ფოთში სტადიონს სწრაფი ტემპით აშენებენ

რამდენიმე წარუმატებელი ტენდერისა და იმედგაცრუების შემდეგ, როგორც ჩანს, ფოთში საფეხბურთო სტადიონის მშენებლობას საშველი დაადგა. ბოლო ტენდერში ცნობილმა კომპანია "ელიტა ბურჯმა" გაიმარჯვა, რომელიც საქმეს წინამორბედებზე სინდისიერად მიუდგა და "ფაზისის" არენას სწრაფი ტემპით აშენებს.

ფოთის სტადიონმა 6 ათასი მაყურებელი უნდა დაიტიოს. მშენებლობის პირველ ეტაპზე პროექტის ღირებულება 1,863 მილიონ ლარს შეადგენს და მოიცავს როგორც სამშენებლო სამუშაოებს (დასავლეთ ტრიბუნის ამოყვანა და ინდივიდუალური სკამების დამონტაჟება, ტრიბუნების ქვევით თანამედროვე სტანდარტის გასახდელების, საშხაპეების, მსაჯების, ექიმის და დელეგატის ოთახების მოწყობა, ისევე, როგორც პრესლოჟისა და კომენტატორების ოთახების), ასევე სტადიონის შიდა და გარე კომუნიკაციებით, ელექტრობით, გათბობითა და ვენტილაციით უზრუნველყოფას.

მოეწყობა ავტოსადგომი, ხოლო სტადიონის მისადგომები მოასფალტდება. ამ ეტაპზე მიმდინარეობს ტრიბუნისქვეშა სათავსების მშენებლობა, ხოლო პარალელურად - გადახურვისთვის საჭირო ლითონის ფორმების დამზადება.

პირველი ეტაპი 2018 წლის მარტში უნდა დასრულდეს. ამის შემდეგ აღმოსავლეთ ტრიბუნის მიშენებაა გათვალისწინებული, ოღონდ, თუ საამისო სახსრები გამოჩნდება.

ეს ისეთი ამბავია, რაც ფოთის "კოლხეთს" ძალიან წაადგება. დიდწილად სწორედ საკუთარი ინფრასტრუქტურის არქონის შედეგია, დღეს პირველ ქართულ კლუბს უმაღლეს ლიგაში დასარჩენად პლეი ოფში თამაში რომ უწევს - მუდამ სხვა ქალაქებს შეხიზნულმა საკუთარი მაყურებლის მხარდაჭერა დაკარგა და ბევრი ქულა გაანიავა.

პლეი ოფის პირველ შეხვედრას გუნდი 30 ნოემბერს ფოთში, "პარკი არენაზე" გამართავს (დასაწყისი 14:30 საათზე) და ეროვნული ლიგა 2-ის მეორეადგილოსან მარტვილის "მერანს" უმასპინძლებს, ხოლო 3 დეკემბერს ჭყონდიდელებს "მურთაზ ხურცილავაზე" ესტუმრება.

მარტვილის "მერანმა" ეროვნული ლიგა 2-ის გათამაშება 80 ქულით მეორე ადგილზე დაასრულა. თუმცა, მერანელები მთელი ჩემპიონატის განმავლობაში პირველ პოზიციაზე იყვნენ, სანამ მათი მთავარი მწვრთნელი გიორგი მიქაძე იყო. მაგრამ ის მერე გაუგებარი მიზეზით მოხსნეს და ასევე ვეტერანი ფეხბურთელი მიხეილ მახვილაძე დანიშნეს. პრობლემა კონკრეტულად ახალ მწვრთნელში არ არის, უბრალოდ, უღელტეხილზე ცხენებს არ ცვლიან...

ცხადია, მომხდარმა გუნდზე იმოქმედა, გათამაშების მიწურულს ლიდერობა დათმო, ეროვნულ ლიგაში პირდაპირი გზით ვერ დაბრუნდა და ამას ახლა პლეი ოფის მატჩებით შეეცდება.

ურთიერთშეხვედრების ისტორიაც საინტერესო უნდა იყოს: გუნდები ერთმანეთს ოფიციალურად 23-ჯერ დაუპირისპირდნენ და 9-9-ჯერ მოიგეს, 5 მატჩი კი ფრედ დასრულდა.

მახვილაძის გუნდი ფოთში ოპტიმალური შემადგენლობით მიემგზავრება, მასპინძლებს კი ყვითელი ბარათების სიმრავლის გამო ალექსანდრე გურეშიძე ვერ დაეხმარება.

ყოველდღიური სპორტული გაზეთი "ლელო"
2000
მკითხველის კომენტარები / 0 /
მსგავსი ამბები
რუბრიკის სხვა სიახლეები
;