ქართული კლუბები ევროთასებზე: ვინ რამდენი? - ჩიხურა უეფასგან ნახევარ მილიონ ევროს ელოდება

ევროთასებზე მოასპარეზე ოთხი ქართული გუნდიდან ორი გათამაშებას გამოეთიშა - ევროპალიგაზე თბილისის "დინამო" სლოვაკურ "დუნაისკა სტრედასთან" დამარცხდა, ხოლო "სამტრედია" - ყაზახურ "ტობოლთან".

შემდგომ ეტაპზე გავიდა მხოლოდ "ჩიხურა", რომელმაც ისრაელის "ბეითარი" დაამარცხა, ხოლო ქუთაისის "ტორპედო", რომელმაც მოლდოვურ "შერიფთან" წააგო, ახალი ფორმატის წყალობით ჩემპიონთა ლიგიდან ევროპალიგაზე გადაერთო. ამ გუნდებიდან ევროთასებზე ყველაზე მეტი თანხა ქუთაისის "ტორპედომ" გამოიმუშავა.

"დინამო" და "სამტრედია" პირველ საკვალიფიკაციო ეტაპზე მონაწილეობისთვის 240 ათას ევროს (დაახლოებით, 684 ათას ლარს) მიიღებენ. ამავე სტადიაზე "ბეითარის" დამარცხებისთვის, "ჩიხურას", 240 ათას ევროსთან ერთად, დამატებით 260 ათასი ევროც ერგება, ანუ, ჯამში 500 ათასი ევრო, რაც დაახლოებით 1 425 000 ლარია.

უეფასგან ყველაზე მეტ თანხას "ტორპედო" მიიღებს - ჩემპიონთა ლიგის პირველ საკვალიფიკაციო ეტაპზე მონაწილეობისთვის ქუთაისელები 280 ათას ევროს (789 ათასი ლარი) მიიღებენ, ევროპალიგის მეორე საკვალიფიკაციო ეტაპზე გადასვლისთვის კი კიდევ 260 ათასი ევრო დაერიცხებათ.

ანუ საქართველოს მოქმედ ჩემპიონს 540 ათასი ევრო (1 539 000 ლარი) გარანტირებული აქვს. ხოლო, თუ "ტორპედო" ფარერების "ვიკინგურის" ბარიერს დაძლევს, კიდევ 280 ათასი ევროთი გამდიდრდება და სულ 820 ათასი ევრო (2 337 000 ლარი) დაუგროვდება, რაც ჩვენი რეალობისთვის საკმაოდ ნორმალური ბიუჯეტია. მთლიანობაში, ამ ეტაპზე ქართულმა კლუბებმა ევროგათამაშებაში 1,52 მილიონი ევრო გამოიმუშავეს.

რაც შეეხება უეფას საკლუბო რეიტინგში საქართველოს ქულებს: ფრეზე 0,125 ქულაა, ხოლო მოგებაზე - 0,250. პირველ ეტაპზე საქართველომ 0,725 ქულა მოიპოვა, რაც ბოლო სამ წელიწადში საუკეთესო შედეგია. ყველაზე მეტი ქულა (სიხარულთან ერთად) "ჩიხურამ" მოგვიტანა 0,375 (ფრე და მოგება), "ტორპედომ" 0,250 (1 მოგება), თბილისის "დინამომ - 0,125, ხოლო "სამტრედიამ" - არც ერთი.

ევროტურნირებს შემორჩენილი ორი ქართული გუნდი, "ტორპედო" და "ჩიხურა", იმის იმედს გვაძლევს, რომ წელს ჩვენი შედეგი გაუმჯობესდება. ბოლო წლებმა 45-ე ადგილზე დაგვაქვეითა, შარშანდელი შედეგებით კი უეფას 55 ქვეყანას შორის... 54-ე ადგილზე ვიყავით.

ყოველდღიური სპორტული გაზეთი "ლელო"
885
მკითხველის კომენტარები / 0 /
მსგავსი ამბები
რუბრიკის სხვა სიახლეები