ქართული რაგბი 2018: დასანანიც, სასიხარულოც...

წლევანდელ სეზონში ქართული რაგბის ქომაგებს გაორებეული შეგრძნება, ერთგვარად დაუკმაყოფილებლობის გრძნობა დარჩათ.

ეროვნული ნაკრები თავისთვის უჩვეულოდ, არასტაბილურად გაისარჯა, რასაც, ცხადია, როგორც ობიექტური, ისე სუბიექტური მიზეზები ჰქონდა. სამაგიეროდ სრული ტრიუმფით მოიარეს თავიანთი უმაღლესი რანგის ტურნირები ასაკობრივმა ნაკრებებმა...

სეზონი ევროპა რაგბის ჩემპიონატით გაიხსნა. „ბორჯღალოსნებს“ ტიტული და ანთიმოზ ივერიელის თასი დასაბრუნებელი ჰქონდათ და საამისოდ მცდელობა არ დაუკლიათ. გუნდში რამდენიმე ახალი მოთამაშე გამოჩნდა. ხუთივე მეტოქე დავამარცხეთ, აქედან ბელგიასა და გერმანიას მშრალი ანგარიშით მოვუგეთ. ბოლო მატჩში კი „დინამო არენაზე“ რუმინეთის ნაკრები 25:16 ვძლიეთ. შედეგად, რაგბი ევროპის ჩემპიონისა და ანთიმოზ ივერიელის თასიც თბილისში დავატოვებინეთ.

სეზონის სტარტი კარგი კი გამოდგა, მაგრამ ივნისის ტესტებზე ამას გაგრძელება არ მოჰყოლია. იქამდე, გაზაფხულზე საქართველოს ასაკობრივმა ნაკრებებმა გაგვახარეს. ჯერ პოლონეთში გამართულ ევროპის 18-წლამდელთა ჩემპიონატზე ვთქვათ. მას შემდეგ, რაც საქართველოს ამ ასაკის ნაკრებმა ზედიზედ სამჯერ მეორე ადგილი დაიკავა. ბრიტანელებმა და იტალიის ნაკრებმა ასპარეზობაზე უარი თქვეს.

დარჩა ერთი საფრანგეთი, რომელიც ჩვენი გუნდის ერთადერთი კონკურენტი იყო. ფინალში სწორედ ფრანგებს დავუპირისპირდით და ძალიან რთულ პირობებში, გადაუღებელი წვიმის თანხლებით, უმძიმეს ბრძოლაში დავამარცხეთ მრისხანე მეტოქე. ჩვენი 18-წლამდელები ევროპის ჩემპიონები გახდნენ!

18-წლამდელთა წარმატების ლოგიკური გაგრძელება იყო საქართველოს ახალგაზრდული (U20) ნაკრების მიერ ნაჩვენები შედეგი საფრანგეთში გამართულ ახალგაზრდულ მუნდიალზე. მით უფრო, რომ 20-წლამდელთა გუნდს ევროპის ჩემპიონთა გუნდიდან რამდენიმე გამორჩეული მორაგბე დაემატა, რომლებმაც ამჯერადაც დიდი წვლილი შეიტანეს იმ სამ გამარჯვებაში, რომელსაც ახალგაზრდულმა ნაკრებმა მიაღწია.

მსოფლიოს ჩემპიონატზე ჩვენმა გუნდმა პირველად მოიგო 3 მატჩი. ამ სამიდან ორში „უმცროსმა ბორჯღალოსნებმა“ 6 ერის გუნდები, ირლანდიისა და შოტლანდიის ნაკრებები დაამარცხეს. გადამწყვეტი იყო იაპონიის ნაკრებთან გამარჯვება, რითიც ელიტაში დავიმკვიდრეთ ადგილი. ბოლოს „სკოტების“ ძლევის შედეგად მე-9 ადგილზე გავედით.

მომავალ, 2019 წელს „უმცროსი ბორჯღალოსნები“ ისევ ელიტაში ითამაშებენ. ამჯერად ჯგუფურ ტურნირზე მეტოქეები ახალი ზელანდიის, სამხრეთ აფრიკისა და შოტლანდიის ნაკრებები იქნებიან.

ამას მოჰყვა ჩვენი ეროვნული გუნდის წარუმატებელი ასპარეზობა ივნისის ტესტებზე. სხვადასხვა მიზეზის გამო, ოკეანია-აზიურ ტურნეში გუნდის ძირითადი შემადგენლობის რამდენიმე წამყვანი მოთამაშე დაგვაკლდა. სანამ ჩვენი გუნდი ტესტების სათამაშოდ გაემგზავრებოდა, თბილისში „გასახურებელი“ მატჩი გამართა ფრანგ „ბარბაროსებთან“ და საკმაოდ დაძაბულ ბრძოლაში 16:15 გაიმარჯვა.

