ქეცბაია, ქართველები და სიტყვიერი შეთანხმება: თუ მაგდებურგი გავარდა, ლორიაც ანორთოსისში...

"ლელოც" წერდა და კვიპროსულმა მედიამ კიდევ ერთხელ დაადასტურა, რომ გადაწყვეტილი ამბავია - უახლოესი 2 წლის განმავლობაში "ანორთოსისს" თემურ ქეცბაია გაწვრთნის. რაღა შეხსენება გჭირდებათ, რომ 51 წლის ქართველი სპეციალისტი ამ კლუბის ისტორიაში ყველაზე წარმატებული მწვრთნელია. სწორედ ქეცბაიას ხელმძღვანელობით ითამაშა "ანორთოსისმა" პირველად ჩემპიონთა ლიგის ჯგუფურ ეტაპზე...

კვიპროსული მედია შესაძლო ტრანსფერებზე წერს და ვარაუდობს, რომ მომავალი სეზონიდან "ანორთოსისის" ღირსებას, თორნიკე ოქრიაშვილის გარდა, შესაძლოა, კიდევ ორმა ჩვენებურმა ფეხბურთელმაც დაიცვას.

მოგეხსენებათ, ცოტა ხნის წინ ოქრიაშვილმა 2-წლიანი კონტრაქტი გააფორმა "ანორთოსისთან" და ეს რომ ასე უნდა მომხდარიყო, თავის დროზე "ლელომ" ექსკლუზიურად გაცნობათ, ხოლო ოქრიაშვილმა ეს ამბავი შვეიცარიასთან მატჩის შემდეგ დაადასტურა.

გარდა ამისა, კვიპროსელები "ანორთოსისში" გადასვლას უწინასწარმეტყველებენ საქართველოს ნაკრების ორ ფეხბურთელს - გიორგი ლორიას და გიორგი ნავალოვსკის. ქეცბაია ორივე მათგანს კარგად იცნობს.

ნავალოვსკი ამ დროისთვის ბათუმის "დინამოს" ღირსებას იცავს. რაც შეეხება ლორიას, ამჟამად ის გერმანიის მეორე ბუნდესლიგის ბინადარ "მაგდებურგის" ღირსებას იცავს. კვიპროსელთა ინფორმაციით, იმ შემთხვევაში, თუ "მაგდებურგი" მეორე ბუნდესლიგიდან გავარდება, არსებობს სიტყვიერი შეთანხმება იმის თაობაზე, რომ ლორია კვიპროსში გადავა სათამაშოდ.

დღესდღეობით, "ანორთოსისის" ღირსებას იცავენ ქართველი თავდამსხმელები - ბექა მიქელთაძე და ნიკა კაჭარავა.

ყოველდღიური სპორტული გაზეთი "ლელო"
1880
მკითხველის კომენტარები / 0 /
მსგავსი ამბები
რუბრიკის სხვა სიახლეები
;