ფული და ფეხბურთი:- ფრანგული მილიონების ამბავი

საფრანგეთის ჩემპიონატი თუნდაც იმიტომ იქცევს ჩვენს ყურადღებას, რომ იქ, სხვა გუნდებთან ერთად, "პარი სენ-ჟერმენი" თამაშობს.

ვინ არიან ლიგა 1-ის ყველაზე მაღალანაზღაურებადი ფეხბურთელები და მწვრთნელები? სწორედ ამ თემას ეძღვნება ჩვენი წერილი, რომელიც მკითხველისთვის ინტერესმოკლებული არ უნდა იყოს...


ფეხბურთელები

ნეიმარი (პსჟ)
37 000 000 ევრო

ნეიმარის სტატუსი ეჭვქვეშ ვერაფრით დადგება. ბევრი მიიჩნევს, რომ ბრაზილიელი ვარსკვლავი ზედმეტად პრივილეგირებულია, მაგრამ ფაქტია, დღეს სწორედ ის არის დედაქალაქური კლუბის ყველაზე მდიდარი, მთავარი სახე.

ნეიმარისთვის "პარი სენ-ჟერმენი" მილიონების შოვნის და მსოფლიოს საუკეთესო ფეხბურთელის სტატუსისთვის ერთდროული საშუალებაა.

ედინსონ კავანი (პსჟ)
15 400 000 ევრო

კავანისა და ნეიმარს შორის იდეალური ურთიერთობა არ არის. ყველას ახსოვს, რა ინციდენტი მოხდა ურუგვაელსა და ბრაზილიელს შორის 11-მეტრიანების შესრულებისას.

მაშინ ეს გაუგებრობა თითქოს ჩაცხრა, მაგრამ საბოლოოდ მხარეები, ალბათ, დროებით დაზავდნენ. ორივეს პირველობის ამბიცია აქვს და ასეთთა მორიგება, ცოტა არ იყოს, რთულია.

კილიან მბაპე (პსჟ)
15 000 000 ევრო

"პარი სენ-ჟერმენის" კიდევ ერთი ვარსკვლავი. თინეიჯერმა მბაპემ "მონაკოში" შესანიშნავი თამაშით მთელი ევროპა აალაპარაკა. ამ დროისთვის ის პსჟ-ის ერთ-ერთი ლიდერია. თუ არ ჩავთვლით ტრავმებს, კილიანს თამასა დაბლა ნამდვილად არ დაუშვია.

ტიაგო სილვა (პსჟ)
13 300 000 ევრო

გამოცდილი მცველი, რომელიც "პარი სენ-ჟერმენის" დაცვის ბურჯად ითვლება. ტიაგო სილვას ზურგსუკან შესანიშნავი მილანური კარიერა აქვს. სწორედ ამის შემდეგ გახდა ის მიმზიდველი ფეხბურთელი ფრანგული კლუბისთვის.

ანხელ დი მარია (პსჟ)
11 200 000 ევრო

ამ დროისთვის ის მხოლოდ ეპიზოდურად თუ აჩვენებს იმ ფეხბურთს, რომელსაც მისგან ელიან. და მაინც, დი მარია რჩება ფრანგული ლიგის ერთ-ერთ ყველაზე მაღალანაზღაურებად ფეხბურთელად. აქვს ევროთასებზე თამაშის უდიდესი გამოცდილება.

მარკინიოსი (პსჟ)
11 200 000 ევრო

ახალგაზრდა ცენტრალური მცველი, რომელიც ტიაგო სილვასთან ერთად დაცვის ცენტრში გამორჩეულ ტანდემს ქმნის. ასე რომ, "პარი სენ-ჟერმენის" ცენტრალურ მცველებს ენობრივი ბარიერი არ აწუხებთ. ელიან, რომ მარკინიოსს კიდევ შეუძლია მომატება.

