რას ფიქრობენ ქართველი ჟურნალისტები? ცხადაძე არ უნდა გაეშვათ... ვაისს კობიაშვილიც უნდა მიჰყვეს... უნდა დარჩეს, რადგან...

...უნდა წავიდეს და მიჰყვეს მისი მომყვანი კობიაშვილიც... ლიგის ნახევარფინალამდე მწვრთნელის შეცვლა არაფერს გვარგებს... არც ვაისის წასვლაა გამოსავალი და არც მისი დარჩენა...

სულაც არ მიგვაჩნია, რომ ვლადიმირ ვაისის სამწვრთნელო კვალიფიკაცია ქართული ფეხბურთის ერთადერთი პრობლემაა, მაგრამ გვინდა თუ არა, ეროვნული ნაკრების ბოლო შედეგებიდან გამომდინარე, აქტუალურია კითხვა, რომელიც ქართული სპორტული მედიის წარმომადგენლებს დავუსვით:

უნდა დარჩეს თუ არა ვლადიმირ ვაისი საქართველოს ნაკრების მთავარი მწვრთნელის პოსტზე?

ამ კითხვის ქვეტექსტიც განვმარტოთ. ვგულისხმობთ იმას, არის თუ არა ვაისი ის მწვრთნელი, რომელსაც შეუძლია, საქართველოს ნაკრები კარგად მომზადებული მიიყვანოს არსებობის ისტორიაში უმთავრეს ბრძოლებამდე, რომელიც მომავალი წლის მარტში უნდა გაიმართოს...

ელენე ბილიხოძე (საქართველოს რადიო): - ჩემი აზრით, ვაისმა უნდა გააგრძელოს მუშაობა, რადგან წინ უეფას ერთა ლიგის ნახევარფინალური მატჩია და მანამდე მიღწეული წარმატებები ნაკრებმა სწორედ ვაისის თავკაცობით მოიპოვა.

ლაშა დვალიშვილი (რუსთავი 2): - ვლადიმირ ვაისის ხელმძღვანელობით საქართველოს ნაკრები ვერანაირ პროგრესს ვერ განიცდის და ეს ფაქტია. არ აქვს მნიშვნელობა, დანიასთან 11-მეტრიანი იყო თუ არა. დანიის ნაკრები უფრო ძლიერი გუნდია თავისი მწვრთნელით, ვიდრე საქართველოს ნაკრები. ვაისი, ჩემი აზრით, ჯერ არ უნდა დაენიშნათ საქართველოს ნაკრების მწვრთნელად და თუ დანიშნეს, აქამდე უნდა მოეხსნათ. ძალიან ვთხოვ ყველას, საზომად ნუ აიღებენ გიბრალტარს. აიღონ დანია და შვეიცარია, ამ ორ გუნდთან ოროსანი ბავშვებივით ვიყავით. ჩემი აზრით, ვაისის წინამორბედის, კახა ცხადაძის ხელმძღვანელობით ეროვნული ნაკრები ბევრად გააზრებულ და უკეთეს ფეხბურთს აჩვენებდა.

...არა! მეტსაც ვიტყვი - პოსტიდან უნდა გადადგეს მისი მომყვანი ლევან კობიაშვილი, რომელიც ბოლომდე იცავს ნაკრების მწვრთნელს. ერთა ლიგის ნახევარფინალში გასვლა კახა ცხადაძეს და ნებისმიერ ქართველ მწვრთნელს შეეძლო...

გიორგი დარჯანია (სარბიელი): - ჩემი აზრით, არც ვაისის წასვლაა გამოსავალი და არც მისი დარჩენა. მე ასე ვფიქრობ: უმჯობესია, სხვაგან ვეძებოთ მთავარი პრობლემის სათავე.

გიგა გვენცაძე (საქართველოს ტელევიზიის პირველი არხი): - უნდა გააგრძელოს. ჩემი აზრით, მწვრთნელის შეცვლა ამ ეტაპზე ნაკრების შედეგებს ვერ გააუმჯობესებს. ვაისის მუშაობის საბოლოო შეფასება უნდა მოხდეს 2020 წლის მარტის ბოლოს, ერთა ლიგის გათამაშების დასრულების შემდეგ.

