ქართველის აღიარება! როგორ მოხვდა გიორგი ჩაკვეტაძე მსოფლიოს სიმბოლურ ნაკრებში

ძალიან მაგარი ამბავი: InStat-მა ოქტომბრის მსოფლიოს სიმბოლურ ნაკრებში გიორგი ჩაკვეტაძეც დაასახელა. სპორტული ანალიტიკით ცნობილი ავტორიტეტული კომპანიის რჩეულ 11 ფეხბურთელს შორის საქართველოს ნაკრების შემტევი ნახევარმცველი მე-5 ადგილზე აღმოჩნდა.

მაღალი სანდოობის მქონე InStat-ი მოთამაშის შესაფასებლად InStat Index-ს იყენებს - უნიკალურ მაჩვენებელს, რომლითაც ფეხბურთელს აფასებენ როგორც ერთ კონკრეტულ თამაშში, ასევე მთელი სეზონის განმავლობაში. ამ პროგრამის მთავარი უპირატესობა ის არის, რომ Index-ი მკაცრი ალგორითმის გამოყენებით ავტომატურად გამოითვლება და არა - ცალკეულ სპეციალისტთა სუბიექტური შეხედულებებით.

კომპანიის ოფიციალურმა ვებგვერდმა საუკეთესოები 21-წლამდელ მოთამაშეთა შორის შეარჩია და სასიხარულოა, რომ ქართველი ამ სიმბოლურ ნაკრებში პირველად მოხვდა.

"Instat წარმოგიდგენთ თვის საუკეთესო მოთამაშეთა გუნდს, სადაც 21-წლამდელი ფეხბურთელები შედიან. ჩვენი სქემაა 3-4-3. InStat Index-ის მიხედვით, ამ მოთამაშეებს თავის პოზიციაზე მთელს მსოფლიოში საუკეთესო მაჩვენებლები აქვთ. რა სიურპრიზებია? "დორტმუნდიდან" ორი მოთამაშეა - დან აქსელ ზაგადუ და აშრაფ ჰაკიმი. ასევე, გვსურს ყურადღება შევაჩეროთ ბელგიის ჩემპიონატში მოთამაშე ორ ახალგაზრდა ფეხბურთელზე - გიორგი ჩაკვეტაძესა ("გენტი") და ვიქტორ ჯეიმს ოსიმჰენზე ("შარლერუა")", - წერს InStat Index-ის ოფიციალური გვერდი.

სიმბოლური ნაკრები კი ასე გამოიყურება: 

მეკარე - ჯანლუიჯი დონარუმა (მილანი, 293);

მცველები - აშრაფ ჰაკიმი (დორტმუნდი, 325), დან აქსელ ზაგადუ (დორტმუნდი, 316), ნუსაირ მაზრაუი (აიაქსი, 334);

ნახევარმცველები - უსემ ოუარი (ლიონი, 286), გიორგი ჩაკვეტაძე (გენტი, 314), ჯასტინ კლუივერტი (რომა, 314), კაი ჰავერტცი (ლევერკუზენი, 310);

თავდამსხმელები - ვიქტორ ჯეიმს ოსიმჰენი (შარლერუა, 311), კილიან მბაპე (პსჟ, 396), ფიოდორ ჩალოვი (ცსკა, 288).

ფრჩხილებში მითითებულია ერთგვარი მარგი ქმედების კოეფიციენტი. ამ კოეფიციენტით, როგორც ვთქვით, ჩაკვეტაძე საუკეთესო 11 მოთამაშეს შორის მე-5 ადგილზეა.

 

1. კილიან მბაპე 396
2. ნუსაირ მაზრაუი 334
3. აშრაფ ჰაკიმი 325
4. დან აქსელ ზაგადუ 316
5. გიორგი ჩაკვეტაძე 314
5. ჯასტინ კლუივერტი 314
7. ვიქტორ ჯეიმს ოსიმჰენი 311
8. კაი ჰავერტცი  310
9. ჯანლუიჯი დონარუმა 293
10. ფიოდორ ჩალოვი 288
11. უსემ აუარი 286

 

ქართველი ფეხბურთელი მხოლოდ ერთხელ აღიარეს მსოფლიოში: 1997 წელს, იტალიასთან მატჩის შემდეგ, "სქაი სპორტმა" ოქტომბერში მსოფლიოს საუკეთესო მოთამაშედ "ჯვაროსნების" მეკარე ნიკა ტოგონიძე აღიარა. მას შემდეგ 21 წელი გავიდა და ქართველი არათუ საუკეთესოდ, არამედ, საუკეთესოებშიც კი პირველად მოხვდა.

936
მკითხველის კომენტარები / 0 /
მსგავსი ამბები
რუბრიკის სხვა სიახლეები