ამას მოჰყვა პირველი გამარჯვება ივნისის ტესტებზეც. „ბორჯღალოსნებმა“ სუვაში ტონგას ნაკრებს იმავე ანგარიშით მოუგეს. მომდევნო მეტოქე ჩვენი გუნდისთვის პრინციპული მოწინააღმდეგე გახლდათ. ფიჯელები მსოფლიოს ათეულში არიან და ამ დროისთვის თავის ისტორიაში საუკეთესო გუნდი ჰყავთ. ამასთან ერთად, ფიჯელები 2019 წლის მსოფლიოს თასზე ჯგუფურ ეტაპე ჩვენი მეტოქეები არიან. პირველ ტაიმში მეტოქეს გასაქანი არ მივეცით და მოვუგეთ. თუმცა შესვენების შემდეგ მოედანზე ყველაფერი რადიკალურად შეიცვალა. ფიჯის ნაკრებმა ყველა კომპონენტში უპირატესობა მოიპოვა და 37:15 დაგვამარცხა.

„ბორჯღალოსნები“ წყნარი ოკეანის კუნძულებიდან იაპონიაში გადაბარგდნენ. ქალაქ ტოიოტაში, სადაც 2019 წლის მსოფლიოს თასზე პირველ მატჩს უელსის ნაკრებთან გავმართავთ, იაპონიის ნაკრებს დავუპირისპირდით. ჩვენმა გუნდმა პირველად წააგო „მშრალი“ ანგარიშით 1998 წლის შემდეგ - 0:28.

ყოველივე ამას გუნდის მთავარი მწვრთნელის ავსტრალიელ ასისტენებთან გამომშვიდობება მოჰყვა. მათ ნაცვლად კი, ზედ ნოემბრის ტესტების წინ, საქართველოს რაგბის კავშირმა ერთი მაღალი დონის ინგლისელი სპეციალისტი გრემ როუნთრი მოიწვია.

ნოემბრის ტესტებს ივნისის მსგავსად დანაკლისით შევხვდით. „ბორჯღალოსნებმა“ ერთბაშად 8(!) წამყვანი მოთამაშე მოისაკლისეს. არადა, პირველივე მატჩში პრინციპულ მეტოქესთან იტალიის ნაკრებთან დაპირისპირება გველოდა. ქომაგთა დესანტი მრავლად გადავსხით ფლორენციაში, მაგრამ ამანაც ვერ გვიშველა - მატჩში, რომელსაც მთელი მსოფლიოს სარაგბო სამყარო ყურადღებით ადევნებდა თვალს, 17:28 დავმარცხდით.

„ბორჯღალოსნებმა“ რეაბილიტირება ორ საშინაო მატჩში შეძლეს, როცა ერთმანეთის მიყოლებით ჯერ სამოა, შემდეგ კი ტონგა დაამარცხეს. ტონგას წლეულს ორჯერ მოვუგეთ. სამოაც არაერთხელ გაგვიწბილებია...

ერთი სიტყვით, თუ ფიჯის ნაკრებს არ ჩავთვლით, კუნძულელებს ერთობ გავუშინაურდით. ტონგას კი უკვე ზედიზედ მეოთხედ ვძლიეთ. ბოლო ორ მატჩში ოთხი დებიუტანტი გამოჩნდა - თედო აბჟანდაძე, გურამ გოგიჩაშვილი, ბექა გიგაშვილი და ზურაბ ძნელაძე. ოთხივემ თავი ბრწყინვალედ წარმოაჩინა და თამამად შეიძლება ითქვას, რომ ეროვნულმა ნაკრებმა შესანიშნავი შევსება მიიღო.

სეზონი საქართველოს ჩემპიონის, თბილისის „ლოკომოტივის“ ევროპული ეპოპეით დასრულდა. „რკინიგზელებმა“ „კონტინენტის ფარის“ გათამაშებაში სამი შეხვედრა გამართეს და ორში გამარჯვებულნი დარჩნენ. საამაყოა, რომ პირველ მატჩში შინ იტალიურ „კალვიზანოსთან“ მარცხის შემდეგ, ლოკომოტიველებმა ძალების მობილიზება შეძლეს და ორ გასვლით ჯახში ჯერ იტალიური „რომა“ დაამარცხეს, შემდეგ იმავე „კალვიზანოს“ სძლიეს. „რკინიგზელები“ ჯგუფიდან გასვლისთვის ბრძოლას აგრძელებენ. მათი ბედი 2019 წლის იანვარში გადაწყდება...

ყოველდღიური სპორტული გაზეთი "ლელო"
649
მკითხველის კომენტარები / 0 /
მსგავსი ამბები
რუბრიკის სხვა სიახლეები
;