კობა ინასარიძე (სარბიელი): - არა! მეტსაც ვიტყვი - პოსტიდან უნდა გადადგეს მისი მომყვანი ლევან კობიაშვილი, რომელიც ბოლომდე იცავს ნაკრების მწვრთნელს. ერთა ლიგის ნახევარფინალში გასვლა და ლატვია-ყაზახეთ-ანდორის ძლევა უფრო მარტივად შეეძლო კახა ცხადაძეს და ნებისმიერ ქართველ მწვრთნელს. ვაისმა ერთი თამაშის წაგება მეკარეს დააბრალა, მეორე - მსაჯს, მერე ცხოვრების დაბალ დონეს... მოკლედ, ყველაფერს, საკუთარი თავისი თავის გარდა. ვიდრე ერთა ლიგიდან ევროპის ჩემპიონატზე გასვლის შანსიც დაგვიკარგავს, სლოვაკი პოსტიდან აუცილებლად უნდა წავიდეს და მას ზედ უნდა მიჰყვეს ჩამომყვანი ლევან კობიაშვილი.

გიორგი მელქაძე (worldsport.ge): - ვლადიმირ ვაისის მოღვაწეობა საქართველოს ნაკრებში ბოლო ხანს ძალიან დიდ კითხვის ნიშნებს აჩენს. თუმცა, ერთია ერთა ლიგაზე, ყველაზე დაბალ დივიზიონში დადებითი შედეგის მიღება, და მეორე - შესარჩევ ციკლში, სადაც ევროპის საუკეთესო ნაკრებების წინააღმდეგ გიწევს თამაში. ნათლად გამოჩნდა, რომ საქართველოს ნაკრები ჯერ კიდევ შორსაა თანამედროვე ფეხბურთისგან. ბუნებრივია, უნდა ვახსენოთ დანაკლისიც, რომელიც ამ მატჩებში გვქონდა და ცალსახაა, ეს თავს იჩენდა. პრაქტიკულად, ვაისს დანიაში სრულიად განსხვავებული შემადგენლობის დაყენებამ მოუწია, მაგრამ უარყოფითია ის, რომ მხოლოდ ორი შემტევით ვითამაშეთ. არ მესმის, რატომ არ ეძლევათ შანსი გიორგი ხარაიშვილს, გიორგი აბურჯანიას, ლევან ხარაბაძეს... ვფიქრობ, ამ ფეხბურთელებს შეუძლიათ, საქართველოს ნაკრებს ახალი სისხლი შემატონ. ვაისის გათავისუფლებას რაც შეეხება, მედალს ორი მხარე აქვს - ბუნებრივია, ნაკრების თამაში ბოლო მატჩებში არ იყო დამაკმაყოფილებელი და აქ საქმე მხოლოდ შედეგში არ არის, არამედ, მინდა ხაზი გავუსვა თამაშის ხარისხს, რომელიც ნამდვილად არ იყო სასურველი. მარტამდე, როცა ერთა ლიგის ნახევარფინალი დაიწყება, დიდი დროა და ბევრი რამ გამართლებაზე იქნება დამოკიდებული - ტრავმების ასეთი სიხშირის შემთხვევაში, ჩვენი შანსი საკმაოდ დაბალი იქნება. ვაისის გათავისუფლება, შესაძლოა, იყოს ლოგიკურიც, რადგან შეცდომები მოუმრავლდა, მაგრამ ვინ მოვა მის ნაცვლად? ყველამ კარგად ვიცით, რომ მაღალი დონის, ჩვენთვის მისაღები სპეციალისტი საქართველოს ნაკრებში მუშაობას, დიდი ალბათობით, არ დათანხმდება. გარდა ამისა, ყოველთვის წარუმატებლობაში მთავარ დამნაშავედ მწვრთნელს მივიჩნევდით, თუმცა უკვე ბევრი მაგალითი გვაქვს იმისა, რომ მწვრთნელი მხოლოდ პირამიდის ბოლო ნაწილი იყო და პრობლემები უფრო ღრმაა და მთლად საძირკველშია. აქედან გამომდინარე, ვფიქრობ, ვაისის გათავისუფლებაზე ლაპარაკი ჯერ ნაადრევია.

