დილა: ამ ბიჭს კოჭებში ეტყობა...

საქართველოს ჩემპიონატში დღეს ბევრი ლეგიონერია, თუმცა ხარისხისა რა მოგახსენოთ. არაერთი მათგანის მიმართ ჩნდება კითხვის ნიშნები.

საერთოდ, ლეგიონერების მოწვევა თვითმიზანი არ უნდა იყოს. დაუწერელი კანონია, რომ ისინი ერთი თავით მაინც უნდა სჯობდნენ ადგილობრივ ფეხბურთელს, რაც თავისთავად ასწევს ჩემპიონატის დონეს.

არაერთი ქართველი მწვრთნელი დასტურ იზიარებს ამ მოსაზრებას, მაგრამ ზოგიერთისთვის ეს, ალბათ, სიტყვის მასალაა მხოლოდ. არადა, ძალიან არ მინდა, რომ ასე იყოს.

საქართველოს ჩემპიონატში უცხოელებმა თავიანთი კვალი უნდა დატოვონ. სხვა თუ არაფერი, დონესთან ერთად, ეს ჩვენს პირველობას გვარიანად გაალამაზებს და პრესტიჟსაც შეეშველება.

...არაერთი ლეგიონერია დღეს გორის "დილაშიც", მაგრამ დღეს ერთ მათგანზე მინდა დავწერო. ამბობენ, ერთი თამაშით ფეხბურთელზე საფუძვლიანად მსჯელობა არ შეიძლებაო და ეს, ალბათ, ასეცაა. არის მეორე ჭეშმარიტებაც, რომლის მიხედვითაც კარგ ფეხბურთელს მისი მარიფათი კოჭებში ეტყობა.

ჰოდა, თუ ასეა, ჩვენი ჩემპიონატის კვალობაზე "დილას" ჰოლანდიელი ლეგიონერი ალვინ ფორტესი გვარიანი ვინმე ჩანს. ესეც ხშირად მომხდარა - ქართული კლუბები ისეთ ფეხბურთელს დაიმატებენ ხოლმე, ინტერნეტში მასზე ინფორმაციას ან ძლივს მოიძიებ, ან საერთოდ ვერაფერს წააწყდები.

ფორტესი არ არის "კაცი არსაიდან". მას უთამაშია ჰოლანდიური "ვიტესის" მეორე გუნდში, ბოლოს კი ჩეხეთის ჩემპიონატის უმაღლეს ლიგაში აგორებდა ბურთს. მის თამაშს რომ უცქერ, თვალში, უპირველეს ყოვლისა, ტექნიკური არსენალის მრავალფეროვნება გეცემა.

ესეც იქით იყოს და, ისეთი გოლის გატანა, როგორიც ფორტესმა საქართველოს მოქმედი ჩემპიონის კარში გაიტანა, სუსტ ფეხბურთელს ძალიან გაუჭირდება. საქართველოში ახლადჩამოსულ ჰოლანდიელს აშკარად ეტყობა, რომ ბურთთან შენობით არის და დრიბლინგიც ისეთი აქვს, თქვენი მოწონებული.

რაც მთავარია, ფორტესი ახალგაზრდაა და მას ყველანაირი პირობა აქვს საიმისოდ, რომ მოუმატოს. დანარჩენს ერთად ვნახავთ. წესით, გაგრძელება უნდა იყოს...

ყოველდღიური სპორტული გაზეთი "ლელო"
1917
მკითხველის კომენტარები / 0 /
მსგავსი ამბები
რუბრიკის სხვა სიახლეები
;