ფოთის კოლხეთი. ახალი დირექტორი, ახალი მწვრთნელი... მთავარი ამოცანა: მოვსპოთ უიმედობა!

ფოთის “კოლხეთი 1913-ს” ახალი აღმასრულებელი დირექტორი ჰყავს - ამ პოსტზე ქალაქის მერმა გოჩა კურდღელიამ ნიკოლოზ ჯაში წარადგინა.

ეს საქართველოში პირველი და უნიკალური შემთხვევა იყო, რადგან ახალი დირექტორი არც ფოთელია, არც არავინ მფარველობდა და კონკურსის შესახებ ინტერნეტიდან შეიტყო.

“ფოთის “კოლხეთის” დირექტორის პოსტი ვაკანტური იყო. წარვადგინე კანდიდატურა, გამესაუბრნენ და ამის შემდეგ დამამტკიცეს. “კოლხეთი” ისტორიული კლუბია. აქ მუშაობა ჩემთვის საინტერესოცაა და საპასუხისმგებლოც. აუცილებელი პირობაა გუნდის გადარჩენა და მინიმუმ, ლიგა 2-ში ადგილის შენარჩუნება იქნება. მიმაჩნია, რომ მართვაში ჩემი გამოცდილებით და ახალი სამწვრთნელო შტაბით “კოლხეთში” ამ ამოცანების შესრულება შესაძლებელია”, - ამბობს ჯაში.

მისივე თქმით, გუნდში ახალი სამწვრთნელო შტაბი იმუშავებს: “ამიერიდან “კოლხეთს” პაატა მეტრეველი გაწვრთნის, რომელსაც სერიოზული გამოცდილება აქვს - ასაკობრივ ნაკრებებშიც უმუშავია და ფეხბურთის ფედერაციის აკადემიაშიც, ხოლო მანამდე, წლების განმავლობაში, “ოლიმპის” ცნობილ საფეხბურთო აკადემიას ხელმძღვანელობდა. მას ბევრი კარგი მოთამაშე აღუზრდია, მაგალითად - ზაქარია ბეგლარიშვილი. რამდენიმე დღეა, რაც პაატა “კოლხეთს” ავარჯიშებს. თუმცა, ამ მცირე დროის მიუხედავად, გუნდის შეკვრა და ათამაშება მოახერხა”.

ახალმა დირექტორმა გუნდში არსებულ პრობლემებზეც ილაპარაკა: “ყველაზე დიდი პრობლემა, რაც დავინახე, უიმედობა იყო. ჩვენი და ახალი სამწვრთნელო შტაბის მთავარი ამოცანა მოთამაშეთა ამ მდგომარეობიდან გამოყვანა და სამუშაო გარემოს შექმნა იყო. გუნდის მშენებლობა დაიწყო და მჯერა, ამ საკითხს ეშველება. ფსიქოლოგიურის გარდა, ფინანსური პრობლემებიც არის, ბიუჯეტი მინუსებშია, მაგრამ მჯერა, ამ საკითხების მოგვარებას შევძლებთ. ადგილობრივი ხელისუფლების წარმომადგენლებსაც შევხვდით, ბიზნესმენებსაც და გარკვეული იმედები გაგვიჩნდა”.

აქვე ვიტყვით, რომ “კოლხეთმა” ბოლო პერიოდში სამი საკონტროლო შეხვედრა ჩაატარა. 20 თებერვალს წყალტუბოს “სამგურალთან” კოლხებმა 0:1 წააგეს, 21 თებერვალს ბათუმში თბილისის “ნორჩ დინამოს” დაუპირისპირდნენ და 0:2 დამარცხდა, ხოლო გუშინ ქედას “ბეთლემს” 3:2 სძლიეს.

კოლხეთი-სამგურალი 0:1
0:1 კუხიანიძე (10)
კოლხეთი: აბულაშვილი, ბერაძე, იობაშვილი, ჩიკვილაძე, ჭეჭელაშვილი, ლემონჯავა, მარგველაშვილი, მეისა, გურეშიძე, კვარაცხელია, მათიაშვილი; შეცვლაზე: ნანავა, ჭიშკარიანი, ნაფიშვილი, კირკიტაძე, ძაძამია, ლეჟავა, ნოდია, მახარაძე, შალიკაშვილი, კოკაია, გოგიძე.

კოლხეთი-მერანი 0:2
0:1 ნიქაბაძე (55), 0:2 ხაბელაშვილი (88)
კოლხეთი: ნანავა, თათხაშვილი, ნაფიშვილი, კირკიტაძე, ლემონჯავა, მარგველაშვილი, ლეჟავა, ჭეჭელაშვილი, მახარაძე, კვარაცხელია, მათიაშვილი; შეცვლაზე: ნოდია, გურეშიძე, ძაძამია, იობაშვილი, ბერაძე, მეისა, კოკაია, აბულაშვილი, ჩიკვილაძე.

კოლხეთი-ბეთლემი 3:2
1:0 ხორხელი (19), 2:0 ნოდია (51), 3:0 გურეშიძე (54), 3:1 ბერიძე (82), 3:2 სირაბიძე (85)
კოლხეთი: აბულაშვილი, გ. ბოკუჩავა, ჩიკვილაძე, ნაფიშვილი, ლემონჯავა, ლეჟავა, ჭეჭელაშვილი, გოროზია, კოკაია, ხორხელი, მახარაძე; შეცვლაზე: რიჟამაძე, მარგველაშვილი, ნოდია, კირკიტაძე, ძაძამია, გურეშიძე, ნანავა, კვარაცხელია, მაკარაშვილი.

ყოველდღიური სპორტული გაზეთი "ლელო"
2750
მკითხველის კომენტარები / 1 /
თეიმურაზ რეხვიაშვილი
0
როგორც შედეგებიდან ჩანს მეტრეველს მაგრად შეუკრავს
და შეუთამაშებია გუნდი,წარმატებებს გისურვებთ
მსგავსი ამბები
რუბრიკის სხვა სიახლეები
;