ილია ნანობაშვილი (Leadersport.ge): - მოცემულ სიტუაციაში ქართული ფეხბურთის N1 პრობლემა ვლადიმირ ვაისი არ არის, არც N 2, არც N 3... ის, რაც დანიასთან მოხდა, გუშინ და დღეს არ დაწყებულა. ჩვენ შორს მათგან ვართ ეკონომიკურად, მენტალურად და ფეხბურთელების რესურსით. ტრავმებისკენ მიდრეკილი ფეხბურთელები გვყავს. მიზეზი? არასწორი აღზრდა თავის დროზე. კონკრეტულად დანიასთან წაგებას რაც შეეხება, ვაისი რთულ სიტუაციაში ჩავარდა, რადგან არ ჰყავდა საუკეთესო მცველები, დანაკლისი იყო ნახევარდაცვის შუაში, ცენტრფორვარდის პოზიციაზე... აკლდა წლის საუკეთესო ქართველი ფეხბურთელი გიორგი ჩაკვეტაძეც. ეს საკვანძო პოზიციებია. სლოვაკი მწვრთნელიც ეცადა, რომ ბევრი ნახევარმცველის ხარჯზე, როგორმე ცენტრში არ დაჩაგრულიყო. ვერ მოახერხა, შეცდა... თუმცა ვაისი იმას მაინც ახერხებს, რომ შედარებით სუსტ ნაკრებებთან პირველ ნომრად ათამაშოს გუნდი და ძლიერებთანაც პერიოდულად შეტევაზე გააკეთოს აქცენტი. და ამ სუსტებთან ნაკრები იგებს. საერთოდ, ქართული ფეხბურთი მხოლოდ ეროვნული ნაკრები არ არის. ნაკრები პირამიდის წვერია. ვაისამდე სანამ მივალთ, ბევრი რამ არის გამოსასწორებელი.

კახა ბერიძე (Leadersport.ge): - 4 თამაშის შემდეგ 3 ქულა, რა თქმა უნდა, არადამაკმაყოფილებელი შედეგია, უფრო მეტიც - მხოლოდ უარყოფითად შეიძლება შეფასდეს. შედეგი შედეგად და, თამაშის ხარისხიც ვერ ტოვებს კმაყოფილების საბაბს. ქართველი გულშემატკივარი, ალბათ, დიდი ხანია აღარ არის ილუზიებით შეპყრობილი, მაგრამ ყოველი შესარჩევი ეტაპის დაწყებას იმედის თვალით ვუყურებთ. ასე იყო ამჯერადაც. თან ერთა ლიგაზე წარმატებული თამაშის შემდეგ, მეტის მოლოდინი გვქონდა. აღარც გვახსოვს როდის ითამაშა ნაკრებმა ბოლოს ოპტიმალური შემადგენლობით, თუმცა ეს თავის გასამართლებელი მიზეზი არ უნდა იყოს. კიდევ ერთხელ გამოჩნდა, რომ ერთა ლიგა ჩვენი კალიბრის გუნდებისთვის ზედგამოჭრილი ტურნირია. ვის თავშიც ეს იდეა "მოიხარშა", დილა-საღამოს ფეხები უნდა ვბანოთ და სანთელი დავუნთოთ. ვაისი ღმერთი არ არის, თუმცა შედეგზე მწვრთნელია პასუხისმგებელი. როდესაც 1:5-ს აგებ, იქ მიზეზების ძებნა სხვაგან ან სხვაში არ უნდა დაიწყო. უნდა დარჩეს თუ არა თანამდებობაზე? ვფიქრობ ერთა ლიგის ნახევარფინალამდე მწვრთნელის შეცვლა არაფერს გვარგებს. მარტში ბელარუსთან უმნიშვნელოვანესი მატჩი გველის და სლოვაკ სპეციალისტს დაწყებული საქმის ბოლომდე მიყვანა უნდა დასცალდეს. მიზანი კი მხოლოდ ერთია - მოიგე ორი თამაში შენი დონის გუნდებთან და მოიპოვე ევროპის ჩემპიონატის საგზური. ღმერთმა ნუ ქნას და, თუ მან ეს მისია ვერ შეასრულა, მაშინ ალბათ თავად დაიხურავს ქუდს და გაგვეცლება.

