ქართველთა თურქული მონაგარი და გადაულახავი ბარიერები

მერანის  თურქული ნადავლი:
ხუთიდან ერთი

მარტვილის "მერანმა" თურქეთში შეკრება დაასრულა და საქართველოში დაბრუნდა. ფეხბურთელები ორ დღეს დაისვენებენ და 2018 წლის ჩემპიონატისთვის მზადებას 18 თებერვლიდან უკვე მარტვილში გააგრძელებენ.

თურქეთის ქალაქ სიდეში გუნდმა ორი კვირა დაყო და 5 ტესტმატჩი გამართა: მიხეილ მახვილაძის შეგირდები დამარცხდნენ კიევის "დინამოს" დუბლშემადგენლობასთან (1:3), სერბულ (ვრანი) "დინამოსთან" (1:2), პოლონურ "ლეგნიცასთან" (0:1) და უკრაინულ (ლუცკი) "ვოლინთან" (0:1), ხოლო დონეცკის "შახტარის" ახალგაზრდულ შემადგენლობას 2:0 მოუგეს.

"მერანმა" მეხუთე ტესტმატჩი პოლონურ "ლეგნიცასთან" გამართა. თავიდან დაგეგმილი იყო მატჩი ასევე პოლონურ "სტალთან", თუმცა ეს არ გამოვიდა.

სპარინგმატჩში მარტვილელთა მოწინააღმდეგე პოლონეთის ჩემპიონატის პირველ ლიგაში მე-4 ადგილზეა და ექსტრაკლასაში გადასვლისთვის იბრძვის.

"მერანის" პრესსამსახურის ცნობით, შეხვედრა საინტერესო გამოდგა და ორმხრივი იერიშებით მიმდინარეობდა. 26-ე წუთზე "ლეგნიცას" ფეხბურთელმა უხეში თამაშისთვის წითელი ბარათი მიიღო და დარჩენილი დრო მეტოქე 10 კაცით გაატარა.

"მერანმა" არაერთი სახიფათო მომენტი შექმნა და მოგებაც შეეძლო, თუმცა შეტევას სიზუსტე აკლდა, რამდენჯერმე კი პოლონელთა მეკარე დამაჯერებლად თამაშობდა.

გამარჯვების გოლი "ლეგნიცამ" 68-ე წუთზე გაიტანა. დარჩენილ დროში "მერანი" უფრო დიდი ძალებით გადავიდა შეტევაში, თუმცა საბოლოო ანგარიში არ შეცვლილა და მარტვილელები კაცნაკლულ მეტოქესთან დამარცხდნენ.

მერანი: კულუა, ციმაკურიძე, ვ. ფაცაცია, მელიავა, ჟიშკარიანი, ლომაშვილი, ტეიდი, ბოლქვაძე, მათიაშვილი, ტრეტიაკი, ხინთიბიძე; შეცვლაზე: მეშველიანი, გეგია, ჯანჯღავა, ჟვანია, ც. ფაცაცია, შულაია, ლუკავა, მიქავა.

შეკრებაზე მახვილაძის განკარგულებაში 22 ფეხბურთელია. "მერანის" მთავარი მწვრთნელის თქმით, გამოცდილი და ახალგაზრდა ფეხბურთელებით დაკომპლექტებულმა "მერანმა" ჩემპიონატის სტარტამდე საკმაოდ ნაყოფიერი სამზადისი გაიარა, რაც ჭყონდიდელებს ეროვნულ ლიგა 2-ში ღირსეულად ასპარეზობისთვის წაადგებათ.

ეროვნული ლიგა 2-ის გათამაშება კი 1 მარტს დაიწყება. "მერანი" პირველ მატჩს 3 მარტს, მარტვილის მურთაზ ხურცილავას სახელობის სტადიონზე, "გაგრასთან" გამართავს.

გამარჯვება უნგრელებთან

ფოთის "კოლხეთის" თურქულ სამზადისზე ინფორმაციებს კვლავ უცხოური ვებგვერდებიდან ვაგროვებთ. ამჯერად, კონსტანტინ გალკინის გაწვრთნილები უნგრულ "კიშვარდას" შეხვდნენ და 3:1 დაამარცხეს.

