ქართულ ხელბურთს ცხელი ზაფხული ელის - 'სახელმწიფოს მხარდაჭერის გარეშე ბაზების კეთილმოწყობა შეუძლებელია'

წლევანდელი სეზონი ერთ-ერთი გამორჩეულია ქართული ხელბურთისთვის. ჩვენი ფედერაცია სხვადასხვა ასაკის ექვს პირველობას ატარებს. ვაჟთა ეროვნულ ჩემპიონატში რვა გუნდი მონაწილეობს. უკვე დამთავრდა რეგულარული სეზონი და საუკეთესო ოთხეული გამოვლინდა, რომელიც საპრიზო ადგილებისთვის იბრძოლებს.

მესამე წელიწადია, ასევე, სტაბილურად იმართება ქალთა ჩემპიონატები რვა გუნდის მონაწილეობით. მედლებისთვის მოპაექრე კვარტეტი აქაც გარკვეულია. 2002 წელს დაბადებულთა საქართველოს პირველობაში ვაჟთა 15 და გოგონათა 11, ხოლო 2004-2005 წლებში დაბადებულთა შორის ვაჟების 16 და გოგონების 13 გუნდი იბრძვის მედლებისთვის. გამარჯვებულებისა და პრიზიორების ვინაობა მაისში გაირკვევა.

- წლეულს ერთი სიახლეც გვაქვს, - გვითხრა საქართველოს ხელბურთის ფედერაციის პრეზიდენტმა ზურაბ კაკაბაძემ. - 17-წლამდელ გოგონათა ნაკრების ბაზაზე ჩამოყალიბდა თბილისის „ოლიმპია“, რომელიც საქართველო-აზერბაიჯანის ერთობლივ ჩემპიონატში მონაწილეობს. ამ პირველობაში ხუთი აზერბაიჯანული გუნდია, მათ შორის ორი - ლეგიონერებით დაკომპლექტებული. ჩვენი მიზანია, ახალგაზრდა ქართველი ხელბურთელების გამოწრთობა და 17-წლამდელთა ევროპის ჩემპიონატისთვის მომზადება, რომელსაც თბილისი უმასპინძლებს.

- ამ სისტემით კმაყოფილი თუ ხართ და გაისად გაერთიანებულ ჩემპიონატში გუნდების რაოდენობის გაზრდას ხომ არ გეგმავთ?

- ამჟამად „ოლიმპია“ მეოთხე ადგილზეა, თუმცა ადგილს ჩვენთვის გადამწყვეტი მნიშვნელობა არ აქვს. როგორც გითხარით, მთავარი ევროპირველობისთვის მომზადებაა. ეს შეჯიბრება საქართველოს დედაქალაქში 2-12 აგვისტოს გაიმართება. სულ 10 გუნდი შეიკრიბება. ჩვენს ჯგუფში არიან ლიეტუვა, ლატვია, ფინეთი და შვეიცარია.

ამ ერთი წლის განმავლობაში ქართველმა ხელბურთელებმა საგრძნობლად აიმაღლეს ოსტატობა და ჩემპიონატში კარგი თამაშით, იმედია, ქომაგებს გაახარებენ. რაც შეეხება საქართველო-აზერბაიჯანის ერთობლივ პირველობაში გუნდების გაზრდას, გოგონებში წლეულს ამას ვერ შევძლებთ. თუმცა ვაჟებშიც გვინდა მსგავსი შეჯიბრების გამართვა და იქ, ალბათ, ჩვენი ორი ან სამი კლუბი ითამაშებს. მალე აზერბაიჯანელ კოლეგებს შევხვდებით და მომავალ გეგმებზე უფრო კონკრეტულად ვიმსჯელებთ. 

- ვიცი, რომ წლეულს ცხელი ზაფხული გელით...

- ნამდვილად ასეა: 17-წლამდელთა ევროპის ჩემპიონატის გარდა, თბილისი 8-16 ივნისს მსოფლიოს ხელბურთის ფედერაციის ერთა ჩემპიონატს უმასპინძლებს.

