ქართველ წყალბურთელთა გოლები სერბეთში

საქართველოს წყალბურთელ ვაჟთა ნაკრების ორი წევრი - 2017 წლის სერბეთის ჩემპიონატის ვერცხლის პრიზიორი ("ვოივოდინას" შემადგენლობაში) გიორგი მესხი და ნიკოლოზ შუშიაშვილი ახალი სეზონიდან სერბეთის "შაბაცში" თამაშობენ და გუნდის ლიდერებად ყალიბდებიან.

ორი კვირის წინათ ისინი რეგიონალლიგაში (ადრიატიკის ჩემპიონატი) ჩაებნენ. აქ სერბეთის, ხორვატიის, მონტენეგროს და სლოვენიის 19 გუნდი ორ ჯგუფადაა გაყოფილი. ქართველების "შაბაცი" მეორე ჯგუფშია.

პირველ ტურში მან შინ ხორვატიის "სოლარისი" დაამარცხა - 7:2 (2 ბურთი შუშიაშვილის ანგარიშზეა). მეორე ტურში შაბაცელები ისვენებდნენ, რადგან ჯგუფში ცხრა გუნდი იბრძვის მომდევნო ეტაპზე გასასვლელად.

გასულ უქმეებზე კი სტუმრად სერბეთის "ვალიევოს" სძლიეს - 9:7 (3:2, 2:2, 2:1, 2:2). ერთი გოლი შუშიაშვილმა გაიტანა, მესამე პერიოდში მესხის დარტყმული ბურთი ძელმა აისხლიტა, ყველას გიორგის თანაგუნდელმა პეტერ ველკიჩმა დაასწრო და ანგარიშიც გაზარდა.

საგულისხმოა, რომ ლიგისთვის მოსამზადებელ პერიოდში შაბაცელებმა "ვალიევოს" შინ ორი ამხანაგური მატჩი მოუგეს დიდი ანგარიშებით და შვიდი გოლი მესხმა მიითვალა.

სამი ტურის შემდეგ ჯგუფში 9 ქულით "ცრვენა ზვეზდა" ლიდერობს. 6-6 ქულით მეორე-მეოთხე ადგილებს "შაბაცი", "ვოივოდინა" და "ვალიევო" იყოფენ, თანაც ქართველთა გუნდს, რომელიც 4 ნოემბერს ზაგრების "მედვეშაკს" უმასპინძლებს, ერთი თამაშით ნაკლები აქვს.

ყოველდღიური სპორტული გაზეთი "ლელო"
1714
მკითხველის კომენტარები / 0 /
მსგავსი ამბები
რუბრიკის სხვა სიახლეები
;