ქართველი მსაჯების მორიგი აღიარება: ნიკა ამაშუკელი და შოთა თევზაძე რაგბი ევროპის ჩემპიონატზე იმსაჯებენ

ქართველი მსაჯები საერთაშორისო ასპარეზზე ნელ-ნელა, წინ მიიწევენ. ნიკა ამაშუკელი და შოთა თევზაძე თებერვალში ევროპის რანგით მეორე სანაკრებო ტურნირში, რაგბი ევროპის ჩემპიონატზე იმსაჯებენ.

აღსანიშნავია, რომ ქართველ მსაჯებს ამ დონის ტურნირზე მიწვევა აქამდე არასდროს მიუღიათ.

შოთა თევზაძე 9 თებერვალს, რაგბი ევროპის პირველ ტურში ბელგიისა და გერმანიის ნაკრებების შეხვედრას განსჯის. ერთი კვირის თავზე კი რუმინეთისა და გერმანიის ნაკრებების შეხვედრაზე მთავარი მსაჯი ნიკა ამაშუკელი იქნება. ის ასევე 9 მარტს ინგლისში, მასპინძელთა და იტალიელთა 20 წლამდე ნაკრებების მატჩშიც მთავარი მსაჯის ფუნქციას შეასრულებს.

აღსანიშნავია, რომ ნოემბრის ტესტებზე ნიკა ამაშუკელი ინგლისში, იაპონიისა და რუსეთის ნაკრებების მატჩისას კიდის მსაჯი იყო და მსოფლიოს ერთ-ერთ საუკეთესო არბიტრს, ჟერომ გარსეზის ასისტენტად იმუშავა. აი, როგორ იხსენებს ნიკა ამაშუკელი ამ ამბავს:

„ნოემბრის ტესტებზე მოხვედრა საკმაოდ რთულია, რადგან კონკურენცია ძალიან დიდია. ჩემთვის ეს პირველი ტესტ მატჩი იყო და ჟერომ გარსეზსთან მომიწია მუშაობამ. მსაჯთან, რომელიც ჩემი და ძალიან ბევრი სხვა სპეციალისტის მოსაზრებით, მსოფლიოს მსაჯთა მოწინავე სამეულში შედის და ძალიან დიდი შანსია, რომ მსოფლიო თასის ფინალიც იმსაჯოს.

მასთან ერთად მუშაობა უდიდესი გამოცდილება იყო, მით უმეტეს, რომ ძალიან კარგი შეხვედრა გამოვიდა. მატჩის მსვლელობაში ოთხჯერ ჩავერთე და გარჩევაზე ითქვა, რომ ოთხივე ეს გადაწყვეტილება ზუსტი იყო. მოგვიანებით ჟერომმა მომწერა და მადლობა გადამიხადა, რადგან ზუსტად შევასრულე ის დავალება, რომელიც თამაშამდე მომცა.

გარსეზსთან მომავალშიც დიდი სიამოვნებით ვიმუშავებდი. ის იყო მშვიდი მოედანზე და უპირატესობის წესს ძალიან კარგად განკარგავდა. მის ადგილას 3-4 ჯარიმით მეტს დავნიშნავდი, ის კი თამაშს უწყობდა ხელს და გუნდებიც მიყვებოდნენ. პატარ-პატარა დეტალებით ჩანდა, რატომაა ერთ-ერთი საუკეთესო მსაჯი. შევეცდები, ეს დეტალები მეც გამოვიყენო“.

ყოველდღიური სპორტული გაზეთი "ლელო"
753
მკითხველის კომენტარები / 0 /
მსგავსი ამბები
რუბრიკის სხვა სიახლეები
;