ტიაგო მოტა (პსჟ)
8 750 000 ევრო

გამოცდილი ცენტრალური ნახევარმცველი, რომელსაც უფრო ჩაშლა ეხერხება, ვიდრე შექმნა. ბევრი მიიჩნევს, რომ იტალო-ბრაზილიელის ჯამაგირი გაბერილია, მაგრამ რას ვიზამთ - "პარი სენ-ჟერმენის" ხელმძღვანელობა ასე ფიქრობს...

ხავიერ პასტორე (პსჟ)
7 700 000 ევრო

თავის დროზე, არგენტინელი ზევარსკვლავური სტატუსით მივიდა პსჟ-ში, ახლა კი თითქმის აღარ აქვს სათამაშო პრაქტიკა. სწორედ ამიტომ, ზამთრის სატრანსფერო პერიოდში პასტორეს ძალიან უნდოდა "ინტერში" გადასვლა, მაგრამ ამ საქმიდან არაფერი გამოვიდა.

რადამელ ფალკაო (მონაკო)
7 500 000 ევრო

ათეულში ერთადერთი ფეხბურთელია, რომელიც წარმოადგენს "მონაკოს" და არა "პარი სენ-ჟერმენს". გამოცდილი, მაღალი კლასის ცენტრფორვარდი, რომელსაც გოლი "სისხლში" აქვს. მისი ანაზღაურება შემთხვევითი სულაც არ არის.

დანი ალვეში (პსჟ)
7 000 000 ევრო

დანი ალვეშმა იცის, როგორ მოიგოს ტიტულები. სწორედ ამ მისიით მივიდა ის "პარი სენ-ჟერმენში". გამოცდილი ბრაზილიელი, რომელსაც საფეხბურთო ცხოვრებაში აბსოლუტურად ყველაფერი უნახავს.

მწვრთნელები

უნაი ემერი (პსჟ)
4 500 000 ევრო

ლოგიკურია, რომ ყველაზე მაღალანაზღაურებადი მწვრთნელი "პარი სენ ჟერმენს" ჰყავს. უნაი ემერისგან არავინ ელის მხოლოდ ლიგა 1-ის მოგებას. ჩემპიონთა ლიგაში წარმატება კლუბის ხელმძღვანელების მოთხოვნაა. ვნახოთ, როგორ გაართმევეს თავს ამ ურთულეს ამოცანას 46 წლის ესპანელი სპეციალისტი.

ლეონარდო ჟარდიმი (მონაკო)
3 500 000 ევრო

"მონაკოს" პორტუგალიელმა დამრიგებელმა დაამტკიცა, რომ ძლიერი სპეციალისტია. გვახსოვს ჩემპიონთა ლიგაში მისი გუნდის მიერ ჩატარებული შესანიშნავი თამაშები.

კლაუდიო რანიერი (ნანტი)
3 400 000 ევრო

"ლესტერთან" ერთად ინგლისის ჩემპონი გახდა, მაგრამ კლუბის ხელმძღვანელობამ ამაგი არ დაუფასა. ახლა მუშაობს ტრადიციულ ფრანგულ კლუბში.

რუდი გარსია (მარსელი)
2 500 000 ევრო

"მარსელის" გაწვრთნა ძალიან რთული საქმეა. "რომას" ყოფილ დამრიგებელს აქვს გარკვეული ჩავარდნები, მაგრამ ეს არ არის გასაკვირი იმ შემადგენლობიდან გამომდინარე, რომელიც მას ჰყავს.

ლუსიენ ფავრი (ნიცა)
2 000 000 ევრო

ძალიან კარგი მწვრთნელი, რომელსაც უყვარს შემტევი და სანახაობრივი ფეხბურთი. ბევრი მის დამსახურებად მიიჩნევს იმას, რომ ბოლო წლებში "ნიცას" კარგი პერიოდი უდგას.

ყოველდღიური სპორტული გაზეთი "ლელო"
1056
მკითხველის კომენტარები / 0 /
მსგავსი ამბები
რუბრიკის სხვა სიახლეები
;