ქართული კალათბურთი პაატა გურასპაულმა ჩაიბარა

საქართველოს კალათბურთის ფედერაციას ახალი პრეზიდენტი ჰყავს - პაატა გურასპაული. შეგახსენებთ, რომ არჩევნებამდე ერთი საათით ადრე შიო ხეცურიანმა კანდიდატურა მოხსნა, რის შემდეგაც დარჩა ერთი კანდიდატი.

საარჩევნო ყრილობას 34-დან 27 დელეგატი დაესწრო, რომელთაგან ყველამ მიიღო მონაწილეობა არჩევნებში. აქედან ხმების 80 პროცენტი პაატა გურასპაულს ერგო და იგი მომდევნო ოთხი წლით აირჩიეს კალათბურთის ფედერაციის პრეზიდენტად.

შიო ხეცურიანმა არჩევნებამდე საათით ადრე კანდიდატურა მოხსნა

10 საათზე სასტუმრო "რუმსში" კალათბურთის ფედერაციის პრეზიდენტობის კანდიდატმა შიო ხეცურიანმა საგანგებო ბრიფინგი მოაწყო, რომელზეც თავისი კანდიდატურის მოხსნის შესახებ განაცხადა:

"მინდა მადლობა გადავუხადო ყველას, ვინც ამ უსამართლობასთან ბრძოლაში გვერდში მედგა. ეს უსამართლობა დღემდე გრძელდება, ახლაც არ ვიცით ზუსტად დელეგატთა სია.

ჩემი გუნდით ვცდილობდი ქართული კალათბურთი პროგრესისკენ წამეყვანა, მაგრამ ვიღაც-ვიღაცების პირადი ინტერესები უფრო მაღლა დადგა, ვიდრე ქართული კალათბურთი. ვხსნი კანდიდატურას. მადლობა გულშემატკივრობისთვის.

დარჩა ერთი კანდიდატი, რომელსაც პრეზიდენტად აირჩევენ. წარმატებას ვუსურვებ მას. ვაღიარებ, რომ დავმარცხდი უსამართლობასთან ბრძოლაში."

პაატა გურასპაული: გპირდებით, რომ...

კალათბურთის ფედერაციის პრეზიდენტად არჩევის შემდეგ პაატა გურასპაულმა მხარდაჭერისთვის ყველას მადლობა გადაუხადა და პასუხისმგებლობაზე ილაპარაკა:

"სიხარულს ვერ დავარქმევ იმას, რასაც ახლა განვიცდი - მთელი სიცხადით ვიგრძენი ის პასუხისმგებლობა, რაც პრეზიდენტად არჩევის შემდეგ დამეკისრა.
მინდა სიტყვა დავდო, რომ რასაც აქამდე ვაკეთებდი ქართული კალათბურთისთვის, გზიდან არ გადავუხვევ, გავაკეთებ მაქსიმუმს და იმაზე მეტსაც, რაც შემეძლება.

ჩემი გუნდი საკალათბურთო საზოგადოებაა. ჩვენი კარი ყველასთვის ღიაა, გთხოვთ მოსვენება არ მომცეთ, მოვისმენ ჯანსაღ კრიტიკას, მოსაზრებებს, რომ პროგრამა, რომელიც აქამდე წარმოვადგინე, მაქსიმალურად განვახორციელო.

წინასაარჩევნოდაც ვამბობდი, რომ პრეზიდენტად არჩევის შემთხვევაში ჩემი ერთ-ერთი პირველი ნაბიჯი გამგეობის გაფართოება და მისი ქმედითუნარიანობის გაზრდა იქნება. სწორედ ამიტომ, უკვე ჩავნიშნეთ რიგგარეშე ყრილობის თებერვალში გამართვა, სადაც ჩემი ინიციატივით გამგეობის წევრთა რაოდენობა 11-დან 15-მდე გაიზრდება.

რაც შეეხება სადღეისო სიტუაციას, გამგეობაში მინდა შევიყვანო ახალი წევრები: ვახტანგ ნაცვლიშვილი, ლაშა გამყრელიძე, მიხეილ აბულაძე და რომც არ მინდოდეს, ამჟამინდელი წესდებით გამგეობის თავმჯდომარე კალათბურთის ფედერაციის პრეზიდენტია. თებერვალში დავაყენებ საკითხს, რომ პრეზიდენტი გამგეობის თავმჯდომარე აღარ იყოს."

