ქართული მედიის რჩეული გიორგი ჩაკვეტაძე გახდა

გიორგი ჩაკვეტაძე "სარბიელის" ტრადიციული გამოკითხვის გამარჯვებულია. ის საქართველოში არ იმყოფებოდა და მე-18 გამოკითხვის შედეგები უჩვეულოდ გვიან ამიტომ გამოცხადდა.

გამოკითხვაში სულ 79 ჟურნალისტი მონაწილეობდა. საქართველოს ნაკრებისა და "გენტის" შემტევმა ნახევარცველმა ხმების აბსოლუტური უმრავლესობით გაიმარჯვა - ის პირველ ადგილზე 67-მა ჟურნალისტმა დაასახელა და 214 ქულა დააგროვა. მეორეზე 85 ქულით მოსკოვის "ლოკომოტივის" მცველი საბა კვირკველია გავიდა, ხოლო მესამეზე 63 ქულით - საქართველოს ნაკრების კაპიტანი და ყაზახური "ტობოლის" ნახევამცველი ჯაბა კანკავა.

ნომინანტებში სულ 24 ფეხბურთელი დასახელდა, რომელთგან ეროვნულ ლიგაში მხოლოდ ექვსი თამაშობს - როინ კვასხვაძე, ბუდუ ზივზივაძე (ორივე - ქუთაისის "ტორპედო"), ლაშა შინდაგორიძე, გიორგი გაბედავა (ორივე - "საბურთალო"), ლევან კუტალია ("დინამო" თბ) და მიხეილ ალავიძე ("დინამო" ბთ).

ჩაკვეტაძის ბავშვობა მისმა მწვრთნელმა, "ოქროს თაობის" თბილისის "დინამოს" მცველმა, თამაზ კოსტავამ გაიხსენა: "წვიმა იყო, თოვლი თუ ქარი, ვარჯიშს არ აცდენდა და თავიდანვე ეტყობოდა, ფეხბურთის სიყვარული და შრომის უნარი. გიორგის წარმატებები მახარებს და იმედია, რომ მისი სახით საქართველოს დიდი ფეხბურთელი გაეზრდება".

ალექსანდრე ჩივაძე: "დაახლოებით 10 წლის წინ, თამაზმა მთხოვა, ტურნირზე საუკეთესო მოთამაშე შეარჩიეო. მივედი ფინალის საყურებლად და 15 წუთში ვუთხარი, რად უნდა ამას დაკვირვება, ეს ქერათმიანი ბიჭი აშკარად გამოირჩევა-მეთქი... გავიდა წლები და გიორგი ეროვნულ ნაკრებში მოხვდა. მან ეს აღიარება დაიმსახურა. საქართველოში კი საუკეთესოდ აღიარება ბევრს ნიშნავს".

"ჩემთვისძალიან საპატიო და სასიხარულოა გამარჯვება იმ გამოკითხვაში, რომელშიც წინა წლებში ჟურნალისტებმა ბევრი ვარსკვლავი აღიარეს. მადლობა ქართველ ჟურნალისტებს, რომლებმაც გამომარჩიეს. ჩემი დიდი სურვილია, რომ ეროვნულ ნაკრებში წარმატებით ვითამაშო, ევროპის ჩემპიონატზე მოვხდეთ და ჩვენი თამაშით ყველა გავახაროთ", - თქვა თავად გამარჯვებულმა.

ცხადია, ჩაკვეტაძეს გავესაუბრეთ და დავინტერესდით, როგორ მიდის რეაბილიტაციის პროცესი: "ახლა "გენტი" შეკრებაზეა და მე ჯერ კიდევ ინდივიდუალურად ვვარჯიშობ. მაგრამ რეაბილიტაცია კარგად მიდის და იმედი მაქვს, მოედანს ოქტომბრის ბოლოს დავუბრუნდები".

