[ფრაგმენტები ისტორიიდან] ჩვენ და რუსები. ...აი, ასე მოუგო დავით ყიფიანმა ტაქტიკური დუელი ვალენტინ ივანოვს... [+VIDEO]

23-წლიანი პაუზის შემდეგ ოფიციალურ მატჩებში კვლავაც ვიხილავთ ქართული და რუსული გუნდების დაპირისპირებას: ევროპალიგის II საკვალიფიკაციო ეტაპზე თბილისის "ლოკომოტივმა" სტაჟიანი ქართველი გულშემატკივრებისთვის მუდამ არასასურველ მეტოქეს, მოსკოვის "დინამოს" უნდა უმასპინძლოს!..

სხვისი რა მოგახსენოთ, მაგრამ ჩვენ კი დარწმუნებული ვართ იმაში, რომ გიორგი ჭიაბრიშვილის ხელმძღვანელობით მოასპარეზე თბილისის "ლოკომოტივი" ღირსეულად ითამაშებს ასეთი ძლიერი მეტოქის წინააღმდეგ და ასეთი ოპტიმიზმის საფუძველს ისიც გვაძლევს, თუ როგორ დამსახურებულად აჯობა ჩვენმა გუნდმა ევოპალიგის წინა ეტაპზე რუმინეთის ვიცე-ჩემპიონ კრაიოვას "უნივერსიტატეას"!

...იმის შემდეგ (1993 წლიდან), რაც ქართული გუნდები ევროტურნირებზე დამოუკიდებელი ქვეყნის სახელით ასპარეზობენ, ეს იქნება მესამე შემთხვევა, როცა მეტოქედ რუსეთის წარმომადგენელი გვყავს. წინა ორ შემთხვევაში ერთი და იგივე გუნდი გვყავდა მეტოქედ - მოსკოვის "ტორპედო", რომელიც, საბჭოთა კავშირის ჩემპიონატების ისტორიაში, ალბათ, ერთადერთი მოსკოვური გუნდი იყო, ქართველი გულშემატკივრებისგან განსაკუთრებულ სიმპათიებს რომ გრძნობდა...

უფრო ზუსტად, ეს სიმპათია გასული საუკუნის 60-იან წლების დასაწყისიდან გაჩნდა, როცა მოსკოვის "ტორპედოს" ზეობის პერიოდი დაიწყო და ეს ჩვენი სიმპათია იმითაც იყო გამოწვეული, რომ იმ პერიოდში რუსული გუნდებიდან  ერთადერთი სწორედ "ტორპედო" ანიჭებდა უპირატესობას  ტექნიკურ ფეხბურთს.  

აღარაფერს ვამბობთ იმ ფაქტზე, თუ რა დონის ფეხბურთელები ბრწყინავდნენ 60-იანი წლების "ტორპედოში": ედუარდ სტრელცოვი, ვალერი ვორონინი, ვალენტინ ივანოვი და, რა თქმა უნდა, 2 ჩვენი თანამემამულეც - ანზორ კავაზაშვილი და, განსაკუთრებით, სლავა მეტრეველი!..

კობიაშვილისა და ჯამარაულის ბენეფისი!

1996 წლის ზაფხულში, საქართველოს ჩემპიონი თბილისის "დინამო" ევროტურნირებზე (ისევე, როგორც  1994 და 1995 წლებში) ჩემპიონთა ლიგის ნაცვლად, უეფას თასის გათამაშებაში ჩაერთო. დავით ყიფიანის ხელმძღვანელობით მოასპარეზე იმდროინდელი "დინამო" შიდა ასპარეზზე უკონკურენტო იყო...

"დინამომ" ახალი სეზონიც შთამბეჭდავად დაიწყო: საქართველოს ჩემპიონატის საწყის ოთხ მატჩში მეტოქეთა კარში 20 გოლი გაიტანა და, რაც მთავარია, წარმატებით აიღო სტარტი ევროტურნირებზე! ლუქსემბურგის "გრევენმახერთან" ჩვენს გუნდს არ გასჭირვებია, აი, II საკვალიფიკაციო ეტაპზე ძლიერი ნორვეგიული კლუბის, "მიოლდეს" ძლევა (2:1, 0:0) კი ნამდვილად სასიამოვნო წარმატება იყო.

