ქართული დუელი მეოთხედფინალში - კალაშნიკოვა შაფათავას წინააღმდეგ

წინა კვირას თბილისელი ჩოგბურთელი ოქსანა კალაშნიკოვა რუმინელ მიხაელა ბუზარნესკუსთან ერთად წყვილებში ლუქსემბურგის ქალთა საერთაშორისო ტურნირში (საპრიზო ფონდი 226 750 დოლარი) მონაწილეობდა. ქართულ-რუმინულმა დუეტმა სტარტზე ასპარეზობის მეორე ნომერ შუკო აოიამასა (იაპონია) და ჟაოსუნ იანის (ჩინეთი) აჯობა - 6:4, 1:6, 10:7, მაგრამ მეოთხედფინალში გერმანელებთან - ანა-ლენა ფრიედსამსა და ანტონია ლოტნერთან დამარცხდა - 3:6, 4:6.

კალაშნიკოვა ამჟამად საფრანგეთში იმყოფება და 100 000-იან ტურნირში იასპარეზებს. ბელგიელ მარინა ზანევსკასთან ერთად მესამე ნომრადაა განთესილი და პირველ წრეში თავისუფალი იყო. მეოთხედფინალში ეს ტანდემი სოფიო შაფათავას და ემილი სმიტს (დიდი ბრიტანეთი) შეხვდება.

სოფიომ და მისმა მეწყვილემ გუშინ 67 წუთში პრარტანა ტომბარესა (ინდოეთი) და პანა უდვარდის (უნგრეთი) 6:4, 6:3 სძლიეს.

შაფათავა ფრანგული შეჯიბრების ერთეულთა ტურნირში საკვალიფიკაციო ეტაპიდან ჩაება. სტარტზე ამერიკელი ჩიარა შოლი 69 წუთში 6:3, 6:3 დაამარცხა. ოკეანისგაღმელმა შვიდი, ქართველმა ექვსი ეისი მიითვალა, შოლმა 9 ორმაგი შეცდომა დაუშვა, შაფათავამ - ერთი, ოღონდ მან 14-დან მხოლოდ 5 ბრეიკპოინტი გამოიყენა, მეტოქემ 8-დან - ორი.

მეორე წრეში ჩვენებური მასპინძელ მანონ არგანგიოლის დაუპირისპირდა. მოწინააღმდეგეები კორტზე 71 წუთის განმავლობაში იმყოფებოდნენ. ფრანგის ანგარიშზეა 5 ეისი და ამდენივე ორმაგი შეცდომა, შაფათავასი, შესაბამისად, ორი და ერთი. მანონმა 4-დან 2, სოფიომ 9-დან 4 ბრეიკპოინტი გამოიყენა. საბოლოოდ, შაფათავამ 6:3, 6:4 გაიმარჯვა.

ძირითად ბადეში გასასვლელი მატჩი ქართველმა ჩოგბურთელმა გუშინ, 23 ოქტომბერს, შვედ კორნელია ლისტერთან გამართა. დაძაბული პაექრობა 2 საათსა და 15 წუთს გაგრძელდა. შაფათავას 5 ეისის წილ შვედის აქტივში 14 ეისია, თანაც არც ერთი ორმაგი შეცდომა არ დაუშვია და 2-დან ერთი ბრეიკპოინტი გამოიყენა, თუმცა პაექრობა მაინც დათმო - 7:6, 2:6, 4:6. ქართველი ჩოგბურთელი ძირითად ბადეში გავიდა...

* * *

წინა კვირის შედეგების გათვალისწინებით ქალ-ვაჟთა საჩოგბურთო ასოციაციებმა განახლებული რეიტინგები გამოაქვეყნეს. მსოფლიოს კლასიფიკაციაში ქართველთა მაჩვენებლები ასეთია:

ქალები
ერთეულები: 332 (337). სოფიო შაფათავა (131), 362 (348). ეკატერინე გორგოძე (113), 544 (535). მარიამ ბოლქვაძე (51).

წყვილები: 71 (74). ოქსანა კალაშნიკოვა (1000), 230 (233). სოფიო შაფათავა (300), 323 (325). ეკატერინე გორგოძე (175), 629 (568). მარიამ ბოლქვაძე (55), 745 (746). თათია მიქაძე (34), 952 (964). სალომე დევიძე (19).

ვაჟები
ერთეულები: 53 (55). ნიკოლოზ ბასილაშვილი (887), 999 (1000). გიორგი ცივაძე (11), 1275 (1286). ალექსანდრე ბაკში (4), 1659 (1663). ირაკლი მეტრეველი (1), 1943 (1956). ვაჟა შუბლაძე (1).

(იბეჭდება მცირე ცვლილებით)
ყოველდღიური სპორტული გაზეთი "ლელო"

2530
მკითხველის კომენტარები / 0 /
მსგავსი ამბები
რუბრიკის სხვა სიახლეები