ეს კლუბი უნგრეთის რანგით II ლიგაში მეორე ადგილზეა. ამავე კლუბის ოფიციალური საიტის ცნობით, "კოლხეთიდან" დუბლი 22 წლის შემტევმა ნახევარმცველმა ვლადიმირ მიხაილოვმა შეასრულა, რომელიც გალკინთან ნიჟნი ნოვგოროდის "ოლიმპიეცში" თამაშობდა.

მან კარიერა ნალჩიკის "სპარტაკში" დაიწყო, უთამაშია სომხეთის "მიკაში", ტულის "არსენალის" ახალგაზრდულ შემადგენლობაში, ერთი ხანობა კი რუსეთის 18-წლამდელთა ნაკრებშიც ასპარეზობდა. მიხაილოვი "ოლიმპიეციდან" ფოთელთა გუნდში მისული კიდევ ერთი ახალწვეულია. ერთი გოლიც პენალტის ნიშნულიდან ლაშა გოგონაიამ გაიტანა.

მეორე ტაიმში ძალიან უსიამოვნო ამბავი მოხდა, რომელმაც ორივე გუნდის ფეხბურთელები ძალიან შეაშინა: 50-ე წუთზე, როცა ქართული გუნდი 2:0-ს იგებდა, უნგრელ რადოშ პროტიჩთან შეჯახებისას, "კოლხების" კიდევ ერთი ახალწვეული გალპერინი მოედანზე დაეცა.

მან გონება დაკარგა და პირველადი დახმარება უნგრელმა მოთამაშემ გაუწია, მერე მოედანზე ფოთელთა ექიმიც შევიდა და ფეხბურთელი გონზე მოიყვანეს. საბედნიეროდ, გალპერინმა თამაში გააგრძელა.

საერთაშორისო ცნობარებში გალპერინის გვარით მხოლოდ არკადი გალპერინი იძებნება. რუსეთისა და ისრაელის მოქალაქეობის მქონე 25 წლის მარცხენა შემტევი ნახევარმცველი, რომელიც რუსეთის 17, 18 და 19-წლამდელთა ნაკრების წევრიც იყო, ვარჯიშობდა "ხიმკისა" და "მოსკვას" ასაკობრივ გუნდებში, ხოლო 2011 წლის იანვრიდან ივლისამდე ლა კორუნიას "დეპორტივოს" დუბლშემადგენლობაში გამოდიოდა.

2016 წელს ყირიმის ჩემპიონატის მონაწილე სიმფეროპოლის "ტავრიაში" სულ რაღაც 20 დღე ირიცხებოდა. ასევე იყო მოლდოვის "აკადემიასა" და აზერბაიჯანულ აზალ-ში, ბოლოს კი ისრაელის რანგით მესამე ლიგის კირიათ-ატას "მაკაბიში" აგორებდა ბურთს.

"ჩვენ კარგად ვითამაშეთ, მაგრამ ბოლო მომენტში თავდაჯერებულობა დაგვაკლდა. პირველ ტაიმში რეალური საგოლე მომენტები გვქონდა. სამწუხაროდ, მათი გამოყენების ნაცვლად, ბურთი საკუთარ კარში მივიღეთ და ცუდ მდგომარეობაში აღმოვჩნდით.

მეორე ნახევარში წონასწორობის აღდგენა შეგვეძლო, მაგრამ ვერც ეს მოვახერხეთ. ჩვენ ძალიან კარგ გუნდს შევხვდით", - ამბობს "კიშვარდას" მთავარი მწვრთნელი ელემერ კონდასი.

ქართველის გოლით...

ერთი კვირაა, წყალტუბოს "სამგურალი" თურქეთის კურორტ სიდეში ჩემპიონატისთვის სრული დატვირთვის ემზადება. გუშინ იმერულმა კლუბმა ბელეკში მეორე ამხანაგური შეხვედრა უკრაინის პრემიერლიგის ბინადარ ლვოვის "კარპატისთან" გამართა.

წყალტუბოელთა პრესსამსახურის ცნობით, "სამგურალმა" მატჩი აქტიურად დაიწყო და პირველივე წუთზე, საჯარიმოში გაბრიელ საღრიშვილის წაქცევისთვის, არბიტრს პენალტი უნდა დაენიშნა, მაგრამ სხვაგვარად განსაჯა.