თუმცა, არანაკლებ ძლიერი მეტოქე (მოსკოვის " ტორპედო") გველოდა 1/32 ფინალში: 1989 წლის შემდეგ, ქართული და რუსული გუნდები პირველად უნდა დაპირისპირებოდნენ ერთმანეთს, თანაც, ამჯერად უკვე  საერთაშორისო არენაზე!..

"ტორპედოსა" და "დინამოს" ის ორრაუნდიანი დაპირისპირება სამართლიანად არის მიჩნეული ქართული საკლუბო ფეხბურთის ისტორიაში, როგორც ერთ-ერთი გამორჩეული და, რაც მთავარია, ჩვენთვის წარმატებული პაექრობა! განსაკუთრებით კი, მოსკოვური მატჩი უნდა გამოვყოთ, რომელიც ცალკეული ქართველი ფეხბურთელის ბენეფისადაც იქცა, რომ აღარაფერი ვთქვათ იმ ფაქტზე, თუ როგორ მოუგო სამწვრთნელო დუელი დავით ყიფიანმა თავის მოსკოველ კოლეგა ვალენტინ ივანოვს!

ჰო, ნამდვილად არ ვაჭარბებთ: საბჭოური ფეხბურთის 2 ლეგენდის, დავით ყიფიანისა და ვალენტინ ივანოვის ის ტაქტიკური დუელი ჩვენებურის გამარჯვებით დასრულდა: "დინამოს" მთავარმა მწვრთნელმა ერთდროულად რამდენიმე სიურპრიზი შესთავაზა მეტოქეს და მოსკოვურ შეხვედრაში 5 ისეთი ფეხბურთელი (ლევან კობიაშვილი, ალექსანდრე იაშვილი, გიორგი კიკნაძე, დიმიტრი კუდინოვი, გია ჩხაიძე) დააყენა ძირითადში, რომელთაც მანამდე გამართულ საქართველოს ჩემპიონატის მატჩში (რუსთავის "გორდასთან") არ უთამაშიათ!

არადა, სწორედ "გორდასთან" მატჩი ჰქონდათ ნანახი "ტორპედოს" წარმომადგენლებს. თანაც, "ტორპედოსთან" მატჩს, დისკვალიფიკაციის გამო, "დინამოს" ერთ-ერთი ლიდერი კახ გოგიჩაიშვილი ტოვებდა და ისე გამოვიდა, რომ ჩვენი გუნდიდან მხოლოდ 33 წლის დიმიტრი კუდინოვი იყო ერთადერთი, ვისაც მანამდე საკავშირო თუ საერთაშორისო არენაზე ჰქონდა გამოცდილება მიღებული...

თუმცა, "დინამოში" ხომ ერთიმეორეზე ნიჭიერი ბიჭების თაობა იყო მოსული, რომელთაგან უმრავლესობამაც, შემდგომში მართლაც დიდი ფეხბურთი ითამაშა: კახა კალაძე და ალექსანდრე იაშვილი 18-18 წლისანი იყვნენ, ლევან კობიაშვილი და გიორგი დემეტრაძე - 19-19-ის, ხოლო გიორგი კიკნაძე - 20-ის.

...იმის გარდა, რომ "დინამოს" შემადგენლობა მოსკოვურ მატჩში აშკარად სახეშეცვლილი იყო, დავით ყიფინმა, სულ მცირე, ოთხ ფეხბურთელსაც შეუცვალა ამპლუა და ამ გადაადგილებებმა უფრო დააბნია მასპინძლები. განსაკუთრებით ეფექტიანი აღმოჩნდა ლევან კობიაშვილის, ფაქტობრივად, შემტევ ნახევარმცველად გამწესება. არადა, იმ დროისთვის 19 წლის ფეხბურთელმა მართლაც ზღაპრული მატჩი ჩაატარა და უამრავი პრობლემა შეუქმნა მეტოქეს.