ალექსანდრე მატევოსოვი (adjarasport.com): - ჩემი აზრით, ვაისმა საქართველოს ნაკრების მთავარი მწვრთნელის პოსტზე მუშაობა უნდა გააგრძელოს. ბოლო მატჩის შედეგს რაც შეეხება, ზოგადად ნაკრების პრობლემები, პირველ რიგში, ფეხბურთელების ტრავმებითაა განპირობებული. რა თქმა უნდა, ვაისის მიმართ კითხვები არის, მაგრამ ის საქართველოს ნაკრების მწვრთნელად მინიმუმ ერთა ლიგის დასრულებამდე უნდა დარჩეს. ამ ნაკრებს მწვრთნელის შეცვლა ახლა მხოლოდ ცუდს მოუტანს.

მიხეილ აბაიშვილი (საქართველოს სპორტულ ჟურნალისტთა ასოციაციის პრეზიდენტი): - ვაისმა ერთა ლიგაზე წარმატებებს მიაღწია და ობიექტურად, იმსახურებს შანსს, კარგად დაწყებული საქმე ბოლომდე მიიყვანოს. კოპენჰაგენში ძალიან სამწუხარო მარცხი ვიწვნიეთ კატასტროფული თამაშის ფონზე, მაგრამ სამართლიანობისთვის ისიც ვთქვათ, რომ ტრავმების გამო ძირითადის 8 ფეხბურთელი გვაკლდა და თან მსაჯმა სერიოზული მიკერძოება გამოავლინა. ცალსახად დადებითად ან უარყოფითად ამ კითხვას ვერ ვუპასუხებ.

პაატა ძნელაძე (სპორტული ჟურნალისტი): - მხოლოდ გიბრალტართან მოგებით ვერ ვიქნებით კმაყოფილი, მაგრამ ფაქტია, რომ წელს ვერცერთი შეხვედრა ვერ ჩავატარეთ ოპტიმალურთან მიახლოებული შემადგენლობით. რაც შეეხებს ბელარუსთან გასამართ თამაშს, ერთა ლიგა სწორედ ვაისის ხელმძღვანელობით მოვიგეთ და სამართლიანი იქნება, ბელარუსთანაც ის იყოს მთავარი მწვრთნელი.

ნიკოლოზ ნეფარიძე (ლელო): - უეფას წყალობით, საქართველოს ნაკრებს "საუკუნის შანსი" გაუჩნდა, ისტორიაში პირველად ითამაშოს ევროპის ჩემპიონატზე. ამისთვის ორი რამ არის გასაკეთებელი - 2020 წლის მარტში თბილისში დავამარცხოთ ბელარუსის ნაკრები და შემდეგ ფინალში ან კოსოვოს ან ჩრდილოეთ მაკედონიას უნდა მოვუგოთ. როგორც უკვე ვთქვი, ეს ძირითადად უეფას ნოვაციის დამსახურებაა, რომელმაც ახალი ტურნირი მოიფიქრა და ის ევროპის ჩემპიონატს დაუკავშირა. ერთა ლიგაში საქართველოს ნაკრებმა კარგად ითამაშა, მაგრამ მწვრთნელზე მეტად აქ გუნდის ლიდერების დამსახურებას ვხედავ - ყაზახეთის, ანდორის დონეს გიორგი ჩაკვეტაძის ოსტატობა და ჯაბა კანკავას გამოცდილება და მებრძოლი ხასიათიც ეყო. რაც შეეხება ვაისს, ვერ ვხედავ, რომ ამ მწვრთნელს კონკრეტული მიზნების მიღწევა ან თუნდაც გადამწყვეტი მატჩებისთვის ნაკრების მოტივაცია შეუძლია. პლუს, მატჩის მიმდინარეობისას უშვებს უამრავ შეცდომას ტაქტიკასა და შემადგენლობაში ცვლილებების კუთხით. ვფიქრობ, 2020 წლის მარტამდე კიდევ არის დრო იმისთვის, რომ ნაკრები ახალმა მწვრთნელმა ჩაიბაროს და მიზანს, ევრო 2020-ზე გასვლას მივაღწიოთ. წინააღმდეგ შემთხვევაში, ისე "ჩავუშხუილებთ" სანუკვარ ოცნებას, როგორც კომეტები - მზეს.