ეს შეჯიბრება კონტინენტური ტურნირია ნაკრები გუნდებისთვის. 12 ქვეყნის წარმომადგენლები ითამაშებენ ჩვენს დედაქალაქში, საიდანაც ექვსი ევროპული გუნდი იქნება. 2015 წლიდან თბილისში ხელბურთელთა რამდენიმე მნიშვნელოვანი ასპარეზობა გაიმართა. მათ შორის - ევროპის ახალგაზრდობის ოლიმპიური ფესტივალი, 2016-2018 წლებში - მსოფლიოს და ორი ევროპის ასაკობრივი ჩემპიონატები. სახელმწიფოსა და ეროვნული ოლიმპიური კომიტეტისგან ყურადღებას ყოველთვის ვგრძნობდით, მაგრამ, იმედია, წლეულს მხარდაჭერა უფრო მასშტაბური იქნება, რადგან ამ ორი ღონისძიების გარდა, ჩვენი 17-წლამდელი ვაჟები 1-6 ივნისს გეტებორგში გამოვლენ ევროპის პირველობაზე, ხოლო ცხრამეტწლამდელი გოგონები ლიეტუვაში თანატოლთა კონტინენტის პირველობაზე მოსინჯავენ ძალებს. 

- ხელბურთის მასობრიობის ამაღლებისა და პოპულარიზაციის მიზნით ეროვნული ჩემპიონატების მიმოსვლითი მატჩების ჩატარებას ჯერ კიდევ ორი წლის წინათ გეგმავდით. 

- მისი რეალიზაცია, სამწუხაროდ, დღემდე ვერ შევძელით, მიზეზი ბაზების უქონლობაა. 

- არადა, ბათუმში, თელავსა და გორში შესანიშნავი კომპლექსები აშენდა...

- სახელმწიფოს მხარდაჭერის გარეშე ბაზების კეთილმოწყობა შეუძლებელია, რადგან ფედერაციის რესურსით ინფრასტრუქტურის შექმნა არც განიხილება. 2013-2014 წლებში სპორტის სამინისტრო აქტიურად დაგვიდგა მხარში, როცა 2017 წლისთვის საქართველოში 19-წლამდელთა მსოფლიოს ჩემპიონატის მასპინძლობა განვიზრახეთ.

ხელბურთის საერთაშორისო ფედერაციაც გვენდო. მასპინძლობის უფლების მიღების შემდეგ საქართველოს მთავრობამ მიიღო გადაწყვეტილება და ბათუმში, თელავსა და გორში მულტიფუნქციური სასპორტო კომპლექსების მშენებლობა დაიწყო ამ ჩემპიონატისთვის. მართლაც, შესანიშნავი დარბაზები აშენდა (ოღონდ არა იმ პირველობისთვის).

დასტურად ბათუმის არაჩვეულებრივი სპორტის სასახლეც გამოდგება, სადაც შარშან მსოფლიოს საჭადრაკო ოლიმპიადა, წლეულს კი ძალოსანთა ევროპის ჩემპიონატი ჩატარდა უმაღლეს დონეზე. თელავსა და გორშიც შესანიშნავი სასახლეებია აშენებული, მაგრამ ისინი დღემდე დაკეტილია, რადგან საქმე ბოლომდე არ არის მიყვანილი. თუკი ამ დარბაზების ექსპლუატაციაში შესვლა დაჩქარდება, ჩვენ შესაძლებლობა მოგვეცემა, ეროვნული ჩემპიონატები მიმოსვლით ჩავატაროთ. შინ გამართულ მატჩებს ყოველთვის მეტი მაყურებელი ჰყავს. ამდენად, სპორტის ამ სახეობის პოპულარიზაცია და მასში ჩაბმულთა რაოდენობაც გაიზრდება, შეჯიბრებებიც უფრო საინტერესო გახდება, საერთაშორისო ტურნირების სხვადასხვა ქალაქში ორგანიზების მეტი შესაძლებლობა გვექნება.

ყოველდღიური სპორტული გაზეთი "ლელო"
320
მკითხველის კომენტარები / 0 /
მსგავსი ამბები
რუბრიკის სხვა სიახლეები
;