ახალგაზრდა თანაგუნდელს არც გოჩა ჯამარაული "ჩამორჩა": იმ ატალახებულ მოედანზე, რასაც და როგორც უნდოდა, იმას რომ აკეთებდა! ალბათ, სიმბოლურიც იყო ის ფაქტი, მატჩის ერთადერთი გოლი სწორედ ჯამარაულმა რომ გაიტანა ეშმაკური, "მოჭრილი" დარტყმით გაიტანა იმ საჯარიმო დარტყმით, ლევან კობიაშვილის წაქცევისათვის რომ დაინიშნა!

...საპასუხო მატჩში ჩვენი უმთავრესი არენა თითქმის გაივსო და ვერაფრით წარმოვიდგენდით, რომ "დინამო" სტუმრად მოპოვებულ უპირატესობას გაანიავებდა, მით უმეტეს, ძირითად შემადგენლობაში დაბრუნდა გოგიჩაიშვილი, რომელმაც 18 წლის ალექსანდრე იაშვილთან ერთად არაერთი თავსატეხი გაუჩინა მეტოქის მცველებს...

თუმცა, "ტორპედოც" არ ეგუებოდა მოვლენების ასეთ განვითარებას და პირველ ტაიმში რამდენიმე მწვავე მომენტიც შექმნა, მაგრამ, ისე როგორც მოსკოვურ მატჩში, ამჯერადაც უშეცდომოდ თამაშობდა ჩვენი მეკარე და კაპიტანი ირაკლი ზოიძე...

აი, მეორე ტაიმის დასაწყისში კი გოჩა ჯამარაულმა კიდევ ერთხელ დაამტკიცა მაღალი საშემსრულებლო ოსტატობა, როცა მართლაც ძალიან მაგარი გოლი გაუტანა სტუმართა მეკარე ვლადიმრ პჩელნიკოვს. "ტორპედომ" კი, მხოლოდ ის მოახერხა, რომ მატჩის დასრულებამდე 7 წუთით ადრე, "სტანდარტულიდან" ანგარიში გაათანაბრა, მაგრამ მომდევნო ეტაპზე გასასვლელად ეს საკმარისი არ აღმოჩნდა...

უეფას თასი. 1/32 ფინალი

ტორპედო-დინამო (თბ)  0:1
10.09.96. მოსკოვი. ტორპედო. 7 500 მაყურებელი
0:1 ჯამარაული (37)
ტორპედო: ზოიძე, კალაძე, ნ. ლობჟანიძე, მაჭავარიანი, ჩხაიძე, კუდინოვი, კიკნაძე, ჯამარაული (85. ინალიშვილი), კობიაშვილი, იაშვილი (82. დემეტრაძე), ხომერიკი (70. ზ. ჯელაძე)
კაპიტანი: ირაკლი ზოიძე
მწვრთნელი: დავით ყიფიანი
არბიტრი: ლ. სუნდელი (შვედეთი)

დინამო (თბ)-ტორპედო   1:1
24.09.96. თბილისი. ბორის პაიჭაძე. 65 000 მაყურებელი
1:0 ჯამარაული (49), 1:1 ვოსტროსაბლინი (83)
დინამო: ზოიძე, კალაძე, ნ. ლობჟანიძე, მაჭავარიანი, ჩხაიძე, კუდინოვი (40. კერძევაძე), კიკნაძე, ჯამარაული (55. ინალიშვილი), კობიაშვილი, გოგიჩაიშვილი, იაშვილი (65. დემეტრაძე)
კაპიტანი: ირაკლი ზოიძე
მწვრთნელი: დავით ყიფიანი
არბიტრი: ჰ. კრუგი (გერმანია)

ავჭალელთა  ევროდებიუტი

ისე მოხდა, რომ მოსკოვის "ტორპედოს" საქართველოში ჩამოსვლამ მომდევნო, 1997 წელსაც მოუწია, ოღონდ, ამჯერად უკვე სხვა ტურნირზე საასპარეზოდ - ახლა უკვე გაუქმებული "ინტერტოტოს თასის" გათამაშება ჯგუფური ეტაპით იწყებოდა და XII ჯგუფში მოსკოვის "ტორპედოს" მეტოქეები  ბერძნული "ირაკლისი", ავსტრიული "რიდი", მალტური "ფლორიანა" და ევროტურნირების დებიუტანტი - თბილისის "მერანი 91" გახლდნენ.

