[ქართველი NBA-ში. VIDEO] გოგა ბითაძე: გულდასაწყვეტია, რომ ნაკრებში თამაშის საშუალება არ გვაქვს

"ინდიანა პეისერსის" ქართველმა ცენტრმა პირველი არხის გადაცემა "ახალ დღეში" მეტად საინტერესოდ ილაპარაკა როგორც კლუბზე, ასევე საკუთარ მომავალსა და საქართველოს ნაკრებზე.

სეზონის ფინიში

ნაციონალურ საკალათბურთო ასოციაციაში 2019-20 წლების სეზონი მარტში შეწყდა და ივლისის ბოლოს განახლდა. გოგა ბითაძის "ინდიანამ" პლეი ოფის პირველ ეტაპზე "მაიამისთან" 0:4 წააგო და ასპარეზობას გამოეთიშა.

- პანდემიით გამოწვეული შესვენების შემდეგ ცუდად ნამდვილად არ გვითამაშია - რეგულარულში ექვსი მატჩი მოვიგეთ, სამი წავაგეთ. ეს ცუდი ნამდვილად არ არის. გასათვალისწინებელია, რომ აგვისტოს მატჩებში დაგვაკლდა დომანტას საბონისი, რომელიც გუნდის ლიდერია, წლეულს "ოლ სტარში" მონაწილეობდა. პლეი ოფში ის ძალიან გვჭირდებოდა. ტრავმის გამო შესაძლებლობების 100 პროცენტს ვერ ავლენდა კიდევ ერთი ლიდერი ვიქტორ ოლადიპო. ისიც სათქმელია, რომ ხანგრძლივი შესვენების შემდეგ სეზონი სწრაფად განახლდა, მანამდე საკმარისად ვერ ვივარჯიშეთ.

0:4 წაგებას შეეწირა მთავარი მწვრთნელი ნეით მაკმილანი.

- მაკმილანი ძალიან კარგი მწვრთნელია, მაგრამ „ინდიანა პეისერსს“ დიდი ამბიციები აქვს და ხელმძღვანელობა პლეი ოფის პირველ რაუნდს, რა თქმა უნდა, არ დასჯერდებოდა.  მწვრთნელის გუნდიდან წასვლა მეორე ეტაპზე ვერგასვლამ განაპირობა. ახალ მწვრთნელზე ბევრი მსჯელობაა, ახსენებენ „ჰიუსტონის“ თავკაც მაიკ დანტონის, „სან ანტონიოს“ მეორე მწვრთნელს... თუმცა დაზუსტებით ჯერ არავინ არაფერი იცის.

აღმოსავლეთის კონფერენციის ფინალში ერთმანეთს ეთამაშებიან "მაიამი" და "ბოსტონი", დასავლეთში "ლეიკერსი" და "კლიპერსი"-"დენვერის" გამარჯვებული. ვინ გახდება NBA-ის ჩემპიონი?

- რთული სათქმელია. თუმცა ვფიქრობ, რომ ფინალში „ლეიკერსი“ და „ბოსტონი“ გავლენ. ლოსანჯელესელებს ამ სეზონში კარგი, დაბალანსებული შემადგენლობა ჰყავთ.

გოგასთვის სეზონის "ჰაილაითი" ლებრონ ჯეიმსზე დაფარება იყო...

- ლებრონ ჯეიმსი NBA-ის სუპერვარსკვლავია და არ მინდა ზედმეტად თამამად გამომივიდეს, თუმცა როდესაც მოედანზე გავდივარ, მხოლოდ გუნდის წარმატებაზე ვფიქრობ. ამისთვის ბურთის ჩაგდებაც აუცილებელია და დაფარებაც. სასიამოვნოა, რომ ასეთი დონის ვარსკვლავს დაუფარებ, მაგრამ ზოგადად რომ შევხედოთ, ეს ჩვეულებრივი სათამაშო ეპიზოდი იყო.

ადაპტაცია

ბევრის აზრით გოგას არ გაუმართლა, როცა ტანმაღალი კალათბურთელებით სევსებულ "ინდიანაში" მოხვდა.

- არგამართლებაზე არ ვფიქრობ. NBA-ში მოხვედრა უკვე დიდი გამართლებაა, თან პირველივე წელს შანსი მომეცა ისეთ გუნდში, რომელიც ყოველ წელს პლეი ოფში თამაშობს, წლეულს რეგულარული ეტაპი მეოთხე ადგილზე დავასრულეთ. მწვრთნელებიც კარგები მყავს, ხელმძღვანელობაც, თანაგუნდელებიც, გულშემატკივრებიც. მოკლედ ინდიანა მშვენიერი ადგილია, სადაც მხოლოდ კალათბურთზე შეგიძლია კონცენტრირდე. ევროპაში სხვა სტილის კალათბურთია, ამერიკაში - სხვა და წინა სეზონის ევროპაში კარგად თამაშის გამო შემადგენლობაში არავინ ჩაგსვამს - ადგილზე უნდა მოიპოვო სათამაშო წუთები. საზაფხულო ლიგაზეც ვერ ვითამაშე, რომ უკეთ წარმომედგინა თავი. ამიტომ, ვარჯიშებზე უნდა დამემტკიცებინა, რომ სათამაშო დროს ვიმსახურებ. როგორც ველოდი, რთული იყო, მაგრამ ამერიკულ ცხოვრებისა და სათამაშო სტილს მალევე ავუღე ალღო. დრო წინასწარ გამოყოფილი არავისთვისაა, ეს უნდა დაიმსახურო. მწვრთნელ ნეით მაკმილანს დიდი ზეწოლა ჰქონდა, ბევრი მატჩი უნდა მოეგო და ახალგაზრდებს სეზონის დაწყებამდე გველაპარაკა - რამდენი დროც უნდა გქონდეთ, ცოტა თუ ბევრი - ყოველთვის მზად უნდა იყოთო. ცხადია, მზად ვიყავი, მეტ სათამაშო დროსაც მოველოდი, მაგრამ...

