ქართული შვიდკაცა ოლიმპიადაზე?

საქართველოს ეროვნულ ოლიმპიურ კომიტეტში ახლახან აღმასკომის სხდომა გაიმართა, სადაც სხვადასხვა საკითხებთან ერთად საქართველოს შვიდკაცა რაგბის ნაკრების ოლიმპიურ პერსპექტივაზეც იმსჯელეს.

სხდომაზე აღინიშნა, რომ განსაკუთრებით აქტუალურია სათამაშო სახეობების დახმარების პროგრამა, რომლითაც უკვე სარგებლობს საქართველოს ნაკრები შვიდკაცა რაგბიში.

საქართველოს რაგბის კავშირის პრეზიდენტმა გოჩა სვანიძემ წარადგინა რაგბის კავშირის ხედვა შვიდკაცა რაგბის განვითარებასთან დაკავშირებით და აღნიშნა, რომ ერთობლივი ძალისხმევით შესაძლებელია და საკმაოდ რეალურია, რომ რაგბის ამ სახეობაში არა მარტო მომავალი წლის ახალგაზრდული ოლიმპიური თამაშების საგზური მოვიპოვოთ, არამედ ტოკიოს ოლიმპიადის ლიცენზიაზეც ვიფიქროთ.

ამ თემაზე დეტალური პრეზენტაცია წარმოადგინა რაგბის აკადემიის რექტორმა ზაზა ლეჟავამ. მან ისაუბრა საბაზო გუნდის - საქართველოს ახალგაზრდული ნაკრების წლევანდელ შედეგებზე, მზადების სამწლიან გეგმაზე, საოლიმპიადო შესარჩევი ციკლის თავისებურებებზე.

შვიდკაცა რაგბის ოლიმპიური დებიუტი შარშან, რიო დე ჟანეიროში შედგა და ის ასევე შეტანილია 2020 წლის ოლიმპიური თამაშების პროგრამაში.

სეოკ-ის პრეზიდენტმა ლერი ხაბელოვმა ხაზი გაუსვა სათამაშო სახეობაში ოლიმპიადაზე შესაძლო მონაწილეობის განსაკუთრებულ მნიშვნელობას და საქართველოს რაგბის კავშირს შესთავაზა ერთიანი გეგმის შემუშავება მიზნის მისაღწევად:

"ჩვენ მზად ვართ უფრო აქტიურად ამოგიდგეთ მხარში და მეტი ფინანსური რესურსი მოვიზიდოთ საერთო ამოცანის შესასრულებლად. იმედი გვაქვს, რომ სპორტის სამინისტროც მხარს დაგვიჭერს, რათა შეიქმნას შვიდკაცა რაგბის განვითარებისა და საქართველოს ნაკრების დახმარების ფონდი. იმის იმედიც გვაქვს, რომ ამ საქმეში კერძო სექტორიც შემოგვიერთდება" - თქვა ლერი ხაბელოვმა.

აღმასკომის სხდომაზე მიწვეულმა საქართველოს სპორტისა და ახალგაზრდობის საქმეთა მინისტრის მოადგილემ შალვა გოგოლაძემ დაადასტურა, რომ სამინისტრო ასევე ოპტიმისტურად უყურებს შვიდკაცა რაგბის პერსპექტივას და გამოთქვა მზადყოფნა, ამ მიმართულებით მჭიდროდ ითანამშრომლოს ოლიმპიურ კომიტეტთან და საქართველოს რაგბის კავშირთან.

სეოკ-ის პრეს სამსახური

1550
მკითხველის კომენტარები / 0 /
მსგავსი ამბები
რუბრიკის სხვა სიახლეები
;