"მერანი 91" კი მართლაც კოლორიტული გუნდი იყო, რომელიც 1991 წელს დაარსდა თბილისის სატრანსპორტო გაერთიანების ხელმძღვანელის, ნუგზარ ნავაძის ინიციატივით. ახალმა კლუბმა იმდენი შეძლო, რომ ხუთ წელიწადში საქართველოს ჩემპიონატის უმაღლეს ლიგამდე აღზევდა...

1997. მერანი 91-ტორპედო 0:2


თუმცა მთავარი წარმატება წინ იყო: გუნდმა, რომელიც საშინაო მატჩებს ავჭალის "სინათლის" სტადიონზე ატარებდა, უმაღლეს ლიგაში სადებიუტო სეზონში IV ადგილი დაიკავა, ხოლო საქართველოს თასის გათამაშებაში ნახევარფინალამდე მიაღწია და თბილისის "დინამოსთან" დამარცხდა.

თბილისის გარეუბნის გუნდის აღმასვლა დაკავშირებული იყო კლუბის პრეზიდენტის, ნუგზარ ნავაძისა და, რა თქმა უნდა, მთავარ მწვრთნელის, თემურ მახარაძის სახელთან. მახარაძემ "მერანი 91" 1995 წლის შემოდგომაზე ჩაიბარა და ჯერ უმაღლეს ლიგაში გადაიყვანა, მერე კი ევროტურნირების საგზურიც მოაპოვებინა!

...ისე დაემთხვა, რომ ევროტურნირებზე სადებიუტო მატჩი "მერანი 91-ს" თბილისში, მოსკოვის "ტორპედოსთან" მოუწია, რომელიც ერთწლიანი პაუზის შემდეგ საქართველოში შეცვლილი შემადგენლობითა და ახალი მწვრთნელით, ალესანდრ ტარხანოვით გვეწვია.

თემურ მახარაძე


სხვათა შორის, ტარხანოვი (თავის დროზე მოსკოვის ცსკა-სა და საბჭოთა კავშირის ნაკრების ნახევარმცველი) მანამდეც და შემდგომშიც არასდროს მალავდა თავის სიმპათიებს ქართული ფეხბურთისა და, საერთოდ, საქართველოს მიმართ.

თუმცა, ეს "კეთილგანწყობა" ნამდვილად არ ასახულა "მერანი 91"-სა და მოსკოვის "ტორპედოს" მატჩში: როგორც მოსალოდნელი იყო, ამ ჯგუფის ფავორიტმა "ტორპედომ" ევროტურნირების დებიუტანტს აჯობა: ანდრეი გაშკინისა და დენის მაშკარინის გოლებით სტუმრებმა 2:0 გაიმარჯვეს. ეგ კი არა, მეორე ტაიმში, "მერანი 91-ის" მეკარე გუბაზ დოლიძემ პენალტი აუღო სტუმართა გუნდის ლიდერსა და ლიტვის ნაკრების ცნობილ ფორვარდ ედგარას იანკაუსკასს!

საბოლოოდ, ისე მოხდა, რომ XII ჯგუფში პირველი ადგილი მოსკოვის "ტორპედომ" დაიკავა (ყველა მეტოქეს მოუგო), აი, ევროტურნირების დებიუტანტმა "მერანი 91-მა" კი დანარჩენი მეტოქეები ჩამოიტოვა და II ადგილზე გავიდა!..

ინტერტოტოს თასი

მერანი 91-ტორპედო  0:2
22.06.97. თბილისი. ბორის პაიჭაძე. 10 000 მაყურებელი
0:1 გაშკინი (5), 0:2 მაშკარინი (55)
მერანი 91: გ. დოლიძე, შ. ხუჯაძე, რ. გოგიტაძე, კ. სიდამონიძე, დ. კაკუბავა, ა. გოგობერიშვილი (70. მ. მაზიაშვილი), გ. ქორიძე (23. ა. გელაძე), კ. მელქაძე, ბ. ამბიძე (30. გ. რევაზიშვილი), ბ. კვარაცხელია, დ. გოდერძიშვილი
მწვრთნელი: თემურ მახარაძე
არბიტრი: ლ. ლუიზოსი (კვიპროსი)

8096
მკითხველის კომენტარები / 0 /
მსგავსი ამბები
რუბრიკის სხვა სიახლეები
;