საინტერესოა, ესაუბრებოდა თუ არა მწვრთნელი ბითაძეს მის უთამაშებლობასა თუ შეზღუდულ დროზე.

- ამ თემაზე არაფერს ამბობდა. ალბათ, ნდობის ფაქტორი იყო. მის ხელში ბევრ კალათბურთელს გამოუვლია, ახალგაზრდა მოთამაშეებს ბოლომდე არ ენდობოდა. ჩემს გარდა, სათადარიგოთა სკამზე, ბევრი ახალბედა იყო, რომლებსაც თამაში არ უწევდათ. განვლილ სეზონში პირველი, რაც ვისწავლე - ნებისმიერ დროს მზად უნდა ვიყო. რთულია, როცა მწვრთნელი ერთ მატჩში არ გენდობა, მეორეშიც არ დასჭირდები, მაგრამ შესაძლოა, მესამეში საკმარისი დრო გერგოს. ეს შანსი უნდა გამოიყენო, მოდუნება არ შეიძლება, რადგან კალათბურთელები კონტრაქტებისთვის თამაშობენ, ყველა მზადაა შეგცვალოს თუ სათანადოდ ვერ გაირჯები.

ახალი სეზონი

გოგას "ინდიანასთან" ორწლიანი კონტრაქტი აკავშირებს. შესაბამისად, მას ახლა სხვაგან არავინ გაუშვებს. თუმცა გასული სეზონის შემდეგ ალოგიკური სულაც არ არის შეკითხვა კლუბის გამოცვლასთან დაკავშირებით.

- მეც და ჩემი მენეჯერებიც ვსაუბრობთ „ინდიანა პეისერსის“ ხელმძღვანელობასთან. როგორც ვიცი, ჩემთან დაკავშირებით მომავალში დიდი გეგმები აქვთ და არც ელოდნენ, რომ პირველივე წელს ბევრს ვითამაშებდი. გუნდის შეცვლაზე ლაპარაკი ძალიან ადრეა, წინ მომავალი წელია და შესაძლოა, რადიკალურად სხვა სიტუაცია იყოს. ამასთან, მშვენიერი ურთიერთობა მაქვს კალათბურთელებთან. ყველა ძალიან კარგი ადამიანია როგორც მოედანზე, ისე მის მიღმა. ვახშმებზე ხშირად ერთად დავდივართ. თითოეულთან კარგი ურთიერთობა მაქვს, მაგრამ ვიტყვი, რომ დომანტას საბონისი მაინც ევროპელია, უფრო ადვილი იყო საერთო ენის პოვნა.

ალბათ, გაინტერესებთ, რა სხვაობას ხედავს ბითაძე ევროპულსა და ამერიკულ კალათბურთს შორის.

- NBA-ში ორგანიზება უმაღლეს დონეზეა. იქ კალათბურთი ბიზნესია, დიდ ფული ტრიალებს და  მოთამაშეების დონეც, შესაბამისად, მაღალია. ამ ლიგაში მსოფლიოს საუკეთესო კალათბურთელები არიან თავმოყრილნი. ევროპასთან შედარებით ამერიკაში ბევრი თამაშია, სწრაფი კალათბურთია, მეტი სივრცე იქმნება, ბევრი მაღალი დონის ინდივიდუალისტია... თუ დრო მომეცემა, ჩემს საქმეს სათანადოდ გავაკეთებ. შემიძლია როგორც ევროპული, ასევე ამერიკულ სტილში თამაში.

- მასთან ხშირი მიმოწერა მაქვს. თავიდანვე მეუბნებოდა, რომ ნაციონალურ საკალათბურთო ასოციაციაში მოხვედრა ძალიან რთულია, მაგრამ კიდევ უფრო რთულია იქ დამკვიდრება. ზაზა ასევე მირჩევს, რომ ზაფხული მაქსიმალურად გამოვიყენო. რა თქმა უნდა, დასვენებეც საჭიროა, მაგრამ აუცილებელია ბევრი მუშაობა, რომ გავუმჯობესდე და უფროდაუფრო უკეთესი გავხდე. ფიზიკურად კიდევ უნდა გავძლიერდე, სისწრაფეც უნდა გავაუმჯობესო... მაკლია ამ დონეზე თამაშის გამოცდილებაც, თუმცა რაც უფრო მეტ დროს მივიღებ, მით მეტ გამოცდილებას შევიძენ. საერთოდ კი ყველა კომპონენტზე ვვარჯიშობ.

საქართველოს ნაკრები

საქართველო 2022 წელს ევრობასკეტს უმასპინძლებს. მანამდე შესარჩევ ეტაპს თამაშობს, სადაც გუნდს ვერ ეხმარება ნაციონალური საკალათბურთო ასოციაციის წარმომადგენელი გოგა ბითაძე.

- როცესაც დრო მექნება და გამომიშვებენ, ყოველთვის მზად ვარ ეროვნულ გუნდში სათამაშოდ. დამიჯერეთ, ნაკრებში თამაშზე კარგი არაფერია. იმედი მაქვს, ადრე თუ გვიან მიაღწევენ შეთანხმებას, რომ სანაკრებო მატჩები და NBA-ის სეზონი ერთმანეთს არ დაემთხვეს. ნაკრების მატჩები ისედაც იშვიათადაა და გულდასაწყვეტია, რომ ჩამოსვლას ვერ ვახერხებთ.

2967
მკითხველის კომენტარები / 0 /
;