მიხეილ ჟორჟოლიანი (ახალი თაობა): - ჩემი აზრით, ვლადიმირ ვაისი ერთა ლიგის ბოლომდე უნდა იყოს. ახალ მწვრთნელს დრო დასჭირდება გუნდის სრულფასოვნად გასაცნობად. ამ ეტაპზე ვაისს ეს უპირატესობა აქვს. თუმცა, მან ეს უპირატესობა სწორად უნდა გამოიყენოს, რაც ვერ დავინახეთ დანიასთან. ფაქტია, ვაისს ჯგუფიდან ევროპის ჩემპიონატზე მოხვედრას არავინ თხოვს, მთავარი ერთა ლიგის პლეი ოფია. ამიტომ შესარჩევ ჯგუფში უახლოესი რეზერვი ზედმიწევნით უნდა გამოიყენოს, როტაციას უნდა მიმართოს და არსებული შემადგენლობა კომფორტულად გამოიყენის. არ არის საჭირო ერთი და იმავე ფეხბურთელების ჯიუტად გამოყენება მათთვის მიუღებელ პოზიციებზე.

გიორგი ფულარიანი (რადიო ენერჯი, სეტანტა ჯორჯია): - პირველ რიგში, მინდა ვთქვა ის, რომ კახა ცხადაძის გაშვება დიდი შეცდომა იყო, რადგან ნაკრები სწორი გზით ვითარდებოდა, შემდეგ კი, სწრაფი ცვლილების შედეგად, მოვიდა ახალი სპეციალისტი განსხვავებული ხედვით. გასაგებია, რომ ყაზახეთს, ანდორასა და მსგავსი კალიბრის გუნდებს ადრე ვერ ვუგებდით ისეთ სტილში, როგორც ეს ერთა ლიგაზე მოვახერხეთ, მაგრამ ძლიერ გუნდებთან შეხვედრაში, სამწუხაროდ, ისევ გამოჩნდა, რომ კლასით ძალიან ჩამოვრჩებით - ეს სამწუხარო რეალობაა, რომელსაც ვერ გავექცევით. რაც შეეხება ვაისს, მან ვერცერთხელ ვერ მოახერხა შემადგენლობის სწორად შერჩევა. როცა ეთამაშები ფიზიკურად ასე ძლიერ გუნდს და სკამზე გიზის გიორგი ხარაიშვილი, რომელიც ისეთ ლიგაში თამაშობს (თან გუნდის ერთ-ერთი ლიდერია), სადაც ფიზიკური მომზადებაა მთავარი კომპონენტი, როგორც მინიმუმ, ასეთი ფეხბურთელი შანსს იმსახურებს. ასევე, ჩემდა გასაკვირად, დანიელების წინააღმდეგ საერთოდ არ შემოუყვანია ვატო არველაძე, რომელიც ძალიან მონდომებულია და თუ არ ვათამაშეთ, ვერც დაიხვეწება. გარდა შემადგენლობის ვერშერჩევისა, ხშირად აგვიანებს ხოლმე ცვლილებებს, რამაც არაერთხელ დაასვა დაღი ჩვენს თამაშს. საბოლოო ჯამში, მიმაჩნია, რომ ერთა ლიგის ბოლომდე ალბათ მაინც უნდა ვაცალოთ ვაისს, შემდეგ კი მადლობა გადავუხადოთ და დავემშვიდობოთ. კიდევ ერთხელ გავიმეორებ - მე პირადად, ცხადაძის ფორმაციის ნაკრების თამაში უფრო მხიბლავდა.

