ფული და ფეხბურთი: რონალდო - 93 მლნ, მესი - 80, ნეიმარი - 37

ვინ არის გასული წლის ყველაზე მდიდარი ფეხბურთელი? რა თქმა უნდა, საინტერესო კითხვაა და პასუხიც საინტერესო იქნება. არახალია, დღეს ჩვენს საყვარელ სფეროში დიდზე დიდი ფული ტრიალებს და მსოფლიო ფეხბურთის ვარსკვლავებიც ძალიან ბევრს გამოიმუშავებენ...

ხამეს როდრიგესი,
22 მლნ დოლარი
მიუხედავად იმისა, რომ ამ დროისთვის "ბაიერნში" იჯარით თამაშობს, ხამესი მადრიდის "რეალის" კუთვნილებაა. მადრიდულ კლუბში გასულ წელს მისი საქმე კარგად რომ ვერ აეწყო, ეს ყველამ ვიცით. სამაგიეროდ, ფინანსური თვალსაზრისით კოლუმბიელს დიდებული წელი ჰქონდა.

სერხიო აგუერო,
22.6 მლნ
აგუერო ყველაფერს ასწრებს მიმდინარე სეზონში. თავის გუნდთან ერთად ქვას ქვაზე არ ტოვებს პრემიერლიგაში, ტაქსიში მჯდომი ახერხებს ავარიაში მოხვედრას და თან წარმატებით იუმჯობესებს ფინანსურ მდგომარეობას. ის "სიტიში" დიდ ხელფასს იღებს. გარდა ამისა, თანამშრომლობს ისეთ კომპანიებთან, როგორებიც არიან "პუმა", "ნისანი" და "პეპსი".

ლუის სუარესი,
22.3 მლნ
ევროპაში ის ყველაზე მაღალანაზღაურებადი ცენტრალური თავდამსხმელია. ის ასევე არის "პეპსისა" და "ადიდასის" სარეკლამო სახე. ლუისი ახლა აღარავის კბენს, უგებს მადრიდის "რეალს" და შოულობს დიდ ფულს.

უეინ რუნი,
23.6 მლნ
ლეგენდა და ინგლისის ნაკრების ყველა დროის საუკეთესო ბომბარდირი მშობლიურ "ევერტონში" დაბრუნდა. მან იქ მოასწრო სკანდალში გახვევა და ამასთან, გახდა გუნდის ლიდერიც.

უეინმა უკვე გაიტანა რამდენიმე მნიშვნელოვანი გოლი "კანფეტების" შემადგენლობაში. ის მეტს იღებდა "მანჩესტერში" თამაშისას, მაგრამ, როგორც ხედავთ, შემოსავალს არც ახლა უნდა უჩიოდეს.

ზლატან იბრაჰიმოვიჩი,
32 მლნ

აქ სიტყვები ზედმეტია. ეს ის შემთხვევაა, როცა ზლატანი კი არ გამოიმუშავებს ფულს, არამედ... ფული გამოიმუშავებს ზლატანს.

გარეთ ბეილი,
34 მლნ
ბეილი გასულ წელს უფრო მკურნალობდა, ვიდრე თამაშობდა. მაგრამ წარმოიდგინეთ, ამან მას ხელი ვერ შეუშალა, ოთხეულში დაემკვიდრებინა ადგილი.

ნეიმარი,
37 მლნ
როგორც ჩანს, პლანეტის უძვირფასესი ფეხბურთელობა საკმარისი არ არის იმისთვის, რომ ყველაზე მეტი თანხა გამოიმუშაო. კი, მას აქვს ასტრონომიული ხელფასი, მაგრამ ვერ ეწევა ორ ლიდერს. მათი გამოცნობა მკითხველისთვის პრობლემა არ უნდა იყოს.

ლიონელ მესი,
80 მლნ
მესიმ ნოემბერში "ბარსელონასთან" ახალ ხელშეკრულებას მოაწერა ხელი. ამიერიდან "ბარსელონას" გულშემატკივარს 3 წლის განმავლობაში ექნება საშუალება, დატკბეს არგენტინელის გარჯით. ფული კი თავისთავად იგულისხმება, როცა საქმე მესის ეხება.

კრიშტიანო რონალდო,
93 მლნ

კრიშტიანო პირველია არა მხოლოდ ფეხბურთელებს, არამედ სპორტსმენებს შორისაც. გასული წელი მისთვის ზეწარმატებული იყო. მან მოიგო მეხუთე "ოქროს ბურთი" და გახდა არაერთი პრემიის მფლობელი.

ყოველდღიური სპორტული გაზეთი "ლელო"
3759
მკითხველის კომენტარები / 0 /
მსგავსი ამბები
რუბრიკის სხვა სიახლეები
;