ქართული გუნდები კიევურ პროფილში - რა გვიჩვენა ტურნირმა

კიევში დასრულებული მოჭიდავეთა საერთაშორისო ტურნირისა და იქ ჩვენების წარმატებული გამოსვლის შესახებ უკვე გაცნობეთ: ორივე ნაკრებმა ჯამში 11 მედალი მოიპოვა.

ჩვენი გუნდებისთვის ეს ტურნირი ერთ-ერთი ბოლო საკონტროლო სტარტი იყო ევროპის ჩემპიონატისთვის ნაკრებების დასაკომპლექტებლად და ამიტომ საყურადღებოა კიევში ნაჩვენები შედეგები.

თავისუფალი სტილით მოჭიდავეთაგან ფინალში თეიმურაზ ვანიშვილი (57), ბექა ლომთაძე (61) და გენო პეტრიაშვილი (125) დამარცხდნენ, ხოლო მესამეზე ვლადიმერ ხინჩეგაშვილი (65), ირაკლი მწითური (92) და გიორგი მეშვილდიშვილი (125) გავიდნენ.

ლომთაძემ ტრავმის გამო ფინალში ჭიდაობა ვერ შეძლო, ოქრო ისე დათმო. ამასთან, ერთიც უნდა ითქვას - რომ არა მიკერძოებული მსაჯობა, გაცილებით უკეთესი მაჩვენებელი გვექნებოდა.

ძალზე უცნაურად ჩანს თავისუფალ ჭიდაობაში ჩვენი უპირველესი ლიდერების - ხინჩეგაშვილის, ზურაბ იაკობიშვილისა (70) და პეტრიაშვილის მარცხი.

მარსაგიშვილის დაბრუნება

დიდი პაუზის შემდეგ დაბრუნდა ევროპის ორგზის ჩემპიონი, მსოფლიოსა და ოლიმპიური პრიზიორი დავით მარსაგიშვილი, ვინც ამჯერად ახალ წონაში - 92-ში მოგვევლინა, თუმცა ტურნირის ერთ-ერთი ყველაზე დიდი იმედგაცრუებაც მისი და იაკობიშვილის უმედლოდ დარჩენაა.

ასევე მტკივნეულია ხინჩეგაშვილისა და პეტრიაშვილის წაგებებიც, მაგრამ მათ მედლები მაინც მოიპოვეს. იაკობიშვილს მასპინძელ ანდრეი კვიატკოვსკისთან ჯიუტად არ აძლევდნენ კუთვნილ ქულებს გდებების მიუხედავად. არადა, იაკობიშვილის ჟინი და მიზანსწრაფვა სამაგალითოა გუნდში - მის ჭიდაობას რაღაც სხვა ხელწერა ეტყობა, გულიანად ჭიდაობს.

მსაჯობა და ქართველ მსოფლიოს ჩემპიონთა წაგებები

საკამათო ეპიზოდები იყო მარსაგიშვილის წაგებულ შეხვედრაშიც აზერბაიჯანელ შარიფ შარიფოვთან და უფრო მეტად - პეტრიაშვილის დათმობილ ფინალში მასპინძელ ოლექსანდრ ხოციანოვსკისთან. პეტრიაშვილს მასთან ხშირად მოუგია და ახლაც ძნელად ვიფიქრებდით მარცხს. საყურადღებოა მწითურის ასეთი პროგრესი - საქართველოს ჩემპიონიცაა და ახლა სულ მთლად განიმტკიცა წონის ლიდერობა.

ხინჩეგაშვილის ახალი წონა

ხინჩეგაშვილს რაც შეეხება, მან 65 კილოგრამში პირველად იჭიდავა უცხოეთში და ზოგიერთ შეხვედრაში რჩებოდა შთაბეჭდილება, რომ სულ ცოტა ჯერ კიდევ სჭირდება სრულყოფილი ადაპტაციისთვის. მან იოლად მოიგო ქვეყნის ჩემპიონატი, მაგრამ საერთაშორისო ასპარეზი სხვაა. ჩვენი ლიდერი თითქოს ზოგჯერ ცოტა შენელებულად მოძრაობდა, თითქოს რაღაც არ ჰყოფნიდა ლაღად საჭიდაოდ.

