადაგთან "შეხორცდეს" და ნაადრევი შესვლით არ გავაფუჭოთ".

ყოველდღიური სპორტული გაზეთი "ლელო"
2084
მკითხველის კომენტარები / 0 /
მსგავსი ამბები
რუბრიკის სხვა სიახლეები