ამირან შაიშმელაშვილი (Lეადერსპორტ.გე): - მიმაჩნია, რომ საკადრო პრობლემების არქონისა და მსაჯის სწორი გადაწყვეტილებების შემთხვევაშიც კი დანია საქართველოს ნაკრების დამარცხებას მაინც მოახერხებდა. მეტოქე კლასით გაცილებთ მაღლა დგას. ჯგუფში 4 მატჩიდან სამის წაგებას და მხოლოდ აუტსაიდერთან გამარჯვებას რამდენიმე მიზეზი აქვს, თუმცა მწვრთნელის ფაქტორი აქ ერთ-ერთი უკანასკნელია. უშეცდომო მწვრთნელი არ არსებობს. თანაც, ნათელია, რომ ეროვნული ნაკრები აქცენტს ერთა ლიგაზე აკეთებს, უმნიშვნელოვანესი მატჩის ჩატარებამდე კი ისეთი ცვლილების გაკეთება, როგორიც მთავარი მწვრთნელის მოხსნაა, არამართებული გადაწყვეტილება იქნება. გუნდს გადაწყობა და ბელარუსთან შეხვედრისთვის სრულფასოვნად მომზადება გაუჭირდება. ვაისი, როგორც მინიმუმ, ერთა ლიგის დასრულებამდე უნდა დარჩეს, დანარჩენს კი შედეგი გვაჩვენებს.

გიორგი პავლიაშვილი (სილკ სპორტი): - სამწუხაროა, რომ კიდევ ერთი ციკლის გამოყენება გვიწევს შემდეგი შესარჩევებისა თუ სხვა თამაშებისთვის მოსამზადებლად. მიმდინარე ციკლში ეროვნული ნაკრების გამოსვლა და შედეგები ცალსახად უარყოფითია. ასეთ დროს, რასაკვირველია, დადებითად ვერ შეფასდება ნაკრების მთავარი მწვრთნელის მუშაობა. ერთა ლიგის ჯგუფში წარმატებას 2 მთავარი მიზეზი ჰქონდა - მეტოქეების დონე და ნაკრების ლიდერი, რომელმაც თამაშების სრული უმრავლესობის ბედი პირადად გადაწყვიტა. სამწუხაროა, პერიოდულად საკმაოდ დიდი საკადრო დანაკლისი, თუმცა მაინც არის კითხვები შემადგენლობის შერჩევასა და უშუალოდ თამაშის მიმდინარეობისას ვაისის გადაწყვეტილებებზე. მიუხედად ყველაფრისა, არ ვიცი რამდენად სწორი იქნება ამ ეტაპზე მთავარი მწვრთნელის გათავისუფლება და შესაბამისად ძირეული ცვლილებების ახლიდან დაწყება. ვფიქრობ, უპრიანია ერთა ლიგაში ნაკრები კვლავ ვაისმა გაიყვანოს, ნაკრების ლიდერების დაბრუნების შემთხვევაში, ბელარუსთან და შემდეგ შეხვედრაში გამარჯვების შანსი ნამდვილად იქნება, თუმცა მანამდე აუცილებელია მიმდინარე ციკლშიც ნაკრებმა თავისი სახე შეინარჩუნოს, რათა ყოველი მატჩი დანიასთან დაპირისპირებას არ დაემსგავსოს.

ტატო ნიკურაძე (sport24.ge): - კი, მაგრამ მე ამ მწვრთნელის ტაქტიკურად სწორად წარმართული თამაში არ მახსოვს. არის დაგვიანებული ცვლილებები და მექმნება შთაბეჭდილება, რომ ვაისი ცვლილებას აკეთებს მხოლოდ ცვლილებისთვის. თითქოს, ტაქტიკურ მონახაზებში იკარგება. ზარანდია, ხარაიშვილი - არ მესმის, ამ ბიჭებს რას ერჩის? და მაინც, მას უნდა ვაცადოთ ერთა ლიგის ბოლომდე.

...სამწუხაროა, რომ კიდევ ერთი ციკლის გამოყენება გვიწევს შემდეგი შესარჩევისა თუ სხვა თამაშებისთვის მოსამზადებლად. მიმდინარე ციკლში ეროვნული ნაკრების გამოსვლა და შედეგები ცალსახად უარყოფითია. ასეთ დროს, რასაკვირველია, დადებითად ვერ შეფასდება ნაკრების მთავარი მწვრთნელის მუშაობა...

