ქალები პრაღაში ოქროს გარეშე

ეთერ ლიპარტელიანი და სოფიო სომხიშვილი


პრაღაში დღეს ჩატარდა ევროპის ღია თასი ძიუდოისტ ქალთა შორის, რომელშიც ჩვენი ნაკრებიც გამოვიდა - 7 მონაწილით. გია თენაძის შეგირდებმა 3 მედალი მოიპოვეს - 2 ვერცხლი და 1 - ბრინჯაო. ვიცე-ჩემპიონები ეთერ ლიპარტელიანი (57) და სოფიო სომხიშვილი (+78) გახდნენ, მარიამ ჭანტურია (70) კი მესამეზე გავიდა.

ლიპარტელიანმა ჯგუფში უნგრელი იბოლია სიროკი ვაზარით, ხოლო ებრაელი არიელ ბაზალელი და ბრიტანელი ლელე ნაირნე წმინდად დაამარცხა. ნახევარფინალში ჩინელ ტონგჯუან ლუსთან მიითვალა, ფინალში კი თვითომ წააგო წმინდად პოლონელ არლეტა პოდოლაკთან.

სომხიშვილმა ესპანელი პატრიცია ფერერ ბარტულოსი დააიპონა, უკრაინელი გალინა ტარასოვა კი გაფრთხილებებით მოახსნევინა. ნახევარფინალში მორიგი იპონი პოლონელ იულია სვიატკიევიჩთან მიითვალა, ფინალში კი ჩინელ იან ვანთან წააგო.

ჭანტურია  მეოთხედფინალში დამარცხდა გერმანელთა მომავალ ფინალისტ სარა მაკელბურგთან. მანამდე უნგრელ ეველინ სალანკის აჯობა, დამამშვიდებელში კი ფრანგი მაია ტოიე და ჩინელი ანქი სუნი დაამარცხა.

48 კილოგრამში ჩვენი ორივე მონაწილე პირველივე წრეში დამარცხდა: მარიამ ციხელაშვილმა (48) იტალიელ ჯულია სანტინისთან წააგო, ნატალია ყიფშიძემ კი - პოლონელ დანუტა მაიერთან.

52 კილოგრამში მარიამ ჯანაშვილმა ფრანგ მარიე ორსინს კი აჯობა, მაგრამ ჰოლანდიელ ხულიე კემინკთან ვერავერს გახდა, ხოლო ტეტიანა ლევიცკა-შუკვანი პირველივე წრეში დამარცხდა გერმანელ ვერენა ტუმთან.

ჩვენი ნაკრები პრაღაში ერთობლივ ვარჯიშებზეც დარჩება, მერე კი სამშობლოში დაბრუნდება და აქ გააგრძელებს მზადებას მარტის ბოლოს გასამართავი თბილისის ტურნირისთვის.

1266
მკითხველის კომენტარები / 0 /
მსგავსი ამბები
რუბრიკის სხვა სიახლეები
;