ქართველების 28 მედალი კარტოზია-ბალავაძის ტურნირზე!

 თბილისის სპორტის ოლიმპიურ სასახლეში დამთავრდა "გივი კარტოზია-ვახტანგ ბალავაძის მემორიალი" თავისუფალსა და ბერძნულ-რომაულ ჭიდაობებში. დღევანდელი დღე საქართველოს დელეგაციამ ყველაზე წარმატებით ჩაატარა - 11 მედალი მოიპოვა: 3 ოქრო, 2 ვერცხლი და 6 ბრინჯაო.

დღეს  ბერძნულ-რომაული სტილით მოჭიდავეებმა წინა დღეებთან შედარებით, ყველაზე წარმატებით იჭიდავეს და 4 მედალი ირგუნეს - 2-2 ოქრო და ბრინჯაო. ჩემპიონები აივენგო რიკაძემ (82) და ლევან არაბულმა (130) მოიპოვეს, ხოლო მესამეზე ალექსი ლოდია (97) და სულხან ბუიძე (130) გავიდნენ.

"თავისუფლების" დღევანდელი მონაგარი 7 ჯილდოა: 1 ოქრო, 2 ვერცხლი და 4 ბრინჯაო. ჩემპიონი გენო პეტრიაშვილი გახდა მძიმე წონაში, ვინც ფინალში წმინდად დაამარცხა თანაგუნდელი ალექსი ჟორჟოლიანი. ჩვენს ნაკრებს მეორე ვერცხლი მამუკა კორძაიამ (97) მოუტანა, ხოლო მესამე პრიზიორები დავით ფირუზაშვილი, სანდრო ამინაშვილი (ორივე - 86), გივი მაჭარაშვილი (97) და გიორგი შამათავა (125) გახდნენ.

როგორც გითხარით, ბოლო დღეს ოქროს მედლები ბერძენ-რომაელებმაც მოიპოვეს - რიკაძემ და არაბულმა. რიკაძემ ფინალში დამაჯერებლად, 11:6 დაამარცხა აზერბაიჯანელი რაფიგ ჰუსეინოვი. რიკაძესვე გადაეცა გივი კარტოზიას სახელობის პრიზი, რომელიც 82 კილოგრამში გამარჯვებულისთვის იყო დაწესებული. არაბულმა 7:1 მოუგო ინდოელ ნავეერ ნავეენის, ვინც მანამდე გიორგი ბარბაქაძე და სულხან ბუიძე დაგვიმარცხა. ამ წონაში ერთი ბრინჯაოს მედალი ბექა კანდელაკმაც მოიპოვა, ვინც უკვე აზერბაიჯანის სახელით გამოდის.

ამდენად, ჩვენმა ნაკრებმა ტურნირში გამოსვლა 28 მედლით დაასრულა: 7 ოქრო, 6 ვერცხლი და 15 - ბრინჯაო. აქედან თავისუფალი სტილით მოჭიდავეებმა 21 ჯილდო ირგუნეს - 5-5 ოქრო-ვერცხლი და 11 ბრინჯაო. ბერძენ-რომაელების მონაგარი 7 მედალია: 2 ოქრო, 1 ვერცხლი და 4 - ბრინჯაო.

კიდევ ერთხელ შეგახსენებთ ტურნირის მედალოსნებს. თავისუფალ ჭიდაობაში ჩემპიონები ოთარ გოგავა (57), ბექა ლომთაძე (61), გიორგი სულავა (74), ზურაბ ერბოწონაშვილი (79) და გენო პეტრიაშვილი (125) გახდნენ. მეორეზე კონსტანტინე ხაბალაშვილი (70), თემურ ბერუაშვილი (74), და ირაკლი მწითური (92), მამუკა კორძაია (97) და ალექსი ჟორჟოლიანი (125) გავიდნენ, მესამეზე - რამაზ თურმანიძე (57), მიხეილ ბერძნიშვილი (61), ცოტნე აბალაკი (65), ლევან ქელეხსაშვილი, მირზა სხულუხია (ორივე - 70), ტარიელ გაფრინდაშვილი (79), დავით ფირუზაშვილი, სანდრო ამინაშვილი (ორივე - 86), ბექა ნადაშვილი (92), გივი მაჭარაშვილი (97) და გიორგი შამათავა (125).

ბერძენ-რომაელთაგან ოქროს მედლებს აივენგო რიკაძე (82) და ლევან არაბული (130) დაეუფლნენ. ვიცე-ჩემპიონი შალვა ხაჩიძე გახდა 87 კილოგრამში, მესამეზე კი ნიკა საბანაშვილი (67), გიორგი ხუჭუა (72) ალექსი ლოდია (97) და სულხან ბუიძე (130) გავიდნენ.

969
მკითხველის კომენტარები / 0 /
მსგავსი ამბები
რუბრიკის სხვა სიახლეები
;