ქართველი მოჭადრაკეები კრეტაზე ევროპის გუნდურ ჩემპიონატში გამოვლენ

წლეულს 27 ოქტომბრიდან 7 ნოემბრამდე ჰალკიდიკი (საბერძნეთი) მოჭადრაკეთა ევროპის გუნდურ ჩემპიონატს უმასპინძლებს. შეჯიბრებაში საქართველოს ქალ-ვაჟთა ნაკრები გუნდებიც მოსინჯავენ ძალებს.

მსგავს ასპარეზობებში ჩვენები 1992 წლიდან მონაწილეობენ. მაშინ საქართველოს ქალთა გუნდმა დებრეცენში მესამე ადგილი დაიკავა. ხუთი წლის შემდეგ ჩვენებმა პულაში ჩემპიონობა მოიპოვეს. მას შემდეგ ქართველი მოჭადრაკე ქალები ჩემპიონები არ გამხდარან, მაგრან ორ-ორჯერ მეორე და მესამე ადგილებზე გავიდნენ: 2005 წელს გეტებორგსა და 2009 წელს ნოვი სადში მხოლოდ ჩემპიონებს ჩამორჩნენ და ვერცხლის მედლები ერგოთ. 2011 წელს პორტო კარასსა და 2015 წელს რეიკიავიკში მესამე ადგილებს დასჯერდნენ.

რაც შეეხებათ ქართველ დიდოსტატ ვაჟებს, მათ მხოლოდ ერთხელ - 2003 წელს პლოვდივში დაიმსახურეს ბრინჯაოს მედალი.

- ქართველი მოჭადრაკეები 2017 წლის გუნდური ჩემპიონატისთვის კარგა ხანია, მონდომებით ემზადებიან. - გვითხრა საქართველოს ჭადრაკის ფედერაციის პრეზიდენტმა გიორგი გიორგაძემ. - იმის მიუხედავად, რომ ამ შეჯიბრებას 2018 წლის მსოფლიო საჭადრაკო ოლიმპიადისთვის მზადების ერთ-ერთ ეტაპად განვიხილავთ, ქალებისგან მედლებს, ვაჟებისგან კი პირველ ათეულში მოხვედრას ველით.

ვაჟთა გუნდის შემადგენლობა უკვე ცნობილია. კრეტაზე ჩვენი ქვეყნის სპორტულ ღირსებას დაიცავენ ბაადურ ჯობავა, მიხეილ მჭედლიშვილი, ლევან ფანცულაია, დავით ჯოჯუა და ლუკა პაიჭაძე. ნაკრების მთავარი მწვრთნელი და კაპიტანია ზურაბ სტურუა. ნაკრებმა რამდენიმე დღის წინათ დასრულა ერთკვირიანი საწვრთნელი შეკრება ლიკანში.

ევროპის საკლუბო თასის გათამაშებიდან (სადაც ქალთა ნაკრების წევრობის რამდენიმე კანდიდატმა ბათუმის "ნონასთან" ერთად მთავარი პრიზი მოიპოვა) დაბრუნების შემდეგ ნაკრების მწვრთნელ და კაპიტან ელიზბარ უბილავას (მეორე მწვრთნელია ხვიჩა სუპატაშვილი) თავკაცობით ლიკანს მიაშურეს ნანა ძაგნიძემ, ნინო ბაციაშვილმა, ბელა ხოტენაშვილმა, ლელა ჯავახიშვილმა, სალომე მელიამ და მერი არაბიძემ.

ერთკვირიანი საწვრთნელი შეკრების მერე ნაკრების ხუთი წევრი დასახელდება.

ყოველდღიური სპორტული გაზეთი "ლელო"

1586
მკითხველის კომენტარები / 0 /
მსგავსი ამბები
რუბრიკის სხვა სიახლეები
;