მაგდა კლდიაშვილი (საინფორმაციო სააგენტო RECORDER): - კახა ცხადაძის ნაკრებიდან გაშვებისა და ვაისის მოყვანის შემდეგ, მიუხედავად იმისა, რომ ცხადაძე ძალიან ცუდად მოიშორა ფეხბურთის ფედერაციამ თავიდან, სლოვაკი სპეციალისტის მუშაობაში მინდოდა დამენახა პოზიტივი და ვგულშემატკივრობდი მას პერსონალურადაც. მიმდინარე შესარჩევი ციკლი ვერ უძლებს ვერანაირ კრიტიკას და ვერ უძლებდა ვერც მსოფლიოს შესარჩევი, სადაც ერთი მატჩიც კი ვერ მოვიგეთ. ერთა ლიგისთვის მადლობა უეფას, თუმცა ნებისმიერი მწვრთნელი, რომელიც იმ მომენტში ეროვნული გუნდის თავკაცი იქნებოდა, ასეთი შედეგის მიღწევას შეძლებდა. ჩვენ ვხედავთ მწვრთნელს, რომელიც ზემდეტად შეშინებულია მეტოქეებთან. მაშინ, როცა ვთამაშობთ პირველ ნომრად და იშვიათად მახსენდება ასეთი თამაშები, იქაც კი არ გვაქვს გამოკვეთილად მაღალი სათამაშო ხარისხი. ასეთი იყო გიბრალტარი, რომლის პირველი ტაიმიც ასევე არადამაკმაყოფილებლად ჩაატარეს ქართველმა ფეხბურთელებმა. მესმის ვაისის, რომელსაც ჰყავს ბევრი ტრავმირებული ფეხბურთელი, მაგრამ ნაკრებში არ არსებობს პირველი და მეორე შემადგენლობა. რა კონტიგენტიც ჰყავს მწვრთნელს კონკრეტული თამაშისთვის, ისაა მისი ძირითადი ბირთვი და არ უნდა ილაპარაკოს იმაზე, რომ სათამაშო პრაქტიკა არ აქვთ ქართველ ფეხბურთელებს, რომ ბევრი ტრავმირებულია და ასე შემდეგ...

ვიდრე ვაისს ფეხბურთის ფედერაცია კონტრაქტს გაუგრძელებდა, მაშინ გვკითხეს ჟურნალისტებს, უნდა დარჩენილიყო თუ არა სლოვაკი სპეციალისტი და მე მაშინ ვფიქრობდი, რომ ის უნდა დარჩენილიყო. მხოლოდ იმისთვის თამაში, რომ ნაკლები ანგარიშით წავაგოთ, ან ძალიან თუ გაგვიმართლა, არ წავაგოთ, დამღუპველია. კოსოვოს ნაკრებმა ბულგარეთს სტუმრად მოუგო და ამის შემდეგ არგუმენტები როგორ უნდა მივიღოთ ვაისისგან? როგორ შეიძლება მსაჯისკენ გაიშვირო ხელი, როცა ნაკრები სრული შემადგენლობით ჩამოშლილია?! როცა თამაშობ მშიშარა ფეხბურთს თავდამსხმელის გარეშე? გიბრალტართან მოგება ზუსტად იმის ტოლფასი იყო, რაც ერთა ლიგაზე გააკეთა ნაკრებმა და ანდორაში მოუგებელი მატჩი უკვე იძლეოდა განგაშის სიგნალს, თუმცა ჩვენ, ყველა, ძალიან ბედნიერები ვიყავით, რომ ნახევარფინალის საგზური მოვიპოვეთ და ახლა ვეთამაშებით ბელარუსს, რომლის გუნდებიც ევროსარბიელზე სისტემატურად და სტაბილურად გამოდიან. იქაც უნდა ვილაპარაკოთ, რომ ქართველებს სათამაშო პრაქტიკა და ფიზიკური კონდიციები შესაბამისობაში არ აქვთ? როცა იცი, რა შემადგენლობაც გყავს, სწორედ მათ უნდა მისცე რწმენა, თავდაჯერება და არა - პირიქით, რასაც ვერ ვხედავთ ვაისის შემთხვევაში. ვფიქრობ, ეს ყველაფერი ჩვენ უკვე ნანახი გვაქვს და ფსიქოლოგიურად უფრო მეტად გაანადგურებს ეროვნულ ნაკრებს. ამ შემთხვევაში ვაისის მხარეს ვერ ვიქნები, მშიშარა მწვრთნელი არ სჭირდება საქართველოს. მას სჭირდება გაბედული ადამიანი, რომელიც საკუთარ მოთამაშეებს თვითრწმენას დაუბრუნებს და ასე არ ჩამოიშლებიან, როგორც ეს დანიასთან ვნახეთ. გიბრალტართან მოგების შემდეგ იმედი გამოვთქვი, რომ ეს ჩვენი პირველი და უკანასკნელი მოგება არ იქნებოდა ჯგუფში, თუმცა, ახლა იმაშიც არ ვარ ბოლომდე დარწმუნებული, გიბრალტარს გასვლაზე თუ მოვუგებთ, ანდორის მსგავსად. ვფიქრობ, სლოვაკმა მწვრთნელმა საქართველოს ნაკრებში თავი ამოწურა, თუმცა, სამწუხაროდ, იმასაც ვფიქრობ, რომ ფეხბურთის ფედერაცია მისი მუშაობით ისეთივე კმაყოფილია, როგორც ეს წინა მოუგებელი შესარჩევი ციკლის დროს იყო.