ბელგიური მედიის ცნობით, დიდია ალბათობა, რომ ახალი სეზონიდან "გენტისთვის" სამი ქართველი, თან სამივე - გიორგი შეუტევს: ჩაკვეტაძესა და ქვილითაიასთან ერთად, გუნდშია უნგრული "უიპეშტიდან" დაბრუნებული გიორგი ბერიძეც, რომელიც ამხანაგურ მატჩშებში ბრწყინვალედ გამოიყურება.

"საკონტროლო თამაშებიდან გამომდინარე, ბერიძე უნდა დაბრუნდეს და გამიხარდება, თუ "გენტში" სამი ქართველი ერთად ვითამაშებთ", - ესეც ჩაკვეტაძის სიტყვებია.

დავით მუჯირი, ფეხბურთის ფედერაციის გენერალური მდივანი: "ჩემთვის ძალიან მნიშვნელოვანია ჯილდო, რომელსაც მედიის წარმომადგენლები საკუთარი გემოვნების მიხედვით გადასცემენ გამარჯვებულს. როცა საქართველოს ჩემპიონატში დაიწყეს საუკეთესო ფეხბურთელის გამოვლენა, გამარჯვებული მე გავხდი და ეს ჯილდო სასიამოვნოდ მახსენდება. 20 წლის ბიჭისთვის დიდი სიხარული და მოტივაცია იყო ამხელა აღიარება. გიორგიც დაახლოებით ამ ასაკისაა და ის მთლიანად საქართველოს საუკეთესო მოთამაშედ დაასახელეს, რასაც ვულოცავ - ეს დიდი პასუხისმგებლობაა! დარწმუნებული ვარ, მისთვისაც ეს დამატებითი მოტივაცია გახდება".

სფფ-ის გენმდივანმა ეროვნული ნაკრებისთვის ახალგაზრდა მოთამაშის  მნიშვნელობაზეც ილაპარაკა: "გიორგი ეროვნული ნაკრებისთვის ძალიან მნიშვნელოვანი ფეხბურთელი გახდა. იმედია, მალე გამოჯანმრთელდება და ეროვნულ გუნდს კიდევ უფრო მეტად გამოადგება. მას ეს პასუხისმგებლობა კარგად აქვს გაცნობიერებული და ვუსურვებ წარმატებას როგორც სანაკრებო, ისე საკლუბო დონეზე".

შეგახსენებთ, რომ ეს საქართველოში ერთადერთი გამოკითხვაა, რომელშიც სპორტული ჟურნალისტები მონაწილეობენ და რომლის მიზანიც სეზონის საუკეთესო ქართველი ფეხბურთელის გამოვლენაა. გამოკითხვა შარშან, 10-წლიანი პაუზის შემდეგ აღდგა. პირველად გამარჯვებული 1993 წელს დააჯილდოვეს და ის თბილისის "დინამოს" ნახევარმცველი გიორგი ქინქლაძე გახდა. საინტერესოა, რომ ეს იყო ერთადერთი შემთხვევა, როცა საუკეთესოდ ეროვნულ ჩემპიონატში მოთამაშე ფეხბურთელი დასახელდა. მას შემდეგ გამარჯვებულები მხოლოდ ლეგიონერები ხდებოდნენ.

შოთა არველაძე კი ერთადერთია, რომელმაც პრიზი სამ კლუბში გამოსვლის შედეგად მიიღო - პირველად "ტრაბზონსფორში" თამაშით აღიარეს, შემდეგ - "აიაქსსა" და "ალკმაარში". ისიც აღსანიშნავია, რომ შოთამ პირველი და მესამე აღიარება (1994, 2007) 13-წლიანი პაუზის შემდეგ დაისმახურა.

ყველაზე მეტჯერ (4) ჯილდო ეროვნული ნაკრების ყოფილმა კაპიტანმა და "მილანის" ექსმცველმა კახა კალაძემ მიიღო.

ფოტო: sarbieli.com

ყოველდღიური სპორტული გაზეთი "ლელო"
1154
მკითხველის კომენტარები / 0 /
მსგავსი ამბები
რუბრიკის სხვა სიახლეები
;