ისტორია: ქართველები ზამთრის ოლიმპიადებზე - 1956-2018

თავდაპირველად გუშინდელი ღონისძიების შესახებ: ვინც დღეისთვის საქართველოდან იმყოფება ზამთრის ოლიმპიადაზე, 8 თებერვალს სრული შემადგენლობით შეიკრიბა დადგენილ დროს პიონჩანის ოლიმპიურ სოფელში.

სახელმწიფო დროშის აღმართვის ტრადიციად ქცეულ საზეიმო სცენარში უშუალო მონაწილეობა ოლიმპიური მისიის ხელმძღვანელს, სეოკის ვიცე-პრეზიდენტს მამუკა ხაბარელს ხვდა წილად.

ღონისძიებას ესწრებოდნენ საქართველოს კულტურისა და სპორტის მინისტრი მიხეილ გიორგაძე, სამხრეთ კორეაში საქართველოს საგანგებო და სრულუფლებიანი ელჩი ოთარ ბერძენიშვილი და სეოკ-ის პრეზიდენტი ლერი ხაბელოვი.

ჩვენი დელეგაცია ეწვია ოლიმპიურ სოფელშივე გახსნილ მემორიალს და პატივი მიაგო დაღუპულ სპორტსმენთა, რომელთა შორისაა ბაკურიანელი მოციგავე ნოდარ ქუმარიტაშვილი, ხსოვნას.

* * *

ზამთრის ოლიმპიადებში ქართველი სპორტსმენების მონაწილება უკვე სრულ 62 წელიწადს მოითვლის. პირველმა ოლიმპიური სარბიელისკენ მიმავალი გზა გაიკვლია კობა წაქაძემ ტრამპლინიდან თხილამურებით ხტომაში.

ეს მოხდა 1956 წელს ბაკურიანელმა სპორტსმენმა კიდევ 1960, 1964 და 1972 წლის ზამთრის ოლიმპიურ თამაშებში იასპარეზა. შემდეგ 22-წლიანი ლოდინის პერიოდი დადგა.

მხოლოდ 1994 წელს, უკვე დამოუკიდებელი საქართველოს სახელით, ჩვენი 5 სპორტსმენის დებიუტი შედგა ლილეჰამერში.

ქართული სპორტის ისტორიაში პირველ ოლიმპიურ მისიას ვხელმძღვანელობდი და კარგად მახსოვს იმ უდიდესი სიხარულის განცდა, რომელიც დელეგაციის თითოეულმა წევრმა და მთელმა საქართველომ გაიზიარა სიამაყის განცდით.

ლილეჰამერში გამოდიოდა ზურაბ ჯიჯიშვილი (სწრაფდაშვება), კახა ვახტანგიშვილი და ლევან თიბილოვი (ციგაობა), კახა წაქაძე (ტრამპლინი), ლევან აბრამიშვილი (სლალომი).

შემდეგ იყო ნაგანო (1998) - ჯიჯიშვილი (სამთო კომბინაცია), წაქაძე (ტრამპლინი), სოფიკო ახმეტელი, აბრამიშვილი (ორივე - სლალომი).

სოლტ ლეიკ სიტი (2002) - ვახტანგ მურვანიძე (ფიგურული ციგურაობა), ახმეტელი, რობერტ მახარაშვილი (ორივე - სლალომი), წაქაძე (ტრამპლინი). ტურინი (2006) - ელენე გედევანიშვილი, მურვანიძე (ორივე - ფიგურული ციგურაობა), იასონ აბრამაშვილი (სლალომი).

ვანკუვერი (2010). - აქ დღემდე ჩვენი სპორტსმენების სარეკორდო რაოდენობა მონაწილეობდა: გედევანიშვილი, ოთარ ჯაფარიძე, ელისონ რიდი (სამივე - ფიგურული ციგურაობა),

აბრამაშვილი, ჯაბა გელაშვილი, ნინო წიკლაური (სამივე - სლალომი). ვანკუვერში ოლიმპიადის გახსნამდე რამდენიმე საათით ადრე საკონტროლო დაშვებისას ტრაგიკულად დაიღუპა 21 წლის მოციგავე ნოდარ ქუმარიტაშვილი.

როგორც პრესა წერდა: `ამ ამბავმა შეძრა არა მარტო ქართული დელეგაცია და საქართველო, არამედ მთელი ოლიმპიური სამყარო. შეიძლება ითქვას, რომ თეთრი ოლიმპიადა შავებით შეიმოსა".

სოჭში (2014) გამოდიოდნენ - გედევანიშვილი (ფიგურული ციგურაობა), წიკლაური, აბრამაშვილი, ალექსი ბენიაიძე (სამივე - სლალომი), ამ თამაშებზე ჩვენი გუნდის ლიდერი ელენე გედევანიშვილი იყო.

პიონჩანშიც ფიგურულ მოციგურავეს, მორის ყვითელაშვილს მიიჩნევენ ლიდერად. მორისის გარდა პიონჩანში იასპარეზებენ წიკლაური, აბრამაშვილი (ორივე - სლალომი) და გიორგი სოღოიანი (ციგა).

დავძენთ, რომ აბრამაშვილისთვის ეს იქნება მეოთხე ოლიმპიადა, წიკლაურისთვის - მესამე, სოღოიანი და ყვითელაშვილი კი დებიუტანტები არიან.

და კიდევ, საბჭოთა ეპოქაში საუკეთესო შედეგი საქართველოს ოლიმპიელებიდან ჰქონდა კობა წაქაძეს (IX, 1960წ), დამოუკიდებელი საქართველოს სპორტსმენებიდან ელენე გედევანიშვილს (X, 2006წ).

ზამთრის წლევანდელი ოლიმპიადა საქართველოსთვის დამოუკიდებლობის მოპოვების შემდეგ მეშვიდეა. იმედია, უეჭველად დადგება ის დროც, როცა მედლების მოპოვების ტრადიციასაც დაუდებენ სათავეს ჩვენი სპორტსმენები.

ზამთრის 23-ე ოლიმპიური თამაშები პიონჩანში დღეს გაიხსნება საზეიმოდ...

თენგიზ გაჩეჩილაძე - პიონგჩანიდან

ყოველდღიური სპორტული გაზეთი "ლელო"
2250
მკითხველის კომენტარები / 0 /
მსგავსი ამბები
რუბრიკის სხვა სიახლეები
;