ქართული კლასიკოს რეკორდი და პასუხისმგებლობა

25 მაისს, ქუთაისის "რამაზ შენგელიაზე" გამართულ "ქართულ კლასიკოზე" მშვენიერი ამბავი მოხდა: "ტორპედო"-"დინამოს" დაპირისპირებას 10 ათასამდე მაყურებელი დაესწრო...

მე-13 ტურისა და წრის ცენტრალურ მატჩში ეროვნული ლიგის მიმდინარე სეზონის რეკორდი დამყარდა. ამ გუნდების შეხვედრა მაყურებელს ყოველთვის იზიდავდა და ახლაც ასე მოხდა, მაგრამ ქუთაისის სტადიონზე 10 ათასამდე მაყურებლის შეკრება მაინც მოულოდნელი იყო.

ეროვნული ლიგის ბოლო წლების სეზონების სარეკორდო მაჩვენებელიც ქუთაისს ეკუთვნის - ეროვნულ ლიგაში 2017 წლის რეკორდიც "რამაზ შენგელიაზე" დამყარდა და ესეც ამ გუნდების შეხვედრაზე მოხდა: მაშინ "ტორპედო"-"დინამოს" 9 ათასამდე ქომაგმა ადევნა თვალი.

მომხდარს ქუთაისის "ტორპედოს" ოფიციალური ვებგვერდი სიამაყით გამოეხმაურა:

"ხალხი, რომელიც თავის რეკორდს თვითონვე აუმჯობესებს"...

"გასულ სეზონში, ქუთაისში, "ტორპედოსა" და "დინამოს" დაპირისპირებას 9 ათასამდე გულშემატკივარი დაესწრო, რაც დასწრების მხრივ, საუკეთესო მაჩვენებელი იყო. გუშინდელ შეხვედრას 10 000-მდე გულშემატკივარი დაესწრო... ისევ ქუთაისში!" - წერს "ტორპედოს" გვერდი.

იმ დროს, როცა ქართული გუნდები ევროთასებზე ვერაფერს აღწევენ და პირველივე ეტაპიდან ვარდებიან, ეს დაუჯერებელი მაჩვენებელი იყო. ცხადია, ყველაფერი ისე მოხდა, როგორც ყოველთვის - თავიდან ტრიბუნებზე ამდენი ხალხი არ იყო, მაგრამ პირველი ტაიმის ბოლოსკენ 14-ათასიანი არენა ლამის მთლიანად შეივსო. ესეც უცნაური ქართული ტრადიციაა, მაგრამ კარგია, რომ ხალხი მოვიდა.

მეორე წრეში, იმედია, საკუთარ ქალაქებს დაუბრუნდებიან ფოთის "კოლხეთი", "სამტრედია" და ბოლნისის "სიონი" და იმედია, მაყურებლის დასწრების მაჩვენებელი გაუმჯობესდება, რაც წლევანდელ სეზონში კატასტროფულად შემცირდა.

ცხადია, მიზეზი ისაა, რომ წელს გუნდების უმრავლესობა მომთაბარე ცხოვრებას ეწევა და თავის ქალაქში არ თამაშობს - დასახელებული სამი გუნდის გარდა, ასეა "რუსთავი", რომელსაც წელს საკუთარ ქალაქში დაბრუნების იმედი არ უნდა ჰქონდეს - "ფოლადის" სტადიონის გადაცემის საკითხი გამაღიზიანებლად გაიწელა და საშველი არ დაადგა.

მოკლედ, 10 ათასი გულშემატკივარი ეროვნული ლიგის მატჩზე - საოცარი ციფრია და მეტყველებს იმაზე, რომ მძიმე მდგომარეობის მიუხედავად, ქართულ ფეხბურთს ამდენი გულშემატკივარი ჰყოლია.

წარმოგიდგენიათ, ჩვენმა გუნდებმა ევროთასებზე ოდნავ მაინც რომ გაიბრძოლონ და თითო ეტაპი მაინც გადალახონ, მაყურებელი ტრიბუნებისკენ როგორ შემოტრიალდება?

მაგრამ ჯერ გუნდები საამისოდ არაფერს აკეთებენ. ევროთასები კარს მოგვადგა და არც ერთი ევრომონაწილე არ გაძლიერებულა. მეტიც, რაც "სამტრედიაში" ხდება, დიდ გულისტკივილს იწვევს - რა პერსპექტიული გუნდი იყო, მაგრამ საგრძნობლად დასუსტდა და ევროპალიგის საკვალიფიკაციო ეტაპზე მის გასვლას გულშემატკივარი შიშით ელოდება.

სამწუხაროდ, დაპირების მიუხედავად, არც ქუთაისის "ტორპედოა" მოფერიანებული, არც თბილისის "დინამო" და საჩხერეს "ჩიხურა". არადა, მათ და მათ ხელმძღვანელობას გულშემატკივარი მცირეოდენ იმედს უკავშირებს და წლევანდელ ევროსეზონში ბევრად იქნება დამოკიდებული, ამ 10 ათასი მაყურებლისგან ტრიბუნას რამდენი შემორჩება.

ეს კი დიდი პასუხისმგებლობაა. თუ წლევანდელი ევროთასებიც შარშანდელივით სამარცხვინოდ ჩავაგდეთ, ჩათვალეთ, რომ ეს 10 ათასი და რეკორდები კვლავ მოგონებებში გადაინაცვლებს, როგორც საამაყო 13 მაისი...

ყოველდღიური სპორტული გაზეთი "ლელო"
1392
მკითხველის კომენტარები / 0 /
მსგავსი ამბები
რუბრიკის სხვა სიახლეები
;