შემდეგ უკრაინელებმა მეტი სისწრაფის ხარჯზე უპირატესობა მოიპოვეს და "სამგურალის" კართან სახიფათო მომენტებმა იმატა. მეკარე ალექსანდრე ნუცუბიძემ ორი ძალიან რთული ბურთი მოიგერია, მაგრამ ამბროსი ჩაჩუას წინააღმდეგ ვეღარაფერი გააწყო:

ქართული წარმოშობის უკრაინელს მცველი უშლიდა ხელს, მაგრამ მაინც მოახერხა ზუსტად დარტყმა და "კარპატი" დააწინაურა - 1:0. 45-ე წუთზე, მირიან შვედის გოლით, უკრაინელებმა სხვაობა გაზარდეს - 2:0.

მეორე ტაიმში უკრაინელთა რიგებში ქართველი მცველი ნიკა სანდოხაძე გამოჩნდა. წყალტუბოელები იბრძოდნენ და გოლის გატანაც შეეძლოთ - შეცვლაზე შესული მამუკა ღონღაძე ივან ლობაის გასცდა და მეკარესთან პირისპირ გადიოდა, როცა უკრაინელი მცველი ეუხეშა.

ლობაიმ "ბოლო იმედის" ჯარიმისთვის წითელი ბარათი დაიმსახურა, ღონღაძე კი ამ ეპიზოდის გამო შესაცვლელი გახდა. გუნდები ამის შემდეგაც ხისტად თამაშობდნენ. დარჩენილ დროში ანგარიში აღარ შეცვლილა.

სამგურალი: ნუცუბიძე, ბანძელაძე, ნერგაძე, ბიბილაშვილი, ხელაძე, ბრეგვაძე, გოგიჩაიშვილი, ჯანელიძე, გოგუაძე, საღრიშვილი, ჩხეტიანი; შეცვლაზე: კაკუშაძე, კილაძე, ლაღაძე, ხარაბაძე, ღონღაძე, მანაგაძე, ენდელაძე, ჩავჩიძე.

მომდევნო ამხანაგურ მატჩს "სამგურალი" 17 თებერვალს დანიურ "ფრედერისიასთან" გამართავს.

სპარინგი თურქმენეთის ჩემპიონთან

"საბურთალო" თურქეთში ახალი სეზონისთვის მზადებას აგრძელებს. გიორგი ჭიაბრიშვილის გაწვრთნილები ხვალ მორიგ ამხანაგურ შეხვედრას გამართავენ - ამჯერად, თბილისელები თურქმენეთის ჩემპიონატის პირველადგილოსან "ალტინ ასირს" შეხვდებიან.

მატჩი თბილისის დროით 17:30 საათზე დაიწყება.

"საბურთალომ" მეორე შეკრებაზე ოთხი მატჩი გამართა და ოთხივე ფრედ ითამაშა.

ლევადიამ არც ბათუმელები დაინდო

თურქულ შეკრებაზე ბათუმის "დინამო" ამხანაგურ მატჩში ტალინის "ლევადიას" დაუპირისპირდა. ესტონეთის თასის მფლობელი და გასული სეზონის მეორეადგილოსანი თურქულ შეკრებაზე საჩხერის "ჩიხურასაც" შეხვდა და 5:1 დაამარცხა.

ტალინელებმა არც ბათუმელები დაინდვეს და 3:0 გაიმარჯვეს. სამწუხარო ისაა, რომ "ლევადიამ" ჩვენს გუნდს ასეთი ანგარიშით დამსახურებულად აჯობა.

ესტონური კლუბის სპორტული დირექტორის, სერგეი პარეიკოს ცნობით, პირველ ტაიმში უპირატესობას ბათუმელები ფლობდნენ. მაგრამ "ლევადიამ" მეორე ნახევარში მდგომარეობა გამოასწორა და აჭარულ "დინამოს" 3 უპასუხო გოლი გაუტანა.

გასაოცარია, ასე როგორ დაეცა ჩვენი ფეხბურთი, რომ ესტონური კლუბი ქართულ კლუბებს ასეთი ანგარიშებით უგებს.

დინამო (ბთ): შოვნაძე, ჩალაძე, გოგიტიძე, ჭელიძე, გაგოშიძე, შარიქაძე, თევდორაძე, დეკანოიძე ფლამარიონი, ქავთარაძე; სათადარიგოები: ტაკიძე, ფარტენაძე, სამსონია, ვარშანიძე, ილურიძე, აბუსელიძე, კვარაცხელია, კეკუა.

ყოველდღიური სპორტული გაზეთი "ლელო"
1915
მკითხველის კომენტარები / 0 /
მსგავსი ამბები
რუბრიკის სხვა სიახლეები
;