ქართულმა ხმალმა ვერონაში ვერ გაჭრა

იტალიურ ვერონაში გრძელდება 17 და 20-წლამდელ მოფარიკავეთა მსოფლიოს ჩემპიონატი.

გუშინ შეჯიბრებაში ახალგაზრდა მოხმალავეები ჩაებნენ. საპრიზო ადგილებისთვის პაექრობაში ქართველებიც მონაწილეობდნენ, მაგრამ საბოლოოდ ორმოცდაათეულშიც ვერავინ მოხვდნენ.

არადა, ჯგუფში ვაჟებს ნორმალური შედეგები ჰქონდათ: ვაჟა რეჭიამ ექვსიდან ოთხი შეხვედრა მოიგო - დაამარცხა სებასტიან ბლაცი (გერმანია, 5:1), ანდრიი ჰოლივანოვი (უკრაინა, 5:2), აჰმად ალამავი (იორდანია, 5:1) და ჩედი ჩლამალანი (ტუნისი, 5:1), ხოლო მარკ სტეპანოვსა (რუსეთი, 0:5) და მორ მილაშინთან (უნგრეთი, 2:5) ვერაფერს გახდა.

ოთხ მეტოქეს დააყრევინა ფარ-ხმალი გოგა კაკაურიძემაც - დაჯაბნა პაბლო ტროჩესი (კოლუმბია, 5:3), სტეფან ბულდეევი (ბულგარეთი, 5:3), რარეს აილინკა (რუმინეთი, 5:4), მიგელ მენრიკე (ბოლივია, 5:4), ორი ორთაბრძოლა კი მარტინ ნადისა (უნგრეთი, 3:5) და კანისორნ პანგმუუნთან (ტაილანდი, 3:5) დათმო.

ნიკა შენგელიამ სამ მეტოქეს აჯობა - აჰმად ფერჯანის (ტუნისი, 5:3), ალჯაზ ვარგას (სლოვენია, 5:2) და სამარტ პრაკაშ სავარეს (ინდოეთი, 5:0), ხოლო ივან პისარენკოსთან (უკრაინა, 4:5), მოჰამად ალჰიფლისა (ერაყი, 4:5) და ამირჰოსეინ შაკირასთან (ირანი, 2:5) დამარცხდა.

ნიკოლოზ ჭეიშვილმა მხოლოდ ორ მოწინააღმდეგეს მოუგო - კამარ კიიტისა (აშშ, 5:1) და ძიან ძინ ზაუს (ჰონკონგი, 5:4), დანარჩენი ოთხი შეხვედრა წააგო. ამის მიუხედავად, სხვა თანაგუნდელებთან ერთად პლეი ოფში გავიდა. იქ კი მხოლოდ ნიკა შენგელიამ მოიგო ერთი ორთაბრძოლა - ხრისტო ეფიმოვს (ბულგარეთი) სძლია - 15:9, მომდევნო დაპირისპირება ბელარუს კირილ კირპიჩოუსთან დათმო - 10:15 და საბოლოოდ 54-ე ადგილზე გავიდა.

ვაჟა რეჭია პლეი ოფში ვილმოს ზლამას (უნგრეთი) ვერ გაუმკლავდა - 13:15, გოგა კაკაურიძე ფედერიკო დე რობიოსთან (ხორვატია) დამარცხდა - 9:15, ნიკოლოზ ჭეიშვილს კი იკრაინელმა ივან პისარენკომ აჯობა - 15:10. რეჭია, კაკაურიძე და ჭეიშვილი, შესაბამისად, 73-ე, 79-ე და მე-100 ადგილებით დაკმაყოფილდნენ.

ვერონის საფარიკაო ბილიკებზე 20-წლამდელებში ვერც ქართველმა მოხმალავე გოგონებმა იყოჩაღეს: ოლიმპიური ჩემპიონის - ვლადიმერ აფციაურის ქალიშვილმა - მარიამ აფციაურმა ჯგუფში დაამარცხა ნიკოლე ტინ ვიი (სინგაპური, 5:3), ანე პუპინე (საპრანგეთი, 5:2) და პიმნარეს პუტო (ტაილანდი, 5:2), ორი შეხვედრა თითო ჩხვლეტით წააგო იონა ილიევასა (ბულგარეთი, 4:5) და რეჩილ ლემერთან (კანადა, 4:5).

ორ ორთაბრძოლაში მიაღწია წარმატებას ანა აფრასიძემ - მედელინ ბეკერსა (გერმანია, 5:3) და სარა შენთან (ჰონკონგი, 5:2), ხოლო კორეელ, უნგრელ და კანადელ მოხმალავეებთან დამარცხდა. მხოლოდ ერთხელ დატოვა საფარიკაო ბილიკი გამარჯვებულმა ლიკა ჯიჯეიშვილმა - ბრიტანელ კატლინ მაქსველს აჯობა (5:4), დანარჩენ ოთხ შეხვედრაში კი ვერაფერს გახდა.

ჯიჯეიშვილი და ნინი ნიქაბაძე, რომელმაც ყველა პაექრობა წააგო, პლეი ოფში ვერ გავიდნენ. მარიამ აფციაური და ანა აფრასიძე კი პირველსავე წრეში გამოეთიშნენ შეჯიბრებას, რადგან, შესაბამისად, ლინა მოჰამედსა (ეგვიპტე, 7:15) და ანდრეა ლუპუსთან (რუმინეთი, 3:15) დამარცხდნენ. საბოლოოდ ჩვენები 127 მონაწილეს შორის 70-ეულს მიღმა აღმოჩნდნენ: 72. მარიამ აფციაური, 86. ანა აფრასიძე, 101. ლიკა ჯიჯეიშვილი, 119. ნინი ნიქაბაძე.

დღეს შეჯიბრებაში 17-წლამდელი მოხმალავეები ჩაებმებიან. ჩვენგან იფარიკავებენ: ნინი ნიქაბაძე, თამარ ჩარკვიანი, ვახტანგ არჩვაძე, გიორგი მერკვილაძე და ლუკა ლომინაძე.

ყოველდღიური სპორტული გაზეთი "ლელო"
853
მკითხველის კომენტარები / 0 /
მსგავსი ამბები
რუბრიკის სხვა სიახლეები
;