სპორტული გმირობა გვაჩვენა ლომთაძემ, ვინც ნახევარფინალში ნახევარი წუთის შემდეგ, პირველი ილეთის შესრულებისას ფეხი იტკინა ამერიკელ მეტოქესთან და ასე ტრავმირებულმა ჩაატარა მთელი შეხვედრა. თან როგორ ჩაატარა! უწამლეს თუ არა ფეხზე და განახლდა შეხვედრა, "წისქვილზე" აიტაცა მეტოქე და მაღალი ტრაექტორიით პირდაპირ 5-ქულიანზე დააბერტყა ხალიჩას. ამ ტრავმირებულმა კაცმა მერეც ბლომად ქულები დააგროვა და საბოლოოდ ვადამდე გაიმარჯვა: 13:0.

მთავარ მწვრთნელ გიორგი იანტბელიძეს წონებში საკადრო საზრუნავი იმდენად არ აქვს, თუმცა 57-ში საქართველოს ვიცე-ჩემპიონმა ვანიშვილმა შედეგით გაუსწრო ჩემპიონ ოთარ გოგავას. უმეტეს წონებში მაინც ფავორიტებმა განიმტკიცეს იმიჯი, თუმცა არის წონები, სადაც ჩავარდნაა. 97-შიც უმედლოდ დავრჩით, მაგრამ იქ ელიზბარ ოდიკაძე რომ მაღალი კლასის სპორტსმენია, საკამათოც არაა, თუმცა "განწყობის კაცი" კი ნამდვილად არის.

ძალიან სასიამოვნოა, რომ მძიმე წონაში მეშვილდიშვილიც იმყარებს პოზიციებს - მასზე დაყრდნობა უკვე მთავარ ტურნირებზეც შეიძლება, ოღონდ ის აუცილებლად უნდა შევინარჩუნოთ და არ გავუშვათ სხვაგან. ამ წონიდან აქამდე ხომ ლევან ბერიანიძე იყო სომხეთში გადასული, გიორგი საკანდელიძემ კიევში ყატარის სახელით იჭიდავა! ცუდია, რეზერვს ასე იოლად რომ ველევით. ამით გარეთ მეტოქეებს ვიმრავლებთ, შინ კი კონკურენციას ჩვენივე ხელით ვსპობთ.


მწვრთნელებს, განსაკუთრებით ბერძნულ-რომაულში არ უყვართ საქართველოს ჩემპიონატის შედეგების რევიზირება - ჩემპიონები მიჰყავთ ევროპის პირველობაზე, თუმცა ამჯერად, ბექა როყვასა და ვლადიმერ გეგეშიძის ტანდემს საფიქრალიც ნაკლები აქვს: მათი ხუთივე მედალოსანი ისედაც ქვეყნის ჩემპიონია, ოღონდ აქ ერთი მნიშვნელოვანი მომენტია გასათვალისწინებელი: ორივე ჩემპიონი კიევში ზედა წონაში გამოვიდა.

შმაგი ბოლქვაძემ (72) ფინალში ნამდვილი შემართება და მებრძოლი სული გამოიჩინა მასპინძელ დმიტრო პინკოვთან შეხვედრაში, ვისაც 2:5 ამოუქაჩა და საბოლოოდ 7:5 მოუგო, ლევან ქავჟარაძემ (67) კი ფინალში ბევრად იოლად იმარჯვა - წმინდად მოუგო ფრანგ მამადასი სილვას.

ფინალში ნუგზარ წურწუმია (55) აზერბაიჯანელ ელდანიზ აზიზლისთან დამარცხდა, ზურაბ დათუნაშვილი (82) - ბელარუს სტანისლავ შაფარენკოსთან.
ზოგადად, ბერძნულ-რომაულმა ნაკრებმა საკმაოდ კარგი შთაბეჭდილება დატოვა.

ყოველდღიური სპორტული გაზეთი "ლელო"
1340
მკითხველის კომენტარები / 0 /
მსგავსი ამბები
რუბრიკის სხვა სიახლეები
;