ბასკი სხირტლაძე (cristalsport.ge): - ვაისი აუცილებლად უნდა დარჩეს.

ნიკოლოზ ტაბატაძე (სილკ სპორტი): - ამ ეტაპზე, რადიკალური გადაწყვეტილების მიღების აუცილებლობა არ არსებობს. მოკლე პერსპექტივაში, ერთა ლიგის დასკვნითი ეტაპის წარმატებით ჩასატარებლად, ვაისზე კარგი კანდიდატურის შერჩევა შეუძლებლად მიმაჩნია და ვთვლი, რომ ამ სპეციალისტის ბედი სწორედ ამ ტურნირის საბოლოო შედეგმა უნდა გაარკვიოს.



8712
მკითხველის კომენტარები / 23 /
ამატაკი
0
ამდენი მომხრე ჟურნალისტიდან, ერთს მაინც გეთქვათ კონკრეტულად რომელ თამაშში რა აღმოაჩინეთ ისეთი რასაც თქვენი ვაისისადმი ვითომ იმედები ეყრდნობა
საბაგიო-13
0
დისკუსია კარგია, მაგრამ ცოტა უხერხულია, როცა დილეტანტები და ჩასაფრებულები აკეთებენ ანალიზს. ვაისის დამცველად არანაირად არ გამოვდდგები, მაგრამ მაღალ საზოგადოებასთან მაქვს ერთი შეკითხვა? როდესმე ვარჯიში თუ ჩაგიტარებიათ? ან ერთხელ თუ დაფიქრებულხართ რას ნიშნავს ძირითადი შემადგენლობის შერჩევა? ან რა კრიტერიუმებით ხდება შემადგენლობის დაყენება? რომ დამდგარხართ და ყველაფერის მწვრთნელზე გადაბრალებას ცდილობთ, რატომ ერთხელ არ დაფიქრებულხართ სად არის ძაღლის თავი დამარხული? მაგრამ ასეა კრიტიკა ყოველთვის ადვილია, აი საქმის კეთება და სწორი დასკვნების გაკეთებაა ძნელი. აიღეთ მაგალითი ისლანდიისგან და თქვენც იქნებით ფეხბურთში წარმატებული. და ყველაზე მთავარი: ვიდრე საქართველოში პატიოსნება და პროფესიონალიზმი არ იქნება დაფასებული, შედეგი სულ ასეთი იქნება!
მსგავსი ამბები
რუბრიკის სხვა სიახლეები
;