ქეცბაიამ კვიპროსული ლიგის ვიცე-პრეზიდენტს განრისხებულმა უპასუხა - გსურთ, რომ ჩემპიონთა ლიგაზე აპოელმა ითამაშოს?

თემურ ქეცბაიას დაუფარავი გაღიზიანება გამოიწვია კვიპროსის სუპერლიგის ვიცე-პრეზიდენტის, ჰარის ლოიზიდისის განაცხადებამ - თუ ვარჯიშებს გუნდები 7-8 მაისს არ განაახლებენ, შესაძლოა, ჩემპიონატის დასასრულებლად საკმარისი დრო არ დარჩეს.

ფამაგუსტას „ანორთოსისის“ ქართველმა მთავარი მწვრთნელმა არ დამალა, რომ ასეთი მინიშნებებით ლაპარაკი არ მოსწონს და ლიგის ხელმძღვანელობისგან პოზიციის ღიად დაფიქისრება მოითხოვა - ეს ქეცბაიამ რადიო „სპორტს24“-ის ეთერში განაცხადა.

„ფამაგუსტელთა მწვრთნელი თემურ ქეცბაია დაძაბული იყო“ - წერია „სუპერ სპორტს ფმ“-ის ინტერნეტ-გვერდზე.

„ლოიძიდისმა თქვა ის, რაც თქვა, მაგრამ რას გვირჩევს, რომ ფეხბურთი არ ვითამაშოთ? ან რას ურჩევს „აპოელს“, რომ ჩემპიონთა ლიგაზე უბრძოლველად მოხვდეს? თუ ისინი, ვინც გასულ წელს ევროპაში კვიპროსს წარმოადგენდნენ? სიმამაცე უნდა ეყოს და გვითხრას, რა გავაკეთოთ. კორონავირუსი ახლაა, მაგრამ გაივლის და ჩვენ ნაჩქარები გადაწყვეტილებების ტყვეები არ უნდა გავხდეთ. კვიპროსის მსგავს პატარა ქვეყანაში ჩემპიონატის დასრულება ადვილია, რადგან ჩვენ თამაშზე გასამგზავრებლად თვითმფრინავებიც კი გვჭირდება. მას ეს არ ესმის, რადგან ფეხბურთელი არ იყო და ჰგონია, რომ ფეხბურთი ჩვეულებრივი კომპანიასავით უნდა მართოს“ - ამბობს თემურ ქეცბაია.

ქართველმა მწვრთნელმა გუნდების რაოდენობის შემცირების შესახებაც ილაპარაკა: „საუკეთესო გამოსავალი 10 გუნდიანი ჩემპიონატი იქნება. 12-გუნდიანსაც ვუყურებთ და ნორმალური ვარიანტია. თქვენ, ჟურნალისტებმა, უნდა თქვან თქვენი სიტყვა და არ უსმინოთ მათ მოსაზრებებს, ვინც 14-16-გუნდიან ჩემპიონატზე საუბრობს და ისიც არ იცისმ ბურთი მრგვალია თუ ოთხკუთხედი. მათ აზრი არც უნდა ჰკითხოთ. ფეხბურთის მცოდნეთა აზრით დაინტერესდით. ბევრზე უკეთ ვიცი, კვიპროსის ფეხბურთისთვის რა უნდა გავაკეთოთ. სეზონის განახლება რაც უფრო დიდხანს გადაიდება, მით უფრო მეტი პრობლემა შეგვექმნება. მეორე დივიზიონიდან გუნდებსი დამატება კი კატასტროფულ შედეგებს მოგვიტანს, რადგან მათ არ აქვთ არც სტადიონები და საერთოდ, არაფერი“.

მისი თქმით, ხელისუფლებამ გადაწყვეტილება უნდა მიიღოს: „ხელისუფლებამ უნდა გააკეთოს რაღაც, მიიღოს გადაწყვეტილება და ვარჯიშის საშუალება მოგვცეს. კლუბებს ფინანსური პრობლემები გვაქვს და ეს მტკიცებულებებით უნდა წარვუდგინოთ. ფეხბურთელების და ყველანი დავიღალეთ. მთელი მსოფლიოს სურს თამაში გააგრძელოს და ამაზე უნდა ვიფიქროთ. ყველანი ვხედავთ, გერმანიაში რაც ხდება. ანუ მომავლისკენ უნდა გავიხედოთ. კარგი იქნება. ყველას სურს, რომ კარგი ფეხბურთი ისვე ვიხილოთ. ამიტომ ყველამ უნდა დაჯდეს და მოიფიქროს, ფეხბურთისთვის წინსვლისკენ კარგი რა იქნება”.

კვიპროსის ჩემპიონატში ჩატარებული 23 ტურის შემდეგ ნიქოზიას „ომონიამ“ და ფამაგუსტას „ანორთოსისმა“ 46-46 ქულა დააგროვეს. ქეცბაიას ის აღიზიანებს, რომ მისმა კონკურენტმა გალიდერება მხოლოდ 22-ე ტურის შემდეგ მოახერხა, თანაც არა ქულებით, არამედ, დებულებაში არსებული პუნქტით. ქართველი მწვრთნელის აზრით, ჩემპიონი მოედანზე უნდა დასრულდეს და არა კაბინეტში გადაწყვეტილებით, როგორც ეს ბელგიასა და შოტლანდიაში მოხდა.

უეფას ოფიციალურმა გვერდმა გარკვეულწილად დაადასტურა გავრცელებული ინფორმაცია, რომ სეზონის დასრულების არსებობს ორი სცენარი. ერთი მათგანის მიხედვით, თუ ჩემპიონატის დასრულება შეუძლებელი იქნება, უეფა 2019 წლის შედეგებს გააბათილებს. აქედან გამომდინარე, ევროპულ შეჯიბრებებში უეფა გუნდებს დაუშვებს არა ბოლო სეზონში დაკავებული ადგილების მიხედვით, არამედ უეფას რეიტინგში პოზიციის შესაბამისად. ასეთ შემტხვევაში, პირველ-მეორე ადგილზე მყოფი ნიქოზიას „ომონიას“ და „ანორთოსისი“ ევროტურნირების მიღმა დარჩებიან, უეფას რეიტინგის საფუძველზე, ჩემპიონთა ლიგაზე კვიპროსის წარდგენის უფლებას „აპოელი“ მიიღებს, ხოლო ევროპის ლიგაზე – „აპოლონი“, „აელი“ და „აეკი“ იასპარეზებენ. ცახდია, ქეცბაიას მთელი წლის შრომის წყალში ჩაყრა არაფრით არ სურს.


5690
მკითხველის კომენტარები / 0 /
მსგავსი ამბები
რუბრიკის სხვა სიახლეები
;