კომენტარები

ვახტანგ ნაცვლიშვილი: პრეზიდენტს ირჩევენ დელეგატები და არა მოთამაშეები

კალათბურთის ფედერაციის საპრეზიდენტო არჩევნების შემდეგ საკუთარი მოსაზრება დააფიქსირა საქართველოს ნაკრების ყოფილმა წევრმა, "დინამოს" პრეზიდენტმა ვახტანგ ნაცვლიშვილმა:

"რამდენიმე წლის წინ ვამბობდი, რომ კალათბურთის ფედერაციის წესდება არ იყო გამართული. მას მერე ფედერაციის წევრებმა იმუშავეს და დღეს ფიბა-ს სტანდარტებს სრულად შეესაბამება.

ესაა ჩვენი საკალათბურთო კონსტიტუცია და ამით უნდა ვიხელმძღვანელოთ. წესითა და რიგით, დღეს არჩევნებზე ერთი კანდიდატი არ უნდა ყოფილიყო. მინდა ვისურვო, რომ მომდევნო არჩევნებში 2-3 კანდიდატი იყოს, კონკურენციაც ღირსეული იქნება და სწორედ დელეგატები გადაწყვეტენ, ვინ აირჩიონ პრეზიდენტად.

მინდა კიდევ ერთხელ აღვნიშნო - პრეზიდენტის არჩევა დელეგატებზე უნდა იყოს დამოკიდებული, არამც და არამც კალათბურთელებზე. ჩემი კარიერა მაძლევს ამის თამამად დაფიქსირების საშუალებას. კარიერა ათი წლის წინათ დავასრულე და მას შემდეგ კალათბურთში ვარ.

დელეგატებიც სწორედ ის პიროვნებები არიან, რომლებიც ზოგი სუპერლიგის კლუბს წარმოადგენს, ზოგი ბავშვთა საკალათბურთო სკოლებს. დიდი წვლილი შეგვაქვს კალათბურთის განვითარებასა და მომავალი თაობების აღზრდაში".

ვლადიმერ ბოისა, კალათბურთის ეროვნული ფედერაციის გამგეობის წევრი:

"მივულოცავ პაატა გურასპაულს გამარჯვებას და წარმატებას ვუსურვებ მომდევნო 4 წლის განმავლობაში. მაქსიმალურად დავუდგები გვერდში ახალ პრეზიდენტს, რადგან, ფედერაციაში ჩემი მუშაობის გამოცდილებიდან გამომდინარე, კარგად ვიცი ეს რამდენად რთულია. გასული ოთხი წელი წარმატებული იყო ქართული კალათბურთისთვის და წინსვლა კვლავაც გაგრძელდება."

მიხეილ გაბრიჩიძე, კალათბურთის ეროვნული ფედერაციის გამგეობის წევრი:

"პირველ რიგში, მადლობას გადავუხდი ყველა იმ ადამიანს, ვინც გვერდით მედგა ამ 4 წლის მანძილზე. ჩვენ ძალიან საინტერესოდ ვიმუშავეთ და ერთად ბევრი მნიშვნელოვანი პროექტის განხორციელება შევძელით. ა

რჩევნები ჩატარდა სამართლიან და მშვიდ გარემოში, 34 დელეგატიდან 27 გამოცხადდა და საკუთარი სურვილი ყველამ დააფიქსირა. საერთო ხმების 82% -დან 80%-მა მხარი პაატა გურასპაულს დაუჭირა. მინდა ვუსურვო პაატას, გაამართლოს ის დიდი მოლოდინი, რაც საკალათბურთო ოჯახს აქვს და მჯერა, მას ამ მიზნების მიღწევაში გვერდით ყველა დაუდგება."

ყოველდღიური სპორტული გაზეთი "ლელო"
523
მკითხველის კომენტარები / 0 /
მსგავსი ამბები
რუბრიკის სხვა სიახლეები