'ქართული კლასიკოს' წინ: დინამო მოგებაზე ფიქრობს, ტორპედო სერიის გაგრძელებაზე

თბილისის "დინამოსა" და ქუთაისის "ტორპედოს" ფეხბურთელები და მწვრთნელები იმედოვნებენ, რომ დღეს "დინამო არენა" ცარიელი არ იქნება.
"დინამო" თავის დიღმის ბაზაზე ემზადებოდა, ხოლო ქუთაისის "ტორპედო" თენგიზ სულაქველიძის სახელობის აკადემიაში..

კაპიტნის მოწოდება

შარშანდელი სეზონის გმირი როინ კვასხვაძე მორიგ "კლასიკოს" სრულ მზადყოფნაში ხვდება. ქუთაისის "ტორპედოს" კაპიტანი იმედოვნებს, რომ მაყურებელი მოვა და გუნდები კარგ საფეხბურთო გარემოში ითამაშებენ.

"ამ შეხვედრას ყოველთვის ძალიან დიდი ინტერესი ახლავს - შარშანდელმა შეხვედრამ გამოაჩინა, რომ ეს ინტერესი მარტო საქართველოში არაა. მას სხვა თამაშებთან შედარებით მეტი მაყურებელი ჰყავს. ჩემთვის მნიშვნელოვანია და ყოველთვის მინდა, რომ ეს დაპირისპირება ჩავატარო, ქუთაისის "ტორპედოს" სახელი წარმოვადგინო და გუნდის წარმატებაში ჩემი წვლილი შევიტანო. "დინამო" ძალიან კარგი გუნდია და ძალიან კარგი ფეხბურთელებითაა დაკომპლექტებული.

ხვალინდელ შეხვედრას რაც შეეხება, მიმაჩნია, რომ დაძაბული და სანახაობრივი იქნება. ასეთ შეხვედრებს გულშემატკივარი ალამაზებს და მოვუწოდებ, მოვიდნენ და შევეცდებით, კარგი საღამო გამოვიდეს", - ამბობს როინ კვასხვაძე.

სერიის გაგრძელების იმედი

ქართულ კლასიკოში კახა ჩხეტიანი ფეხბურთელის რანგშიც მონაწილეობდა, ახლა კი ქუთაისელთა მთავარი მწვრთნელია და გუნდს მორიგი კლასიკოსთვის ამზადებს. მისი ხელმძღვანელობით "ტორპედოს" ბოლო 14 თამაში არ წაუგია. ქუთაისელთა დამრიგებელი ამ სერიის გახანგრძლივებას იმედოვნებს:

"ადრე, ფეხბურთელობის დროს მხოლოდ იმაზე ვფიქრობდი, ჩემი მოწინააღმდეგე დინამოელის წინააღმდეგ როგორ მეთამაშა. რა თქმა უნდა, ამ შეხვედრის მწვრთნელის რანგში ჩატარება ბევრად უფრო რთულია, რადგან ახლა მთელ გუნდზე, თითოეულ ფეხბურთელზე, მათ მდგომარეობასა და შედეგზე ვარ პასუხისმგებელი. მაგრამ მე ისეთი ფეხბურთელები მყავს, მოედანზე ყოველთვის აიოლებენ და იმედი მაქვს, ხვალაც ასე იქნება".

ჩვენი თამაშები ყოველთვის
სანახაობრივია

თბილისის "დინამოს" კაპიტანი ლაშა თოთაძე იმედოვნებს, რომ ტრადიცია არ დაირღვევა და გულშემატკივარი კარგ ფეხბურთს იხილავს:
"ეს მატჩი ჩემთვის ასოცირდება კარგ განწყობასთან, რადგან სხვა მატჩებთან შედარებით, სტადიონზე ყოველთის უფრო მეტი გულშემატკივარი დადის. ჩვენი თამაშები ყოველთვის დაძაბულია, მაგრამ უმრავლეს შემთხვევაში ლამაზი სანახავია და ბევრი გოლი გადის, რაც ფეხბურთს სჭირდება.

მიმაჩნია, რომ ხვალინდელი შეხვედრაც მაყურებელს დააინტერესებს. ხვალ ჩვენ ძალიან კარგი მეტოქე დაგვიპირისპირდება, ტრადიციული და ძლიერი შემსრულებლები. მაგრამ ჩვენ ჩემპიონობისთვის ვიბრძვით, მოგება ჰაერივით გვჭირდება და შევეცდებით, 3 ქულა მოვიპოვოთ და "საბურთალოსთან" ჩამორჩენა შევამციროთ".

რევანშის წყურვილი

ერთ-ერთი ყველაზე დასამახსოვრებელი შეხვედრა გასული სეზონის ბოლო ტურში შედგა - ქუთაისელებმა დრამატულ მატჩში ლიდერი დინამო თბილისში 1:0 დაამარცხეს და ჩემპიონობა წაართვეს. ეს წაგება "დინამოში" დღემდე მტკივნეულად ახსოვთ.

კახა კაჭარავა, თბილისის "დინამოს" მთავარი მწვრთნელი: "რა თქმა უნდა, შარშანდელი წაგებისთვის რევანშის სურვილი არის. ჩვენ წარსული უნდა დავივიწყოთ, მაგრამ უნდა გვახსოვდეს. ამიტომ ხვალ შევეცდებით, რომ წინა თამაშების შეცდომები გამოვასწოროთ.

ახლა ჩვენ სხვადასხვა ამოცანები გაგვაჩნია - "დინამო" ჩემპიონობისთვის იბრძვის, "ტორპედო" სამეულში მოსახვედრად და ეს მიზნები და ტრადიციები მაფიქრებს, რომ ხვალ ძალიან კარგი თამაში გველის. მაგრამ ასეთ შეხვედრას მაყურებელი სჭირდება, რომ ფეხბურთელებმა მეტი სტიმულით ითამაშონ. დიდი იმედი მაქვს, რომ ხვალ "დინამო არენაზე" ხალხი მოვა და კარგი საფეხბურთო გარემო იქნება. ჩვენ კი ვალდებულები ვარ, რომ დარჩენილი მატჩები მოვიგოთ, "საბურთალოს" დავეწიოთ და მიზანს მივაღწიოთ".

ყოველდღიური სპორტული გაზეთი "ლელო"
989
მკითხველის კომენტარები / 0 /
მსგავსი ამბები
რუბრიკის სხვა სიახლეები
;