ქართული ჰიმნი სუვაშიც აჟღერდა: ირაკლი ჩხეიძე მსოფლიოს ჩემპიონია! 

ფიჯის დედაქალაქ სუვაში გრძელდება 20-წლამდელ ძალოსანთა მსოფლიოს ჩემპიონატი, რომელშიც გუშინ წარმატებით იასპარეზა ზუგდიდელმა ირაკლი ჩხეიძემ, რომელმაც 102 კილოგრამ წონით კატეგორიაში 2 ოქროს და ერთი ვერცხლის მედალი მოიპოვა. 

არადა, პირველსავე ცდაზე 162 კილო ვერ აიტაცა, რაც ძალიან მოულოდნელი იყო. შემდეგ ქართველმა ძალოსანმა ორი ცდა წარმატებით გამოიყენა და 167 კილოგრამით ვერცხლის მედალი დაიმსახურა. ჩვენებურს 2 კილოგრამით აჯობა ბელარუსმა ანდრეი არლიონაკმა, რომელსაც ოქრო ერგო. 165 კილოგრამით მესამე იყო ირანელი ამირ აზიზი.

ირაკლი ჩხეიძემ შესანიშნავად იასპარეზა აკვრაში - მეორე ცდაზე 204-კილოგრამიანი შტანგა დაიმორჩილა და როგორც ამ მოძრაობაში, ისე ორჭიდში ოქროს მედლები მოინაგრა და ფიჯის დედაქალაქში მისი გამარჯვების აღსანიშნავად ქართული ჰიმნი აჟღერდა. საგულისხმოა, რომ ირაკლიმ 20-წლამდელებში ზედიზედ მეორედ მოიპოვა მსოფლიოს ჩემპიონობა. 

სუვაში 201 კილო აკრა არლიონაკმა, რამაც ბელარუს ათლეტს ვერცხლის მედალი მოუტანა. მესამე ადგილზე 195 კილოთი აზიზი გავიდა.
ასპარზობის დამთავრების შემდეგ ირაკლი ჩხეიძის პირად მწვრთნელ ზურაბ ანთაურს სუვაში შევეხმიანეთ.

- შეჯიბრება ძალიან დაძაბული გამოდგა, - გვითხრა მან. - ბელარუსი და ირანელი ძალოსნები უწინაც იყვნენ ჩვენი კონკურენტები, თუმცა ამ ჩემპიონატისთვის უწინდელებზე უკეთ მომზადებულან. ყოველთვის თვალს ვადევნებდი მათს გამოსვლებს, ინფორმირებულიც ვიყავი, ბოლო დროს რა მაჩვენებლებიც ჰქონდათ, ამიტომ ფიჯიზე გამგზავრებამდე გარკვეული შედეგებისთვის ვემზადებოდით. წინასწარი გათვლებით, საჩემპიონოდ ორჭიდში 377 კილოსთვის მაინც უნდა ვყოფილიყავით მზად. 

წლეულს წლის დასაწყისში ირაკლიმ ტრავმა მიიღო - მარცხენა ფეხის ოთხთავა კუნთი დაიზიანა, რაც ჯერჯერობით სრული დატვირთვით ვარჯიშის საშუალებას არ გვაძლევს. პირველი ცდაც მან სწორედ მტკივანი ფეხის გამო ვერ გამოიყენა. საბედნიეროდ, მერე ყველაფერი კარგად წარიმართა, თუმცა ტრავმამ ჩემს შეგირდს აკვრის ბოლო ცდაზეც შეუშალა ხელი - 213 კილო რომ ვერ დაძლია, არადა, ვარჯიშებზე რომ არაფერი ვთქვათ, ოფიციალურ შეჯიბრებაზე 216 კილო აქვს დამორჩილებული. 

ირაკლი ნიჭიერი სპორტსმენია. ვარჯიში ზუგდიდში დაიწყო ბეჟან ჭიჭინაძის ხელმძღვანელობით. ახლა მე და ბეჟანი ვავარჯიშებთ. 2014 წლიდან დღემდე გლდანის ოლიმპიური მზადების ცენტრში (დირექტორი ბორის ფირცხელიანი) იმაღლებს ოსტატობას, სადაც ვარჯიშისა და აქტიური დასვენებისთვის ყველა პირობა აქვს. ჩვენი ფედერაციისა და ეროვნული ნაკრების ხელმძღვანელებიც, კერძოდ, კახი კახიაშვილი და გიორგი ასანიძე აქტიურად გვიდგანან მხარში. სპორტის სამინისტროს და ეროვნული ოლიმპიური კომიტეტის მხარდაჭერაც არ გვაკლია... 

ქართველმა ძალოსანმა მედლების მოხვეჭა 2015 წლიდან დაიწყო, როცა კადეტთა ევროპის პირველობაზე ორი ბრინჯაო დაიმსახურა, მომდევნო წელს მსგავსი შეჯიბრების სამი ოქრო მოიპოვა, ხოლო მსოფლიოზე აკრასა და ორჭიდში პირველი იყო, ატაცში ვერცხლს დასჯერდა.

განსაკუთრებით წარმატებული შარშანდელი სეზონი აღმოჩნდა: 20-წლამდელთა მსოფლიოს და ევროპის ჩემპიონატებზე სამ-სამი ოქროს მედლით დაიმშვენა მკერდი. წლეულს გაზაფხულზე ბათუმში უფროსების ევროპის ჩემპიონატზე ატაცში ბრინჯაოს მედალი ხვდა. სეზონის ბოლომდე იგი კიდევ ორ შეჯიბრებაში მოსინჯავს ძალებს: ტაილანდში მსოფლიოს ჩემპიონატსა და რუმინეთში ახალგაზრდების ევროპაზე. იმედია, უმედლოდ ამ ტურნირებიდანაც არ დაბრუნდება.

ირაკლი ჩხეიძე: „დაძაბულ კონკურენციაში ჩემპიონობის შენარჩუნებამ ძალიან გამახარა. დიდი მადლობა ყველას, ვინც ამ შედეგების მიღწევაში დამეხმარა, ასევე, გამხნევებისა და მოლოცვებისთვის გულშემატკივრებს, რომელთა აქტიურ ქომაგობას სუვაშიც ვგრძნობდი“...

102 კგ
1. ირაკლი ჩხეიძე (საქართველო) - 371 (167+204)
2. ანდრეი არლიონაკი (ბელარუსი) - 370 (169+201)
3. ამირ აზიზი (ირანი) - 360 (165+195)

8 ივნისს, მსოფლიოს ჩემპიონატის დასკვნით დღეს, სუვაში +109 კილოგრამ წონით კატეგორიაში თორნიკე ტაბატაძე იასპარეზებს.

ყოველდღიური სპორტული გაზეთი "ლელო"
938
მკითხველის კომენტარები / 0 /
მსგავსი ამბები
რუბრიკის სხვა სიახლეები
;